ရီးယဲလ်မက်ဒရစ်အသင်း၏ ဘယ်လ်ဂျီယံတောင်ပံကစားသမား ဟာဇက် (၂၉ နှစ်)က ယခုရာသီမှာ မိမိကစားသမားဘဝ အညံ့ဆုံးရာသီ ဖြစ်ကြောင်း ပြင်သစ်ရေဒီယို Franceinfo သို့ ဖြေကြားခဲ့သည်။
ဟာဇက်သည် ပြီးခဲ့သည့်နွေရာသီအပြောင်းအရွှေ့က ချယ်လ်ဆီးအသင်းမှ ရီးယဲလ်အသင်းသို့ ယူရိုသန်း (၁၀၀)ဖြင့်ပြောင်းရွှေ့လာသူဖြစ်သည်။
သို့သော် ခြေချင်းဝတ်ဒဏ်ရာအပါအဝင် ဒဏ်ရာပြဿနာများကြောင့် ပုံမှန်ခြေစွမ်းပြရန်ရုန်းကန်ခဲ့ရကာ ပြိုင်ပွဲစုံ (၂၁)ပွဲ ကစားရာတွင် (၁)ဂိုးသာသွင်းယူနိုင်ခဲ့သည်။
ဟာဇက်က ကလပ်အသင်းအနေဖြင့် အမှတ်ပေးချန်ပီယံဆုရယူနိုင်ခဲ့သော်လည်း မိမိကိုယ်တိုင်အတွက်မူ အညံ့ဆုံးရာသီဖြစ်ကြောင်း ဆိုခဲ့ခြင်းဖြစ်သည်။
လက်ရှိအသင်းဖော်များဖြစ်သည့် ဘန်ဇီဗာ၊ ဗာရန်း၊ ဖာလန်းမန်ဒီစသည့်ကစားသမားများကိုလည်း ဟာဇက်က ချီးကျူးခဲ့သည်။
ထို့ပြင် အသင်းနည်းပြ ဇီဒန်းကိုလည်း မာန်မာနထောင်လွှားမှုမရှိသော လူသားတစ်ဦးဟု မှတ်ချက်ပြုခဲ့သည်။
