မန်ယူနည်းပြ တန်ဟက်ဂ်က မိမိတို့အသင်းအနေဖြင့် လာမည့်နွေရာသီအပြောင်းအရွှေ့ကာလတွင် ထူးချွန်ပြောင်မြောက်သည့် ကစားသမားများ ခေါ်ယူရမည်ဖြစ်ကြောင်း ပြောကြားခဲ့သည်။
တန်ဟက်ဂ်သည် ပြီးခဲ့သည့် နွေကမှ မန်ယူအသင်းကို စတင်ကိုင်တွယ်ခဲ့သော်လည်း လိဂ်ဖလား ရယူ နိုင်ခဲ့သလို၊ FA ဖလားတွင် ဆီမီးဖိုင်နယ်၊ ယူရိုပါလိဂ်ဖလားတွင် ကွာတားဖိုင်နယ်အထိ ရောက်ရှိအောင် စွမ်းဆောင်ပေးထားသည်။
သို့သော် မန်ယူအသင်းသည် ယခုရာသီတွင်တိုက်စစ်ပိုင်းပြဿနာနှင့် ရင်ဆိုင်နေရပြီး လာမည့်နွေတွင် အသင်း၏တိုက်စစ်ပိုင်းကို အဓိကအားဖြည့်သွားရန် ပြင်ဆင်နေကြောင်း သိရှိရသည်။
မန်ယူအသင်းသည် လာမည့်နွေတွင် စပါးတိုက်စစ်မှူး ဟာရီကိန်းကို အဓိကပစ်မှတ်အဖြစ် ခေါ်ယူရန် စီစဉ်နေကြောင်းလည်း သိရှိရသည်။
တန်ဟက်ဂ်က “ရာသီမစခင်ကတည်းက မန်ယူအသင်းမှာ ထူးချွန် ပြောင်မြောက်တဲ့ ကစားသမားတွေ လိုအပ်နေတယ်ဆိုတာကို ကျွန်တော်တို့အားလုံး သိပြီးသားပါ။ ကစားသမားတွေ ဒဏ်ရာပြဿနာတွေနဲ့ ရင်ဆိုင်ရတဲ့ အစားထိုးဖို့ လူသစ်တွေလိုပါတယ်။ အထူးသဖြင့် ပြိုင်ပွဲအားလုံး ယှဉ်ပြိုင်ချင်တယ်ဆိုရင်ပေါ့” ဟုပြော ကြားခဲ့သည်။
မန်ယူအသင်းသည် ဘိုင်ယန်နောက်ခံလူ ပါဗာကိုလည်း ခေါ်ယူရန် ပစ်မှတ်ထားနေသည်။
