ဆော်ဒီဘောလုံးအဖွဲ့ချုပ်သည် နာမည်ကျော် ပေါ်တူဂီနည်းပြ မော်ရင်ဟိုကို လက်ရွေးစင်အသင်းနည်းပြအဖြစ် ခန့်အပ်ရန် တစ်နှစ် ယူရိုသန်း(၆၀)ဖြင့် ကမ်းလှမ်းလိုက်ကြောင်း သိရသည်။
ဆော်ဒီနိုင်ငံသည် ၎င်းတို့၏ ဘောလုံးပုံရိပ်ကို မြှင့်တင်နိုင်ရန် အရှိန်အဟုန်ဖြင့် ကြိုးပမ်းလျက်ရှိပြီး လက်ရှိအချိန်၌ ကမ္ဘာကျော် ဘောလုံးသမား စီရော်နယ်လ်ဒိုကို ဆော်ဒီလိဂ်သို့ ခေါ်ယူထားပြီးဖြစ်သည်။
ထို့နောက် စီရော်နယ်လ်ဒို၏ မဟာပြိုင်ဘက် မက်ဆီကိုလည်း ထပ်မံခေါ်ယူနိုင်ရန် ကြိုးပမ်းလျက်ရှိသည်။ ထို့ပြင် ယခုအခါ မော်ရင်ဟိုကို လက်ရွေးစင်အသင်းနည်းပြအဖြစ် ခန့်အပ်ရန် စီစဉ်နေခြင်းဖြစ်သည်။
မော်ရင်ဟိုသည် ရိုးမားအသင်းနှင့် ၂၀၂၄ ခုနှစ်အထိ စာချုပ်ချုပ်ဆိုထားသော်လည်း ဆော် ဒီဘောလုံးအဖွဲ့ချုပ်၏ မက်မောဖွယ်ကမ်းလှမ်းမှုကြောင့် လက်ခံဖွယ်ရှိကြောင်း သုံးသပ်မှုများရှိနေသည်။
ဆော်ဒီဘောလုံးအဖွဲ့ချုပ်သည် မော်ရင်ဟိုကို တစ်နှစ်လစာ ယူရိုသန်း(၆၀)ဖြင့် (၂)နှစ်စာချုပ်ချုပ်ဆိုရန် ကမ်းလှမ်းထားခြင်းဖြစ်ပြီး တစ်နှစ်ဖြင့် စာချုပ်ဖျက်သိမ်းခွင့်ရှိမည်ဖြစ်သလို၊ ၂၀၂၆ ကမ္ဘာ့ဖလားပြိုင်ပွဲအထိ သက်တမ်းတိုးခွင့်လည်း ရှိမည်ဖြစ်ကြောင်း သိရသည်။
မော်ရင်ဟိုသည် ဆော်ဒီဘောလုံးအဖွဲ့ချုပ်၏ ကမ်းလှမ်းမှုကို လက်ခံခဲ့ပါက ဘောလုံးလောကတွင် လစာအများဆုံးနည်းပြအဖြစ် မှတ်တမ်းဝင်မည် ဖြစ်ကြောင်း သိရသည်။
