မန်စီးတီးနည်းပြ ဂွါဒီယိုလာက အသင်းတိုက်စစ်မှူး အဂွဲရိုးအနေဖြင့် (၂)လခန့် အနားယူရဖွယ်ရှိနေကြောင်း ပြောကြားခဲ့သည်။
အသက် (၃၂)နှစ်အရွယ်ရှိ အဂွဲရိုးသည် ဇွန်လ (၂၂)ရက်က ကစားခဲ့သည့် ဘန်လေအသင်းနှင့် ပရီးမီးယားလိဂ်ပွဲစဉ်တွင် ဒူးဒဏ်ရာရရှိခဲ့ပြီး ပြီးခဲ့သည့် ၂၀၁၉-၂၀ ရာသီသိမ်းပွဲစဉ်များကို လွဲချော်ခဲ့သလို၊ သြဂုတ်လတွင် ကစားခဲ့သည့် ချန်ပီယံလိဂ်ပွဲစဉ်များကိုပါ လွဲချော်ခဲ့သည်။
အဂွဲရိုးအနေဖြင့် အဆိုပါဒဏ်ရာကြောင့် ကြံ့ခိုင်မှုပြည့်ဝရန် ရုန်းကန်နေရဆဲဖြစ်ပြီး (၂)လခန့် ထပ်မံအနားယူရဖွယ်ရှိနေကြောင်း ဂွါဒီယိုလာက ပြောကြားခဲ့သည်။
ဂွါဒီယိုလာက “ဒဏ်ရာတွေက ခက်ခဲတယ်ဆိုတာကို ကျွန်တော်တို့ သိပါတယ်။ အဂွဲရိုးဟာ အသင်းနဲ့အတူ လေ့ကျင့်ခန်းတောင် တစ်ကြိမ်မှ မဆင်းနိုင်သေးပါဘူး။ သူက ဒဏ်ရာကနေ အလျင်အမြန်ပြန်ကောင်းတတ်တဲ့ ကစားသမားမျိုး မဟုတ်ပါဘူး။ သူ အနားယူနေတာ ကြာပါပြီ။ ဒါပေမဲ့ နောက်ထပ် (၁)လ၊ (၂)လလောက် အနားယူရဦးမယ် ထင်ပါတယ်”ဟု ပြောကြားခဲ့သည်။
အဂွဲရိုးသည် ပြီးခဲ့သည့် ၂၀၁၉-၂၀ ရာသီတွင် ဒဏ်ရာပြဿနာများဖြင့် ရုန်းကန်ခဲ့ရပြီး ပြိုင်ပွဲစုံ (၃၂)ပွဲသာ ပါဝင်ကစားနိုင်ခဲ့သော်လည်း (၂၃)ဂိုးအထိ သွင်းယူနိုင်ခဲ့သည်။
မန်စီးတီးအသင်းသည် အဂွဲရိုး၏နေရာတွင် အစားထိုးရန်အတွက် တိုက်စစ်မှူးတစ်ဦး ခေါ်ယူသွားဖွယ်ရှိနေကြောင်း ဗြိတိန်မီဒီယာများက ဖော်ပြနေကြသည်။
