စပိန်အသင်း၏ဝါရင့်နောက်ခံလူ ရာမို့စ်က စပိန်(၄-၀)ယူကရိန်းပွဲတွင် လက်ရွေးစင်အဆင့်ပွဲစဉ်များ၌ သွင်းဂိုးအများဆုံးနောက်ခံလူအဖြစ် မှတ်တမ်းသစ်ရယူနိုင်ခဲ့ ကြောင်း သိရသည်။
ယင်းပွဲတွင် ဦးဆောင်ဂိုး(၂)ဂိုး စတင်သွင်းယူခဲ့သည့် စပိန်အသင်းခေါင်းဆောင် နောက်ခံလူ ရာမို့စ်သည် လက်ရွေးစင်အသင်းအတွက် သွင်းဂိုး(၂၃)ဂိုး ရှိသွားခဲ့ပြီး အာဂျင်တီးနားနောက်ခံလူ ပါဆာရဲလား၏ စံချိန်ကို ကျော်ဖြတ်နိုင်ခဲ့သည်။
ပါဆာရဲလားသည် အာဂျင်တီးနားလက်ရွေးစင်အသင်းအတွက် (၂၂)ဂိုးသွင်းယူကာ လက်ရွေးစင်အဆင့်ပွဲစဉ်များ၌ ဂိုးသွင်းအများဆုံးနောက်ခံလူအဖြစ် ရပ်တည်နေခဲ့ခြင်းဖြစ်သည်။
ရာမို့စ်သည် နိုင်ငံလက်ရွေးစင်အသင်းအတွက် ဂိုးအများဆုံးသွင်းယူနိုင်သည့် နောက်ခံလူအဖြစ် မှတ်တမ်းဝင်ခဲ့ရုံသာမက စပိန်လက်ရွေးစင်အသင်း၏ သမိုင်းတစ်လျှောက် သွင်းဂိုးအများဆုံး ကစားသမား(၁၀)ဦးစာရင်းတွင်လည်း ပါဝင်လာခဲ့သည်။
ယင်းစာရင်းကို တိုက်စစ်မှူးများဖြစ်သည့် ဒေးဗစ်ဗီလာက (၅၉)ဂိုး၊ ရာအူးလ်က (၄၄)ဂိုး၊ တောရက်စ်က (၃၈)ဂိုးဖြင့် ဦး ဆောင်နေပြီး ရာမို့စ်က ဒီစတီဖာနိုနှင့်အတူ အဆင့်(၈)နေရာ၌ ပူးတွဲရပ်တည်နိုင်ခဲ့ခြင်းဖြစ်သည်။
စပိန်အသင်း၏ ပွဲအများဆုံးကစားသမားစံချိန်ကို ရရှိထားပြီးဖြစ်သည့် ရာမို့စ်အနေဖြင့် သွင်းဂိုးအများဆုံးစာရင်းတွင် အဆင့်(၅)နေရာအထိ တက်လှမ်းနိုင်မည့် အလားအလာရှိနေသည်။
