ဘောလုံးဝေဖန်သူအဖြစ် ဆောင်ရွက်နေသည့် ယူနိုက်တက်ဂန္ထဝင်ကွင်းလယ်လူဟောင်း ပေါလ်စခိုးလ်က နာပိုလီတိုက်စစ်မှူး အိုဆင်မန်ထက် နည်းပြ တန်ဟက်ဂ်၏ ကစားဟန်နှင့်ပိုမိုကိုက်ညီမည့် အင်တာမီလန်တိုက်စစ်မှူး လော်တာရိုမာတီနက်ဇ်အား ခေါ်ယူရန် အသင်းဟောင်းကို တိုက်တွန်းပြောကြားခဲ့သည်။
ယူနိုက်တက်အသင်းသည် နာမည်ကျော်တိုက်စစ်မှူး စီရော်နယ်လ်ဒို ထွက်ခွာပြီးနောက် အသင်းတွင် တိုက်စစ်မှူးစစ်စစ်ဆို၍ မာစီယဲလ်တစ်ဦးတည်းသာ ရှိသည့်အတွက် ပြီးခဲ့သည့် ဇန်နဝါရီအပြောင်းအရွှေ့ကာလတွင် ဗက်ဟော့စ်ကို အရေးပေါ်အငှားခေါ်ယူခဲ့ရသည်။ ထို့ကြောင့် မန်ယူအသင်းသည် လာမည့် ၂၀၂၃ နွေရာသီအပြောင်းအရွှေ့ကာလတွင် ထိပ်တန်းတိုက်စစ်မှူးတစ်ဦး ခေါ်ယူရန် စီစဉ်နေပြီး လက်ရှိတွင် စပါးတိုက်စစ်မှူး ဟာရီကိန်းနှင့် နာပိုလီတိုက်စစ်မှူး အိုဆင်မန်တို့ကို ပစ်မှတ်ထားနေကြောင်း သိရသည်။
ယူနိုက်တက်နည်းပြ တန်ဟက်ဂ်ကမူ ပရီးမီးယားလိဂ် အတွေ့အကြုံရှိသည့် ဟာရီကိန်းကို ခေါ်ယူရန် အလိုရှိနေသော်လည်း ပေါလ်စခိုးလ်ကမူ စပါးအသင်းအနေဖြင့် ၎င်းတို့၏ Icon ကစားသမားဖြစ်သည့် ဟာရီကိန်းကို လက်လွှတ်မည်ဟုမထင်ကြောင်း ပြောကြားခဲ့သည်။
ထို့ပြင် ပေါလ်စခိုးလ်က ယူနိုက်တက်အသင်း ပစ်မှတ်ထားနေသည့် နာပိုလီတိုက်စစ်မှူး အိုဆင်မန်မှာ အသင်းဟောင်း မန်ယူနိ်ုက်ထက် ချယ်လ်ဆီးနှင့် လိုက်ဖက်မည့်ကစားသမားဖြစ်ပြီး မန်ယူနိုက်တက်အသင်းအနေဖြင့် တန်ဟက်ဂ်၏ ကစားဟန်နှင့်ပိုမိုကိုက်ညီမည့် အင်တာမီလန်တိုက်စစ်မှူး လော်တာရိုမာတီနက်ဇ် ကိုသာ ခေါ်ယူသင့်ကြောင်း BT Sport ရုပ်သံတွင် ပြောကြားခဲ့ခြင်းဖြစ်သည်။
“ဟာရီကိန်းအနေနဲ့ စပါးအသင်းက ထွက်ခွာမယ်လို့ ကျွန်တော် မထင်ပါဘူး။ ပြီးတော့ ဟာရီကိန်းရဲ့ အပြောင်းအရွှေ့အတွက် လီဗီ (စပါး အသင်းဥက္ကဋ္ဌ) နဲ့ ညှိနှိုင်းရတာလည်း အရမ်းကိုခက်ခဲမယ်လို့ ကျွန်တော်ထင်တယ်။ အိုဆင်မန်က အရမ်းတော်တဲ့ကစားသမားပါ။ ဒါပေမဲ့ သူက ချယ်လ်ဆီးနဲ့ ပိုလိုက်ဖက်မယ်လို့ ကျွန်တော် ထင်တယ်။ အင်တာမီလန်မှာ ကစားနေတဲ့ အာဂျင်တီးနားတိုက်စစ်မှူး လော်တာရိုမာတီနက်ဇ်ကတော့ တန်ဟက်ဂ်ရဲ့ ကစားဟန်နဲ့ ပိုမိုကိုက်ညီမယ်လို့ ထင်ပါတယ်”ဟု ပေါလ်စခိုးလ်က ပြောကြားခဲ့သည်။
အသက် ၂၅ နှစ်အရွယ်ရှိ လော်တာရိုမာတီနက်ဇ်သည် ၂၀၂၀-၂၁ စီးရီးအေချန်ပီယံ အင်တာမီလန်အသင်း၏ တိုက်စစ်ပိုင်းတွင် လူကာကူနှင့်အတူ တွဲဖက်ညီစွာခြေစွမ်းပြနိုင်ခဲ့သူဖြစ်သည်။ ၎င်းသည် ပြီးခဲ့သည့်နွေရာသီအပြောင်းအရွှေ့ကာလတွင် ချယ်လ် ဆီးနှင့် အင်တာမီလန်တွင် လက်တွဲခဲ့ဖူးသည့် နည်းပြ ကွန်တီ ကိုင်တွယ်နေသည့် စပါးအသင်းတို့၏ စိတ်ဝင်စားခြင်းကို ခံခဲ့ရသော်လည်း အင်တာမီလန်အသင်းတွင် ဆက်နေခဲ့ခြင်းဖြစ်သည်။ လော်တာရိုမာတီနက်ဇ်သည် ယခုရာသီတွင် အင်တာမီလန်အသင်းအတွက် ပြိုင်ပွဲစုံ ၃၇ ပွဲကစားထားပြီး ၁၇ ဂိုးသွင်းယူပေးထားသည်။
လော်တာရိုမာတီနက်ဇ်သည် အင်တာမီလန်အသင်းနှင့် ၂၀၂၆ ခုနှစ်အထိ သက်တမ်းရှိ စာချုပ်တစ်ရပ် ချုပ်ဆိုထားသူ ဖြစ်သည်။ ထို့ပြင် အင်တာမီလန်အသင်းသည် ယခုရာသီကုန်တွင် ချယ်လ်ဆီးအသင်းမှ အငှားခေါ်ယူထားသည့် ဘယ်လ်ဂျီယံတိုက်စစ်မှူး လူကာကူကို ပြန်ပို့မည်ဖြစ်ရာ လော်တာရိုမာတီနက်ဇ်ကို လွယ်လွယ်ကူကူ လက်လွှတ်ခံဖွယ်မရှိကြောင်း သိရသည်။ မန်ယူနိုက်တက်အသင်းအနေဖြင့် ၎င်းကို ခေါ်ယူမည်ဆိုပါက ဟာရီကိန်း၊ အိုဆင်မန်တို့ကဲ့သို့ ငွေကြေးများစွာ အသုံးပြုရဖွယ်ရှိနေကြောင်း သိရသည်။
