လီဗာပူး မန်နေဂျာ ယာဂန်ကလော့က သူဟာ မီခေးအာတီတာရဲ့ အာဆင်နယ် squad ကို တကယ် နှစ်သက်တယ်လို့ ဆိုလိုက်ပါတယ်။ ပရီးမီးယားလိဂ် ချန်ပီယံဟာ ပြီးခဲ့တဲ့ တနင်္လာနေ့က အာဆင်နယ်ကို အန်ဖီးမှာ ၃-၁ နဲ့ နိုင် ခဲ့ပြီး ယနေ့ညမှာလည်း ကာရာဘောင် ဖလား ပြိုင်ပွဲ စတုတ္ထအဆင့်ကို အန်ဖီးမှာပဲ ရင်ဆိုင် ကစားရအုံးမှာ ဖြစ်ပါတယ်။
လီဗာပူးဟာ ပြီးခဲ့တဲ့ ၁၈ လ အတွင်း အင်္ဂလန် မှာ လွှမ်းမိုး ထားနိုင်ခဲ့တဲ့ အသင်း တစ်သင်း ဖြစ်ပြီး ပြီးခဲ့တဲ့ ရာသီက ပရီးမီးယားလိဂ် ဖလားကို အမှတ်အပြတ်နဲ့ ဗိုလ်စွဲ နိုင်ခဲ့ပါတယ်။ အာဆင်နယ် အသင်း ကလည်း ပြီးခဲ့တဲ့ ဒီဇင်ဘာလက အူနိုင်းအမ်မရီရဲ့ နေရာမှာ အစားဝင် လာခဲ့တဲ့ နည်းပြ အာတီတာရဲ့ လက်အောက်မှာ တောက်လျှောက် တိုးတက်မှု ရှိနေ ခဲ့ပြီး ပြီးခဲ့တဲ့ ရာသီက အက်ဖ်အေဖလား ဆွတ်ခူး နိုင်ခဲ့ပါတယ်။
ဒါ့အပြင် အာဆင်နယ်ဟာ ဒီရာသီ အစမှာ ကစားခဲ့တဲ့ ကွန်မြူနတီဒိုင်း မှာလည်း လီဗာပူးကို ပင်နယ်တီ အဆုံးအဖြတ်နဲ့ အနိုင်ယူ ဗိုလ်စွဲ ခဲ့ပြီး လီဗာပူး နဲ့ မတွေ့မီ ပရီးမီးယားလိဂ် အဖွင့်ပွဲစဉ် ၂ ပွဲစလုံးကို အနိုင် ရထားခဲ့တဲ့ အသင်းလည်း ဖြစ်ပါတယ်။
ယနေ့ည အာဆင်နယ် နဲ့ ရင်ဆိုင် ရမယ့် ကာရာဘောင် ဖလား ပွဲစဉ် မတိုင်မီ ယာဂန်ကလော့က “ဒီနေ့ည အာဆင်နယ်နဲ့ ရင်ဆိုင် ကစားရမယ့် ပွဲစဉ်ဟာ အရမ်းကို ခက်ခဲ ပါလိမ့်မယ်။ မတရား ခက်ခဲမှာပါ။ အာဆင်နယ် ပရိတ်သတ် တစ်ဦးလို ပြောတာ မဟုတ်ပေမယ့်လည်း ကျွန်တော် သူတို့ရဲ့ လူစာရင်းကို တကယ် နှစ်သက်ပါတယ်။ သူတို့ ဒီအချိန်မှာ လုပ်ပြ နေတာတွေကို ကျွန်တော် နှစ်သက်ပါတယ်။
ဒါပေမယ့် ကျွန်တော့် အနေနဲ့ ကိုယ့်အသင်းကို ပိုကြိုက်ပါတယ်။ ကျွန်တော်တို့ လုပ်ပြ နေတာတွေကိုလည်း နှစ်သက်ပါတယ်။ ကျွန်တော်တို့ ရပ်တည် နေတဲ့ အနေအထား နဲ့ ကျွန်တော်တို့ရဲ့ အလုပ် ကြိုးစားပုံကို နှစ်သက်ပါတယ်။ ကျွန်တော်တို့ ပွဲတစ်ပွဲကို နှိမ့်ချတဲ့ စိတ်ထားနဲ့ ချည်းကပ်ပုံတွေ ကြုံတွေ့ လာရတဲ့ အခိုက်အတန့် တိုင်းမှာ ကျွန်တော်တို့ရဲ့ ပိုကောင်းလာတဲ့ အားထုတ်မှု တွေကို သဘောကျပါတယ်။” လို့ ဆိုသွား ပါတယ်။
