ဥရောပဘောလုံးအဖွဲ့ချုပ် (UEFA) ၏ ဆုကြေးခွဲဝေပေးအပ်မှုအရ အကြိုအဆင့်မှစ၍ ဗိုလ်လုပွဲအထိ အဆင့်အလိုက် ဆုကြေးများသတ်မှတ်ထားကြောင်း သိရသည်။
၂၀၁၉-၂၀၂၀ ရာသီ ယူရိုပါ လိဂ်ပြိုင်ပွဲတွင် ချန်ပီယံဆုဆွတ်ခူး ရရှိခဲ့သည့် ဆီဗီလာအသင်းသည် ဆုကြေး ယူရို ၂၀ ဒသမ ၇၇ သန်း ရရှိမည်ဖြစ်ကြောင်း သိရသည်။
ဆီဗီလာအသင်းသည် ယခုပြိုင်ပွဲတွင် အုပ်စု အဆင့်မှ စတင်ယှဉ်ပြိုင်ခဲ့ရပြီး COVID-19 ဖြစ်ပွားမှုကြောင့် ၁၆ သင်း အဆင့်မှ ဆီမီးဖိုင်နယ်အထိ ပုံမှန် နှစ်ကျော့အစား တစ်ကျော့တည်း ကစားရကာ စုစုပေါင်း ၁၂ ပွဲ ယှဉ်ပြိုင်ခဲ့ရသည်။ ဥရောပဘောလုံးအဖွဲ့ချုပ် (UEFA) ၏ ဆုကြေးခွဲဝေပေးအပ်မှုအရ အကြိုအဆင့်မှစ၍ ဗိုလ်လုပွဲအထိ အဆင့်အလိုက် ဆုကြေးများသတ်မှတ်ထားကြောင်း သိရသည်။
အကြိုအဆင့် ယှဉ်ပြိုင်ရလျှင် ယူရို ၂၂၀၀၀၀၊ ခြေစစ်ပွဲပထမအဆင့် ယှဉ်ပြိုင်ရလျှင် ယူရို ၂၄၀၀၀၀၊ ခြေစစ်ပွဲ ဒုတိယအဆင့် ယှဉ်ပြိုင်ရလျှင် ယူရို ၂၆၀၀၀၀၊ ခြေစစ်ပွဲတတိယအဆင့် ယှဉ်ပြိုင်ရလျှင် ယူရို ၂၈၀၀၀၀၊ ခြေစစ်ပွဲ Play-off အဆင့်မှ ထွက်ရလျှင် ယူရိုသုံးသိန်း၊ အုပ်စုအဆင့်၌ ယှဉ်ပြိုင်ခွင့်ရလျှင် ယူရို ၂ ဒသမ ၉၂ သန်း၊ အုပ်စုတွင်း၌ တစ်ပွဲအနိုင်ရလျှင် ယူရို ၅၇၀၀၀၀၊ တစ်ပွဲသရေကျလျှင် ယူရို ၁၉၀၀၀၀၊ အုပ်စု ပထမရလျှင် ယူရိုတစ်သန်း၊ အုပ်စု ဒုတိယရလျှင် ယူရိုငါးသိန်း၊ ၃၂ သင်း အဆင့် တက်ရောက်ခွင့်ရသဖြင့် အပိုဆုကြေး ယူရိုငါးသိန်း၊ ၁၆ သင်း အဆင့်တက်ရောက်လျှင် ယူရို ၁ ဒသမ ၁ သန်း၊ ကွာတားဖိုင်နယ်တက်ရောက်လျှင် ယူရို ၁ ဒသမ ၅ သန်း၊ ဆီမီးဖိုင်နယ်တက်ရောက်လျှင် ယူရို ၂ ဒသမ ၄ သန်း၊ ဒုတိယဆုရလျှင် ယူရို ၄ ဒသမ ၅ သန်းနှင့် ချန်ပီယံဆုရရှိလျှင် ယူရို ၈ ဒသမ ၅ သန်း ပေး အပ်ချီးမြှင့်ကြောင်း သိရသည်။
