မန်ချက်စတာ ယူနိုက်တက် အသင်းရဲ့ ခံစစ် ကစားသမား တစ်ဦး ဖြစ်ခဲ့ ဖူးတဲ့ ဖီးလ် နဗီးလ် က လက်ရှိ အသင်းမှာ ကွင်းလယ် ကစားသမား ဖြစ်သူ ပေါလ် ပေါ့ဂ်ဘာ ပွဲထွက် ကစားခွင့် တွေကို မရရှိဘူး ဆိုတာဟာ တစ်ကယ့်ကို ကျက်သရေမဲ့တဲ့ ကိစ္စ တစ်ခု ဖြစ်ကြောင်း ထုတ်ဖော် ပြောကြား သွားခဲ့လိုက် ပါတယ် ။
ပြင်သစ် လက်ရွေးစင် အသင်းရဲ့ အားထားရတဲ့ ကွင်းလယ်လူ ပေါလ် ပေါ့ဂ်ဘာဟာ ပြီးခဲ့တဲ့ ရက်ပိုင်း တုန်းက ယူနိုက်တက်တို့ အဲဗာတန် အသင်းကို 3 – 1 ဆိုတဲ့ ရလဒ် နဲ့ အနိုင် ရရှိ ခဲ့တဲ့ ပွဲစဉ် တုန်းက ပွဲထွက်ကစားခွင့် မပိုင်ဆိုင် နိုင်ခဲ့ပဲ လူစားဝင် ကစား သမား အဖြစ်နဲ့သာ ရှိနေ ခဲ့ရ ပါတယ် ။
ပေါ့ဂ်ဘာဟာ နွေတုန်းက ကိုရိုနာ ဗိုင်းရပ်စ် ကူးစက်ခံခဲ့ရသူပဲ ဖြစ်ပါတယ် ။ အဲ့ဒီနောက် ဘောလုံး ရာသီသစ် စတင်တဲ့ အခါမှာ သူဟာ ယူနိုက်တက် အသင်း အတွက် ပွဲထွက် ကစားခွင့် တွေကို ပိုင်ဆိုင် ထားနိုင်ခဲ့ ပေမယ့် အချိန် အကြာကြီး ကစားပေး နိုင်စွမ်း မရှိပဲ မောပမ်း နွမ်းနယ် နေခဲ့ရ ပါတယ် ။
အဲ့ဒီနောက် နိုင်ငံတကာ ပွဲစဉ်တွေ ပြီးဆုံး သွားတဲ့နောက် သူဟာ ယူနိုက်တက် အသင်း အတွက် သုံးပွဲဆက် ပွဲထွက် ကစားခွင့် မပိုင်ဆိုင် နိုင်ခဲ့ပဲ အရံလူ အဖြစ်သာ လူစားဝင် ကစားခွင့် ရရှိခဲ့ ပါတယ် ။ ဒါပေမယ့် RB လက်ပ်ဇစ် အသင်း နဲ့ ပွဲစဉ်မှာ သူဟာ ပွဲထွက်ခွင့် ရရှိခဲ့ပြီး ပုံစံကောင်း ပြသ နိုင်ခဲ့ ပါတယ် ။
ဒါ့ကြောင့် ပေါ့ဂ်ဘာဟာ အရင်လို ပုံစံကောင်း တွေကို ပြန်လည် ပြသတော့မယ်လို့ ထင်မှတ် ခံခဲ့ရ ပါတယ် ။ ဒါပေမယ့် နောက် တစ်ပွဲ အဖြစ် အာဆင်နယ် အသင်းကို ရင်ဆိုင် ခဲ့တဲ့ ပွဲစဉ်မှာတော့ ပေါ့ဂ်ဘာ ရဲ့ ကွင်းအတွင်း စွမ်းဆောင်ရည် တွေက တစ်ကယ့်ကို စိတ်ပျက်ဖွယ်ရာ ကောင်းလွန်းခဲ့ရ ပါတယ် ။
ဒါ့ကြောင့် ယူနိုက်တက်တို့ အဲဗာတန် အသင်းနဲ့ ရင်ဆိုင်ရတဲ့ အရေးကြီး ပွဲစဉ်မှာ ပေါ့ဂ်ဘာဟာ ပွဲထွက်ခွင့် မရရှိပဲ လူစားဝင် ကစားသမား အဖြစ်နဲ့သာ ပါဝင်ခဲ့ရ ပါတယ် ။ ဒါ့ကြောင့် ဖီးလ် နဗီးလ်က ပေါ့ဂ်ဘာလို ကစားသမားမျိုးက ပွဲထွက်ခွင့်တွေ ပျောက်ဆုံး နေတယ် ဆိုတာဟာ ကျက်သရေမဲ့ကြောင်း ပြောကြား ခဲ့လိုက် ပါတယ် ။