ယာဂန်ကလော့က သူဟာ အက်ဖ်အေဖလား ၊ ကာရာဘောင် ဖလား ပြိုင်ပွဲတွေမှာ လူအပြောင်းအလဲတွေ လုပ်လေ့ ရှိပေမယ့်လည်း ဒါဟာ ဒီပြိုင်ပွဲ တွေကို သူ့ရဲ့ အဓိက ဦးစားပေး အဖြစ် မသတ်မှတ် ထားတာ မဟုတ်ကြောင်း ဝန်ခံ ခဲ့ပါတယ်။ ကလော့ဟာ ပြီးခဲ့တဲ့ ရာသီက အာဆင်နယ် နဲ့ တွေ့ဆုံခဲ့တဲ့ ကာရာဘောင်ဖလား စတုတ္ထအဆင့် ပွဲစဉ် မှာလည်း စီနီယာ ကစားသမား အများအပြားကို အနားပေးကာ လူငယ် ကြယ်ပွင့်တွေကို အသုံးပြု သွားခဲ့ပြီး အဆိုပါ ပွဲမှာ the Reds တို့ဟာ အာဆင်နယ်နဲ့ မိနစ် ကိုးဆယ် အတွင်း ၅ ဂိုးစီ သရေကျကာ ပင်နယ်တီ အဆုံးအဖြတ်မှာ အနိုင်ရ ခဲ့ပါတယ်။
ကလော့က “ပြီးခဲ့တဲ့ ရာသီ ဒီပြိုင်ပွဲမှာ ကျွန်တော်တို့ဟာ နှစ်ပေါင်း များစွာ ပြောစမတ် တွင်နေမယ့် ပွဲတစ်ပွဲကို ဖန်တီး နိုင်ခဲ့ပါတယ်။ ကိုယ့်ရဲ့ အသင်းဟာ ဒီလို ပေးဂိုးတွေ အများကြီး ရှိသွားတဲ့ အခါမှာ နည်းပြ တစ်ဦး အနေနဲ့ စိတ်ပျက်လက်ပျက် ဖြစ်လေ့ ရှိတယ် ဆိုတာ ကျွန်တော် သိပါတယ်။ ဒါပေမယ့် အဲဒီည မှာတော့ ကျွန်တော့် ကောင်လေးတွေရဲ့ စွမ်းဆောင်ရည်ကို နှစ်သက် မိပါတယ်။ ကျွန်တော်တို့ ထုတ်သုံး ခဲ့တဲ့ စွမ်းရည် နဲ့ ကြိုးစားမှု တွေကို ကျွန်တော် သဘောကျ ခဲ့ပါတယ်။
ကျွန်တော့်မှာ ပွဲစဉ်တိုင်း အတွက် ကစားသမားကောင်း အယောက် ၂၀ ကျော် ရှိပါတယ်။ အရေးကြီးတာက အခြေအနေ နဲ့ လူစာရင်းကို manage လုပ်သွားနိုင်ဖို့ ပါပဲ။ ဒါပေမယ့် ဘောလုံးရဲ့ စည်းမျဉ်း အရ ကျွန်တော် တစ်ပွဲကို လူ ၁၁ ယောက်သာ ရွေးချယ်လို့ ရပါတယ်။ ဒီလို အရမ်းကို ကောင်းမွန်တဲ့ ကစားသမား အစုအဖွဲ့ ရှိနေတဲ့ အခါမှာ ဒါဟာ management ရဲ့ အခက်ခဲဆုံး အစိတ်အပိုင်း ပါပဲ။
ကျွန်တော်တို့ ဒီညမှာ အပြောင်းအလဲတွေ လုပ်သွားဖို့ ရှိပါတယ်။ ဒါပေမယ့် တစ်ချို့ ပြိုင်ပွဲတွေဟာ အခြား ပြိုင်ပွဲတွေထက် ပိုမို အရေးကြီးတယ် ဆိုတဲ့ အယူအဆကို ကျွန်တော် မကြိုက်ပါဘူး။ ဒီညပွဲဟာ ကျွန်တော်တို့ အတွက် ဘယ်လောက် အရေးကြီးသလဲ ဆိုတာကို ခင်ဗျားတို့ ယုံနိုင်မှာတောင် မဟုတ်ပါဘူး။ ကျွန်တော်တို့ အစွမ်းကုန် ကစားပြီး အနိုင် ယူသွားချင် ပါတယ်။ ဒါပေမယ့် အခြေအနေ နဲ့ အချိန်အခါ ကိုတော့ လျစ်လျူရှုလို့ မရပါဘူး။” လို့ ပြောလိုက် ပါတယ်။
