ဗြိတိန်အစိုးရတာဝန်ရှိသူများသည် လာမည့်မေလ (၁၇)ရက်နေ့မှစတင်၍ နိုင်ငံတစ်ဝန်းရှိ အားကစားပြိုင်ပွဲများ၌ ပရိသတ်များကို ကွင်းအတွင်း ပြန်လည်ကြည့်ရှုရန်ခွင့်ပြုသွားမည်ဖြစ်ကြောင်း သိရှိရသည်။
ဗြိတိန်၏ ကိုရိုနာဗိုင်းရပ်စ် လမ်းပြမြေပုံအရ ရောဂါပိုး အခြေအနေပေါ်မူတည်၍ တစ်ဆင့်ချင်းဖြေလျော့သွားမည်ဖြစ်ရာ ယင်းနေ့မှစတင်၍ ဘောလုံးကွင်းများအတွင်း ပရိသတ်များ အကန့်အသတ်အားဖြင့် ဝင်ကြည့်ခွင့်ရမည်ဖြစ်သည်။
အစိုးရမှထုတ်ပြန်သော သတ်မှတ်ချက်များအရ ရုံတွင်းအားကစားပြိုင်ပွဲများတွင် ပရိသတ်(၁၀၀၀)အထိ (သို့မဟုတ်) ကွင်းဝင်ဆံ့သူဦးရေ၏ ထက်ဝက်ခန့်ကွင်းအတွင်း ဝင်ရောက်ခွင့်ရရှိမည်ဖြစ်ပြီး၊ သာမန် Outdoor အားကစားကွင်းများ၌ ပရိသတ်(၄၀၀၀)အထိ (သို့မဟုတ်)ကွင်းဝင်ဆံ့သူဦးရေ၏ ထက်ဝက်ခန့် ကွင်းအတွင်းဝင်ကြည့်ခွင့်ရမည်ဖြစ်သည်။
လူဦးရေအများအပြားဝင်ဆံ့သည့် ပရီးမီးယားလိဂ်အသင်းများ၏ ကွင်းများတွင်မူ ပရိသတ်(၁၀၀၀၀)ခန့်အထိ(သို့မဟုတ်) ကွင်းဝင်ဆံ့သူဦးရေ၏ (၄)ပုံ၊ (၁)ပုံခန့် ကွင်းအတွင်းကြည့်ခွင့်ရမည် ဖြစ်ကြောင်း သိရှိရသည်။
ဗြိတိန်အစိုးရက မေလ (၁၇)ရက်နေ့မှစ၍ ကွင်းအတွင်း ပရိသတ်များပြန်လည်ကြည့်ရှုခွင့်ပေးသော်လည်း မေလ (၂၃)ရက်နေ့တွင်ကစားမည့် ပရီးမီးယားလိဂ်နောက်ဆုံးပွဲစဉ်တွင်မူ ပရိသတ်များကွင်းအတွင်း ကြည့်ရှုခွင့်ရဖွယ်မရှိကြောင်း ဗြိတိန်သတင်းစာ Daily Mail က ဖော်ပြခဲ့သည်။
ယင်းပွဲစဉ်မှာ အစိုးရက ပြန်လည်ခွင့်ပြုချက်ပေးသည့် မေ (၁၇)ရက်နေ့နောက်ပိုင်း ကစားမည့်ပွဲစဉ်ဖြစ်သော်လည်း မမျှတမှုများ ဖြစ်ပေါ်နိုင်သည့်အတွက် ပရီးမီးယားလိဂ်အဖွဲ့ချုပ်က ပရိသတ်များ ကွင်းအတွင်းဝင်ရောက်ခြင်းကို တားဆီးသွားဖွယ်ရှိကြောင်း သိရှိရသည်။
ယင်းနောက်ဆုံးပွဲစဉ်တွင် ပရီးမီးယားလိဂ်အသင်း (၁၀)သင်းမှာ အိမ်ကွင်းပွဲစဉ်ကစားရမည်ဖြစ်ပြီး ကျန် (၁၀)သင်းမှာ အဝေးကွင်းပွဲစဉ်အဖြစ် ယှဉ်ပြိုင်ရမည်ဖြစ်ရာ ပရိသတ်များ ကွင်းအတွင်းဝင်ခွင့်ပြုပါက အိမ်ရှင်အသင်းများကို အားသာချက်ရရှိစေပြီး ဧည့်သည်အသင်းများအတွက် နစ်နာစေနိုင်ခြင်းကြောင့်
ပရီးမီးယားလိဂ်အဖွဲ့ချုပ်သည် ယင်းပွဲစဉ်၌ ပရိသတ်များ ကွင်းအတွင်းမဝင်စေရန် ကလပ်အသင်းများသို့ ဖိအားပေးညွှန်ကြားဖွယ်ရှိကြောင်း Daily Mail က ဖော်ပြခဲ့သည်။
ယင်းပွဲစဉ်(၃၈)တွင် လီဗာပူးလ်၊ မန်စီးတီး၊ အာဆင်နယ်၊ လက်စတာ၊ လိဒ်စ်၊ ဝက်စ်ဟမ်း၊ ဝုလ်ဗ်၊ ဖူလ်ဟမ်၊ ရှက်ဖီးယူနိုက်တက်၊ ဗီလာအသင်းတို့မှာ အိမ်ကွင်းပွဲစဉ်များအဖြစ် ကစားရမည်ဖြစ်သည်။