အာဆင်နယ် အသင်း ရဲ့ ဂန္တဝင် နည်းပြကြီး အာဆင်ဝင်းဂါး က လက်ရှိ နည်းပြ အာတီတာ အနေနဲ့ အိုဇေးလ် ရဲ့ အကောင်းဆုံး ပုံစံ ရရှိအောင် ဘယ်လို လုပ်ဆောင်ရမလဲ ဆိုတာ အကြံဉာဏ်ကောင်းတွေ ပေးသွားခဲ့ပါတယ် ။
ဂျာမနီ ကွင်းလယ်လူဟောင်း အိုဇေးလ် ဟာ အာတီတာ ရဲ့ အာဆင်နယ် နည်းပြ ဘဝ အစမှာ ပုံမှန် ပွဲထွက် ကစားခွင့် ရခဲ့ပါတယ် ။ ဒါပေမယ့်လည်း ကိုဗစ်-၁၉ ကြောင့် ဘောလုံးပွဲတွေ ရပ်နားပြီး ပြန်လည် စတင်ချိန်ကနေ အခုထက်ထိ အိုဇေးလ် ဟာ တရားဝင် ပြိုင်ပွဲတွေမှာ ကစားရခြင်း မရှိတော့ပါဘူး ။
အာတီတာ ဟာ အိုဇေးလ် ကို ရာသီကြို တံခါးပိတ် ခြေစမ်းပွဲမှာ ပြန်လည် ပါဝင်ခွင့် ပေးခဲ့ပေမယ့် ဒီရာသီအစမှာ ကစားခဲ့တဲ့ ပွဲစဉ်တွေ အားလုံးမှာ ဂျာမန်သားကို အရန် လူစာရင်းထဲမှာတောင် ထည့်သွင်း ခဲ့ခြင်း မရှိပါဘူး ။
ဒါ့အပြင် အိုဇေးလ် ဟာ အာဆင်နယ် အသင်းရဲ့ ယူရိုပါလိဂ် အုပ်စု အဆင့် ပွဲစဉ် အတွက် အပြီးသတ် လူစာရင်းကနေလည်း ချန်လှပ် ခံခဲ့ရသလို ပရီးမီးယားလိဂ် လူစာရင်း ကနေလည်း ချန်လှပ် ခံရဖွယ် ရှိနေတယ်လို့ သတင်းတွေ ထွက်ပေါ် နေပါတယ် ။
အိုဇေးလ် ဟာ အာဆင်နယ် အသင်းမှာ တစ်ပတ်လုပ်ခ ပေါင် ၃၅၀၀၀၀ ရရှိ နေပြီး သူ နဲ့ အာဆင်နယ် အသင်းတို့ရဲ့ စာချုပ် သက်တမ်းဟာ ၂၀၂၁ ခုနှစ်မှ ကုန်ဆုံးမှာလည်း ဖြစ်ပါတယ် ။အိုဇေးလ်ကတော့ ပွဲထွက်ခွင့် မရပေမယ့် အာဆင်နယ် အသင်းမှာ စာချုပ် သက်တမ်း ကုန်ဆုံးတဲ့ အထိ ကစားသွားမှာ ဖြစ်ကြောင်း ပြောကြား ထားပါတယ် ။
ပြီးခဲ့တဲ့ ၇ နှစ်တုန်းက အိုဇေးလ် ကို ရီးရဲလ်မက်ဒရစ် အသင်းကနေ အာဆင်နယ် အသင်းကို ကလပ်စံချိန်တင် ပြောင်းရွှေ့ကြေးနဲ့ ခေါ်ယူ ခဲ့တဲ့ဂန်းနား ဂန္တဝင် နည်းပြ အာဆင်ဝင်းဂါး က အိုဇေးလ် ကို ခံစစ် အားသန် ကစားသမားတွေနဲ့ ဝန်းရံ ပေးဖို့ လိုအပ်တယ်လို့ ဆိုပါတယ် ။
အာဆင်းက Der Spiegel မှာ ” သူ(အိုဇေးလ်) က ကွင်းထဲမှာ စည်းကမ်းအရမ်းကောင်းတဲ့ ကစားသမား တစ်ဦးတော့ မဟုတ်ပါဘူး ။ သူက ဘောလုံး လိုက်လု ရတာ အားသန်တဲ့ ကစားသမားတော့ မဟုတ်ပါဘူး ။ “
” ဒါပေမယ့် ဒီပြဿနာကို ဖြေရှင်းနိုင်တဲ့ နည်းလမ်း ရှိပါတယ် ၊ သူ့ဘက်ခြမ်းမှာ ခံစစ် အားသန် ကစားသမားတွေနဲ့ ဝန်းရံ ပေးလိုက်ရင် အဆင်ပြေပါတယ် ၊ အဓိက အရေးကြီးတာက တိုက်စစ် နဲ့ ခံစစ် ဟန်ချက် ညီနေဖို့ပါပဲ ။ “
” အိုဇေးလ် လို ကစားသမားမျိုးက ဘောလုံးကို အေးအေးဆေးဆေး တည်ငြိမ်စွာ နဲ့ ကိုင်ကစားနိုင်တာက တိုက်ဆိုင်မှု မဟုတ်ပါဘူး ။ သူက တခြားကစားသမားတွေထက် ပွဲအခြေအနေကို ပိုဖတ်တက်ပြီး ဘယ်လို အခြေအနေမှာ ဘာလုပ်ရမလဲဆိုတာ သိပါတယ် ။ “
” သူက ဘောလုံး မရခင်ကတည်းက ဘာလုပ်ရမလဲ ဆိုတာ ကြိုတင် စဉ်းစားပြီးသားပါ ၊ ဒီလို ကစားသမားတွေကပဲ အသင်း ကို နိုင်ပွဲ ရယူပေးမှာပါ ။ ” လို့ ပြောကြား လိုက်ပါတယ် ။
