အာဆင်နယ်အသင်း၏ အားကစားဒါရိုက်တာ အီဒူးက လက်ရှိအချိန်မှာ အသင်း၏အနာဂတ်အတွက် အခြေခခံအုတ်မြစ်ကို တည်ဆောက်နေဆဲအချိန်ဖြစ်၍ ပရိသတ်များအနေဖြင့် စိတ်ရှည်သည်းခံမှုရှိစွာဖြင့် စောင့်ကြည့်ရန်လိုအပ်ကြောင်း ပြောကြားခဲ့သည်။
ပြီးခဲ့သည့် နွေရာသီအပြောင်းအရွှေ့ကာလအတွင်း အာဆင်နယ်အသင်းသည် ဥရောပတွင် ငွေကြေးအများဆုံးသုံးစွဲသည့် အသင်းအဖြစ် ပေါင်သန်း (၁၅၀)ဝန်းကျင်အကုန်ခံကာ ကစားသမားသစ်များကိုခေါ်ယူဖြည့်တင်းခဲ့သည်။
သို့သော် အာဆင်နယ်အသင်း ခေါ်ယူခဲ့သည့် ကစားသမားသစ် (၆)ဦးမှာ ပေးရသောပြောင်းရွှေ့ကြေးများနှင့် ထိုက်တန်မှုမရှိဟု ဝေဖန်သုံးသပ်မှုများရှိခဲ့ပြီး အီဒူး၏ ကစားသမားသစ်ဖြည့်တင်းမှုအပေါ် အာဆင်နယ်ပရိသတ်များကလည်း သံသယစိတ်ဖြင့် ဝေဖန်ခဲ့ကြသည်။
အီဒူးက ယင်းဝေဖန်မှုများကို ပြန်လည်တုံ့ပြန်ခဲ့ခြင်းဖြစ်သည်။
Sky Sports သတင်းဌာနနှင့်တွေ့ဆုံရာ တွင် ၎င်းက ”ကျွန်တော်တို့ခေါ်ယူခဲ့တဲ့ ကစားသမားတွေက အသက် (၂၃)နှစ်အောက် ကစားသမားတွေဖြစ်ပါတယ်။ ဒါကရေရှည်အတွက် ကျွန်တော်တို့ ဘယ်လောက်အထိ အစီအစဉ်ဆွဲထားသလဲဆိုတာ သိသာစေပါတယ်။ ပုံမှန်အားဖြင့်တော့ ပရိသတ်တွေက အပြောင်းအရွှေ့တစ်ရာသီတည်းအတွက် ကြည့်ကြပါတယ်။ ကျွန်တော်ကတော့ ပိုမိုကြီးမားတဲ့ ပုံရိပ်တွေကို တွေ့မြင်ရလိမ့်မယ်လို့ပဲ ပြောချင်ပါတယ်” ဟု ဆိုခဲ့သည်။
