မနေ့ညက ကစားသည့်ပွဲတွင် မန်စီးတီးသည် အဝေးကွင်းတွင် ဆောက်သမ်တန်ကို ၁-၄ ဖြင့်အနိုင်ရရှိခဲ့သည်။ ထိုပွဲတွင် ဟာလန်းက ပွဲချိန် ၄၅ မိနစ်နှင့် ၆၈ မိနစ်တို့တွင် နှစ်ဂိုးသွင်းယူခဲ့သည်။ မန်စီးတီးအတွက် အခြားဂိုးများကို ပွဲချိန် ၅၆ မိနစ်တွင် ဂရီးလစ်ရှ်နှင့် ပွဲချိန် ၇၅ မိနစ်တွင် အယ်လ်ဗာရက်ဇ်တို့က သွင်းယူခဲ့ခြင်းဖြစ်သည်။
ဟာလန်းသည် စနေနေ့က ပွဲအပြီးတွင် မန်စီးတီးအတွက် ပထမဆုံးစတင်ကစားသော လက်ရှိဘောလုံး ရာသီတွင် ပြိုင်ပွဲစုံ ၄၄ ဂိုးအထိသွင်းယူပေးနိုင်ခဲ့ပြီဖြစ်ပြီး မန်စီးတီးသည် ပရီးမီးယားလိဂ်တန်းစီဇယားတွင် အဆင့် ၁ နေရာတွင် ရပ်တည်နေသော အာဆင်နယ်နှင့် ၅ မှတ်အကွာတွင် ရပ်တည်နေသည်။ အာဆင်နယ်သည် ယနေ့ညတွင် လီဗာပူးအသင်းနှင့် ကစားရန် ရှိနေသည်။
၄၄ ဂိုးသွင်းယူပြီးနောက် ဟာလန်းသည် ဗန်နစ်စ်တဲလ်ရွိုင်း (၂၀၀၂-၀၃)၊ ဆာလာ (၂၀၁၇-၁၈) တို့နှင့်အပြိုင် ဘောလုံးရာသီတစ်ရာသီအတွင်းတွင် ပြိုင်ပွဲစုံသွင်းဂိုးအများဆုံးသွင်းသော ကစားသမားအဖြစ် ရပ်တည်နေသည်။ ထို့ပြင် ဟာလန်းသည် လိဂ်သွင်းဂိုး ၃၀ သွင်းယူထားပြီး ဂွာဒီယိုလာက နော်ဝေတိုက်စစ်မှူးသည် ဘောလုံးလောက၏ Goat နှစ်ဦးဖြစ်သော ရော်နယ်ဒို မက်ဆီတို့နှင့် အဆင့်တူနေပြီဖြစ်ကြောင်း ချီးကျူးပြောဆိုလိုက်သည်။
“ဟာလန်းရဲ့ဒုတိယမြောက်သွင်းဂိုးက အံ့အားသင့်စရာဖြစ်ပါတယ်။ ဘောလုံးကို လေထဲမှာ ဖမ်းထိန်းပြီး သူလုပ်ပြသလို လုပ်ပြနိုင်ဖို့ဆိုတာမလွယ်ပါဘူး။ ကမ္ဘာ့ဘောလုံးလောကအနေနဲ့ အကောင်းဆုံး တိုက်စစ်မှူးနှစ်ဦးဖြစ်တဲ့ ရော်နယ်ဒိုနဲ့ မက်ဆီတို့ရဲ့ခေတ်ကို ၁၀ စုနှစ်တစ်ခုကျော် ဖြတ်သန်းပြီးသွားပါပြီ။ ဟာလန်းက ရော်နယ်ဒို မက်ဆီတို့နဲ့ အဆင့်တူဖြစ်နေပြီလို့ ဆိုရမှာ ဖြစ်ပါတယ်။ သူက သွင်းဂိုးတွေ အများကြီးလည်း သွင်းယူနိုင်တယ်”ဟု ဂွာဒီယိုလာက ချီးမွမ်းပြောဆိုလိုက်သည်။
