အာဂျင်တီးနားဝါရင့်တောင်ပံကစားသမား ဒီမာရီယာသည် ကမ္ဘာ့ဖလားချန်ပီယံဆု ဆွတ်ခူးနိုင်ခဲ့ပြီးနောက် နိုင်ငံလက်ရွေးစင်အသင်းအတွက် ဆက်လက်ကစားသွားရန် ဆုံးဖြတ်ခဲ့ကြောင်း အာဂျင်တီးနားမီဒီယာ TyC Sports က ဖော်ပြခဲ့သည်။
အသက်(၃၄)နှစ်အရွယ်ရှိပြီဖြစ်သူ ဒီမာရီယာသည် ၂၀၂၁ ကိုပါအမေရိကနှင့် ၂၀၂၂ ကမ္ဘာ့ဖလား ချန်ပီယံဆုရ အာဂျင်တီးနားအသင်းတွင် အဓိကအစိတ်အပိုင်းအဖြစ် ပါဝင်ခဲ့သူဖြစ်သည်။
သူ၏ကြံ့ခိုင်မှုပိုင်းနှင့် အသက်အရွယ်ကြောင့် ကမ္ဘာ့ဖလားပြိုင်ပွဲအပြီးတွင် နိုင်ငံလက်ရွေးစင်ကစားသမားဘဝမှ အနားယူဖွယ်ရှိသည်ဟု ပြိုင်ပွဲမတိုင်မီက သတင်းများလည်း ထွက်ပေါ်ခဲ့သည်။
သို့သော် ဒီမာရီယာသည် နိုင်ငံအသင်းနှင့်အတူ ကမ္ဘာ့ဖလားချန်ပီယံဆု ရယူနိုင်ခဲ့ပြီးနောက် မူလရည်ရွယ်ချက်ကို ပြန်ပြင်ကာ ဆက်လက်ကစားသွားရန် ဆုံးဖြတ်ခဲ့ခြင်းဖြစ်သည်။
၎င်းအနေဖြင့် ကမ္ဘာ့ဖလားပြိုင်ပွဲတွင် (၅)ပွဲကစားကာ တစ်ဂိုးသွင်း၊ နှစ်ဂိုး ဖန်တီးခဲ့ပြီး သူ့အတွက် ခြေစွမ်းအပြနိုင်ဆုံးပွဲမှာ ဗိုလ်လုပွဲဖြစ်ကာ တစ်ဂိုးသွင်းခဲ့သလို၊ မက်ဆီ၏အဖွင့်ပယ်နယ်တီမှာလည်း သူ့ကြောင့် ရရှိခဲ့ခြင်းဖြစ်သည်။
ဒီမာရီယာသည် အသင်းခေါင်းဆောင် မက်ဆီနည်းတူ သူ၏နိုင်ငံလက်ရွေးစင် ကစားသမားဘဝကို ဆက်လက်ရှေ့ဆက်ရန် ဆုံးဖြတ်ခဲ့ခြင်းလည်းဖြစ်သည်။
၎င်းသည် နိုင်ငံအသင်းအတွက် (၁၂၉)ပွဲကစားကာ (၂၄)ဂိုး သွင်းယူပေးထားသည်။
ဒီမာရီယာသည် နိုင်ငံအသင်းနှင့်အတူ ကမ္ဘာ့ဖလားချန်ပီယံဆုရယူပြီးနောက် ကမ္ဘာ့ဖလား ချန်ပီယံရုပ်တုကို သူ၏ညာဘက်ပေါင်ပေါ်တွင် Tattoo ရေးထိုးထားသည့်ပုံ၊ Tattoo ရေးထိုးပေးသူနှင့် တွဲရိုက်ထားသည့်ပုံများကို Facebook တွင် တင်ရှိခဲ့သည်။
