ကမ္ဘာ့ဖလားချန်ပီယံဆုရရှိပြီးနောက် အာဂျင်တီးနားအသင်း ပထမဆုံး ပြန်လည်ကစားမည့် ပနားမားအသင်းနှင့် ခြေစမ်းပွဲအတွက် လက်မှတ်ဝယ်ယူရန် ကြိုးပမ်းသူအရေအတွက် ၁ ဒသမ ၅ သန်းကျော်အထိ ရှိကြောင်း သိရသည်။
၂၀၂၂ ကမ္ဘာ့ဖလားပြိုင်ပွဲအပြီး အာဂျင်တီးနားအသင်း၏ ပထမဆုံးပွဲစဉ်ကို မတ် ၂၃ ရက်တွင် အာဂျင်တီးနားနိုင်ငံ၊ ဗျူနိုအေရိစ်မြို့ရှိ ပရိသတ် ၈၃၀၀၀ ဝင်ဆံ့သည့် Monumental Stadium ကွင်း၌ ယှဉ်ပြိုင်ကစားမည်ဖြစ်သည်။ ယင်းပွဲအတွက် လက်မှတ် အားလုံး ရောင်းချထားရပြီဖြစ်ပြီး ဝယ်ယူခွင့် ရရန်ကြိုးပမ်းသူ စုစုပေါင်းမှာ ၁ ဒသမ ၅၅ သန်းအထိရှိကြောင်း သိရသည်။
ထို့ပြင် လက်မှတ်စျေးနှုန်းမှာလည်း အာဂျင်တီးနားပီဆို ၁၂၀၀၀ မှ ၄၉၀၀၀ (ဒေါ်လာ ၅၉ မှ ၂၄၁) အထိ သတ်မှတ်ထားပြီး ငွေကြေးဖောင်းပွမှု ရင်ဆိုင်နေရသည့် အာဂျင်တီးနားအတွက် အလွန်မြင့်မားသော နှုန်းထားဖြစ်သော်လည်း ဝယ်လိုအား မြင့်တက်နေခြင်းဖြစ်သည်။
ယင်းပွဲမှာ ကွန်ကာကပ်ဖ်ဇုန်မှ ပနားမားအသင်း နှင့် ခြေစမ်းပွဲဖြစ်သော်လည်း ကမ္ဘာတစ်ဝန်းမှ လာရောက်သတင်းရယူရန် လျှောက်ထားသည့် မီဒီယာသမားအရေအတွက်မှာလည်း ၁၃၁၀၀၀ ကျော်အထိရှိကြောင်း အာဂျင်တီးနားဘောလုံးအဖွဲ့ချုပ် (AFA) ဥက္ကဋ္ဌ တာပီယာက အတည်ပြုပြောကြားသည်။
အာဂျင်တီးနားအသင်းသည် ပနားမား နှင့်ပွဲအပြီး မတ် ၂၈ ရက်တွင် ဆန်တီယာဂို မြို့၌ ကူရာရှာအိုအသင်းနှင့် ထပ်မံခြေစမ်းကစားမည်ဖြစ်သည်။ ခြေစမ်းပွဲနှစ်ပွဲအတွက် အသင်းခေါင်းဆောင် မက်ဆီအပါအဝင် ကစားသမား ၃၄ ဦးရွေးချယ်ထားသည်။
