မန်ယူအသင်းအနေဖြင့် လာမည့်အပြောင်းအရွှေ့ကာလနှစ်ခုအတွင်း အနည်းဆုံး ကစားသမား (၁၀)ဦးအထိ ရှင်းထုတ်ရန် စီစဉ်ထားကြောင်း ဗြိတိန်သတင်းဌာနများက ဖော်ပြခဲ့သည်။
မန်ယူအသင်းနည်းပြ အဲရစ်တန်ဟက်ဂ်သည် ယခုနွေရာသီတွင် ဒီဟေးယား၊ ဖရက်ဒ်၊ ဒင်းန်ဟန်ဒါဆန်၊ အယ်လန်ဂါ စသည့် ကြယ်ပွင့်ကစားသမားများကို ရှင်းထုတ်ခဲ့ပြီးနောက် လာမည့်အပြောင်းအရွှေ့ကာလနှစ်ခုအတွင်း ကစားသမားများ ထပ်မံရှင်းထုတ်ရန် စီစဉ်နေခြင်း ဖြစ်ကြောင်း သိရသည်။
Manchester Evening News သတင်းစာ၏ဖော်ပြမှုကို Daily Mail သတင်းဌာနက ပြန်လည်ကိုးကားဖော်ပြမှုအရ အဲရစ်တန်ဟက်ဂ်အနေဖြင့် လာမည့် (၁၂) လအတွင်း အသင်း၏လူစာရင်းကို ပြန်လည်တည်ဆောက်ရန် ပြင်ဆင်ထားပြီး အနည်းဆုံးကစားသမား (၁၀) ဦးနှင့်အထက် ရှင်းထုတ်ခံရဖွယ်ရှိနေခြင်း ဖြစ်သည်။
၎င်းတို့အနက် တန်ဟက်ဂ်နှင့် ဆက်ဆံရေးအဆင်မပြေဖြစ်နေသည့် တောင်ပံကစားသမား ဆန်ချို၊ နောက်ခံလူ ဗာရန်းနှင့် ဒဏ်ရာကြောင့် ရုန်းကန်နေရသည့် ကွင်းလယ်လူ ဗန်ဒယ်ဘိခ်တို့မှာ ဇန်နဝါရီအပြောင်းအရွှေ့မှာပင် ထွက်ခွာရဖွယ်ရှိနေသည်။
ဇန်နဝါရီတွင် အသက် (၃၆) နှစ်ပြည့်မည့် ၀ါရင့်နောက်ခံလူ အီဗန်စ်မှာလည်း လာမည့်နှစ်တွင် စာချုပ်သစ် ထပ်မံချုပ်ဆိုခံရရန် မလွယ်ကူကြောင်း သုံးသပ်ထားသည်။
ဖီအိုရင်တီးနားအသင်းမှ အငှားဖြင့် ခေါ်ယူထားသည့် ကွင်းလယ်လူ အမ်ရာဘတ်မှာ အပြီးသတ်ခေါ်ယူခွင့်ရှိသော်လည်း ပုံမှန်ခြေစွမ်းပြသနိုင်ရန် လိုအပ်နေကြောင်း သိရသည်။ ထို့ပြင် အသက်အရွယ်ရလာပြီဖြစ်သည့် ကွင်းလယ်လူ ကက်စီမီရိုနှင့် အဲရစ်ဆင် တို့အတွက် ကမ်းလှမ်းမှုရရှိပါက လက်ခံစဉ်းစားဖွယ်ရှိနေကြောင်း သိရသည်။
တိုက်စစ်ကစားသမားများအနက် စာချုပ်နောက်ဆုံးနှစ်သို့ ရောက်ရှိနေပြီဖြစ်သည့် မာစီယဲလ်မှာ နွေရာသီတွင် လမ်းခွဲရဖွယ်ရှိနေသည်။ မာစီယဲလ်အနေဖြင့် မန်ယူအသင်း၌ (၉)ရာသီမြောက် ကစားနေခြင်းဖြစ်သော်လည်း ဦးစားပေးအဖြစ် သတ်မှတ်ခံရခြင်းမရှိသလို ဟွိုင်လန်းရောက်ရှိလာသဖြင့် လမ်းခွဲရရန် နီးစပ်နေခြင်းဖြစ်သည်။
ထို့ပြင် မန်ယူအသင်းအနေဖြင့် ယခုရာသီတွင် ဂိုးသွင်းနှုန်းနည်းနေပြီး ပရီးမီးယားလိဂ်ပြိုင်ပွဲ၌ (၁၂) ပွဲအပြီးတွင် (၁၃) ဂိုးသာ သွင်းယူထားနိုင်ကာ ပဲလေ့စ် (၁၂ ဂိုး)၊ ဘုန်းမောက် (၁၁ ဂိုး)၊ ဖူလ်ဟမ်၊ လူတန်၊ ရှက်ဖီးယူနိုက်တက် (၁၀ ဂိုး)၊ ဘန်လေ (၉ ဂိုး) တို့ပြီးလျှင် သွင်းဂိုးအနည်းဆုံးဖြစ်နေသည်။
တိုက်စစ်ကစားသမားများအနက် ဟွိုင်လန်းက ပြိုင်ပွဲစုံသွင်းဂိုး (၅)ဂိုးဖြင့် အများဆုံးသွင်းထားကြောင်း သိရသည်။