ဒါ့အပြင် ဆိုးလ်ရှား အနေနဲ့ အနာဂတ်မှာ ဆုဖလား တွေကို ရယူချင် ပါက ပေါ့ဂ်ဘာကို တစ်ဖန် ပြန်လည် အခွင့်အရေး ပေးရင်း အသုံးပြုရ လိမ့်မယ် လို့ ဖီးလ် နဗီးလ် က သုံးသပ် ပြောကြား သွားခဲ့လိုက် ပါတယ် ။
” ပေါ့ဂ်ဘာဟာ အသင်းမှာ ပွဲထွက် ကစားခွင့် မရရှိနိုင်ဘူး ဆိုတာက တစ်ကယ့်ကို ကျက်သရေမဲ့တယ်လို့ပဲ ကျွန်တော် ထင်ပါတယ် ။ ယူနိုက်တက် အသင်းတို့ အမှတ်ပေး ဖလား ရရှိဖို့ ၊ ပြန်လည် အောင်မြင်ဖို့ ၊ အိုလီ ကစား စေချင်တဲ့ ပုံစံနဲ့ ကစား နိုင်ဖို့ အတွက် အသင်း အနေ နဲ့ ပေါ့ဂ်ဘာကို ပြန်လည် အသုံးပြုရပါ လိမ့်မယ် ”
” ခင်ဗျား တို့ဟာ အသင်းမှာ နီမန်ဂျာ မာတစ် ၊ မက် တော်မီနေး နဲ့ ဖရက်ဒ် တို့ထဲက တစ်ဦးဦးကို ပွဲထွက် ကစားခွင့် ပေးလို့ ရနိုင် ပါတယ် ။ အဲ့တာ ပြီးရင်တော့ ကွင်းလယ်မှာ ပေါ့ဂ်ဘာကို ဘရူနို ဖာနန်ဒက်စ် နဲ့ အတူ တွဲဖက် ကစား စေလို ရနိုင် ပါလိမ့်မယ် ” လို့ ပြောရင်း ကွင်းလယ် ခံစစ်မှာ ပေါ့ဂ်ဘာ စည်းကမ်းရှိစွာ ကစားနိုင် မလားလို့ အမေးခံလိုက် ရတဲ့ အခါ …
” မကစားနိုင်ဘူးလို့ ပြောလို့ ရကောင်း ရနိုင်ပါတယ် ။ ဒါပေမယ့် ကျွန်တော်သာ ဆိုရင် သူ့ကို တိုက်စစ် တက်ရောက်ပြီး ဂိုးတွေ သွင်းယူ နိုင်ဖို့ ၊ ပေါ့ဂ်ဘာကို အသင်းမှာ ထည့်သွင်းပြီး ယူနိုက်တက်တို့ ကစားတဲ့ ပုံစံမျိုး နဲ့ နိုင်ပွဲတွေကို ရယူ နိုင်ဖို့ အတွက် လုပ်ဆောင် သွားမှာပါ ”
” သူဟာ အသင်းမှာ မနေချင်ဘူး ၊ အသင်း ကနေ ထွက်ခွာလို နေတယ် ဆိုတဲ့ အကြောင်းတွေကို ကျွန်တော် ပြောခဲ့ဖူးပါတယ် ။ ဒါပေမယ့် သူဟာ ကမ္ဘာ့ အကောင်းဆုံး ကွင်းလယ် ကစားသမားဖြစ်တယ် ဆိုတာ ကျွန်တော် ယုံကြည်နေဆဲ ပါပဲ ။ ဒါ့ကြောင့်လည်း ‘ ပေါ့ဂ်ဘာ အသင်းမှာ ဘာလို့ မပါရတာလဲ ? ‘ ဆိုတဲ့ အကြောင်း ကျွန်တော် ပြောနေတာပေါ့ဗျာ ” လို့ ဖီးလ် နဗီးလ် က ပြောကြား သွားခဲ့လိုက် ပါတယ် ။