သို့ဖြစ်ရာ ဆီဗီလာအသင်း သည် အုပ်စုအဆင့်မှ စတင်ယှဉ်ပြိုင်ရသဖြင့် ယူရို ၂ ဒသမ ၉၂ သန်း၊ အုပ်စုတွင်းခြောက်ပွဲအနက် ငါးပွဲ နိုင်၊ တစ်ပွဲရှုံးနိမ့်သဖြင့် ယူရို ၂ ဒသမ ၈၅ သန်း၊ အုုပ်စုပထမရသဖြင့် ယူရို တစ်သန်း၊ ၃၂ သင်းအဆင့်တက် ရောက်ခွင့်ရသဖြင့် အပိုဆုကြေး ယူရိုငါးသိန်း၊ ၁၆ သင်းအဆင့်တက် ရောက်သဖြင့် ယူရို ၁ ဒသမ ၁ သန်း၊ ကွာတားဖိုင်နယ်တက်ရောက်သဖြင့် ယူရို ၁ ဒသမ ၅ သန်း၊ ဆီမီးဖိုင်နယ် တက်ရောက်သဖြင့် ယူရို ၂ ဒသမ ၄ သန်းနှင့် ချန်ပီယံဆုဆွတ်ခူးရရှိ သဖြင့် ယူရို ၈ ဒသမ ၅ သန်း၊ စုစု ပေါင်း ယူရို ၂၀ ဒသမ ၇၇ သန်း ရရှိ ခြင်းဖြစ်သည်။
ယင်းပမာဏမှာ UEFA က ပေးအပ်သည့် ဆုကြေး သီးသန့်ဖြစ်ပြီး ရုပ်သံထုတ်လွှင့်ခွင့်ဝင်ငွေ ထပ်မံရရှိမည်ဖြစ်ကြောင်း သိရသည်။ ဆီဗီလာအသင်းသည် ယူရိုပါလိဂ်ပြိုင်ပွဲ၏ အအောင်မြင်ဆုံးအသင်းဖြစ်ပြီး ဗိုလ်လုပွဲတက်ရောက်သည့် ခြောက်ကြိမ်စလုံး ရာနှုန်းပြည့် ချန်ပီယံဆုဆွတ်ခူးရရှိထားသည်။ ဆီဗီလာအသင်းသည် ၂၀၀၆၊ ၂၀၀၇ ခုနှစ်တွင် နှစ်ကြိမ်ဆက်တိုက်၊ ၂၀၁၄၊ ၂၀၁၅၊ ၂၀၁၆ ခုနှစ်တွင် သုံးကြိမ်ဆက်တိုက်နှင့် ၂၀၂၀ ပြည့်နှစ်တွင် တစ်ကြိမ် ဗိုလ်စွဲထားခြင်းဖြစ်ပြီး အနီးဆုံးပြိုင်ဘက်များဖြစ်သည့် အင်တာမီလန်၊ လီဗာပူးလ်၊ ဂျူဗင်တပ်စ်နှင့် အက်သလက်တီကိုအသင်းတို့ထက် သုံးကြိမ်အသာရထားသည်။
ယူရိုပါလိဂ်ပြိုင်ပွဲမှာ အုပ်စု အဆင့်မှ ဗိုလ်လုပွဲအထိ ပုံမှန်အတိုင်း ကစားရပါက စုစုပေါင်း ၁၅ ပွဲ ယှဉ် ပြိုင်ကစားရသော်လည်း ချန်ပီယံလိဂ်ပြိုင်ပွဲ (၁၃ ပွဲ) နှင့် ဆုကြေးချီးမြှင့် မှု လေးဆနီးပါးကွာဟကြောင်း သိရသည်။ ယခုနှစ် ချန်ပီယံလိဂ်ဗိုလ်လုပွဲ တက်ရောက်သည့်နှစ်သင်းအနက် ဘိုင်ယန်မြူးနစ်အသင်း ဗိုလ်စွဲပါက ယူရို ၈၂ ဒသမ ၄၅ သန်းနှင့် PSG အသင်း ဗိုလ်စွဲပါက ယူရို ၈၀ ဒသမ ၆၅ သန်းအထိ ရရှိမည်ဖြစ်သည်။
