အာဆင်နယ် အသင်းဟာ အက်စတွန်ဗီလာ အသင်းကို ပြောင်းရွှေ့သွားတဲ့ ဂိုးသမား မာတီနက်ဇ် နေရာ အစားထိုးဖို့ရာ ပြင်သစ် လီဂူး ကလပ် ဒီဂျွန် ဂိုးသမား အဲလက်စ် ရူနာဆန် (Alex Rúnarsson ) ကို ခေါ်ယူတော့မှာ ဖြစ်ပါတယ် ။
Telegraph ရဲ့ ဖော်ပြချက် အရ ရူနာဆန် ဟာ ဒီနေ့မှာပဲ လန်ဒန်ကို ရောက်ရှိလာပြီး ဆေးစစ်မှု ခံယူ သွားမယ်လို့ သိရပါတယ် ။ အာဆင်နယ် အသင်းဟာ ရူနာဆန် ကို ခေါ်ယူဖို့ ပြောင်းရွှေ့ကြေး ပေါင် ၁.၅ သန်း နဲ့ သဘောတူညီမှု ရရှိခဲ့တာ ဖြစ်ပြီး ငါးနှစ် စာချုပ် ချူပ်သွားမယ်လို့ သိရပါတယ် ။
ရူနာဆန် ဟာ ၂၀၁၈-၁၉ ဘောလုံး ရာသီမှာ ဒိန်းမတ် ကလပ် နောဒ့်ဂျယ်လန်း ကနေ ဒီဂျွန် အသင်းကို ပြောင်းရွှေ့ကြေး ပေါင် ၁.၄၄ သန်း နဲ့ ရောက်ရှိ လာသူပါ ။ ရူနာဆန် ဟာ အိုက်စလန် လက်ရွေးစင် ဂိုးသမား ဖြစ်ပြီး ၂၀၁၈ ကမ္ဘာ့ဖလား လူစာရင်းမှာလည်း ပါဝင်ခဲ့ပါတယ် ။
ရူနာဆန် ဟာ အသက် ၂၅ နှစ် အရွယ် ရှိပြီ ဖြစ်ပြီး နောဒ့်ဂျယ်လန်း အသင်းမှာတုန်းက လက်ရှိ အာဆင်နယ် ဂိုးနည်းပြ အီနာကီ ကာနာ နဲ့ လက်တွဲခဲ့ဖူးပါတယ် ။ ဒါကြောင့် အာဆင်နယ် အသင်းဟာ ရူနာဆန် ကို ခေါ်ယူဖို့ ဂိုးနည်းပြ အီနာကီ ကာနာ ရဲ့ အကြံပြုချက်ကို ရယူခဲ့ဟန် ရှိပါတယ် ။
ရူနာဆန် ဟာ အရပ် ၆ ပေ ၁ လက်မ အထိ ရှိပြီး ညာခြေ အားသန် ဂိုးသမား တစ်ဦးပါ ။ သူ့ရဲ့ အဓိက အားသာချက်တွေကတော့ အဝေးဘော ပေးပို့မှု ၊ တစ်ဦးချင်း ကာကွယ်မှု ၊ အလိုအလျောက် တုန့်ပြန် ကာကွယ်မှုတွေ နဲ့ ဘောလုံး ထိန်းသိမ်းမှုတွေမှာ ကောင်းမွန်သလို ကြိုတင် တွက်ဆနိုင်စွမ်း နဲ့ အာရုံစူးစိုက်မှုကလည်း ကောင်းမွန်တာကို တွေ့ရပါတယ် ။
ဒါပေမယ့်လည်း ရူနာဆန် ဟာ first touch ညံ့ပြီး ၊ အနီးကပ် ကန်ချက်တွေ ၊ ဖြတ်တင်ဘောတွေ ၊ အဝေးကန်ချက်တွေ တားဆီးရာမှာ အားနည်းမှုတွေ ရှိတယ်လို့ Whoscored.com ရဲ့ အချက်အလက်တွေက ဆိုပါတယ် ။
ဒီဂျွန် အသင်းရဲ့ ကင်းထောက်ချုပ် ဆီဘက်စတီယန် လာစီယာ ကတော့ ရူနာဆန် ရဲ့ အရည်အသွေး အပေါ် ” သူ့ရဲ့အချက်အလက် မှတ်တမ်းကို တွေ့လိုက်ရတဲ့ အချိန်မှာပဲ ကျွန်တော်တို့ သူ့ကို စိတ်ဝင်စား သွားခဲ့တာပါ ၊သူက နည်းစနစ်ပိုင်း အရည်အသွေးကောင်းမွန်သလို ရှေ့တက်ကစားဖို့လည်း ကြောက်တဲ့သူ မဟုတ်ပါဘူး ၊ ဘောလုံးလည်း ကိုင်ကစားနိုင်သူပါ ၊ နောက်ပြီး သူက အသင်းသားတွေအပေါ် ဩဇာ လွှမ်းမိုးမှုလည်း ရှိသူပါ ။ ” လို့ ပြောကြား ခဲ့ဖူးပါတယ် ။
ရူနာဆန် ဟာ အာဆင်နယ် ပရိသတ် တစ်ဦး ဖြစ်တယ်လို့ သိရပြီး သူ့ရဲ့ တွစ်တာပိုစ့် အဟောင်းတွေမှာ အာဆင်နယ် ရဲ့ ရလဒ်ပိုင်း နဲ့ ကစားသမား ရောင်းထုတ်မှုတွေကို အားမလို အားမရ ဖြစ်ကာ ဒေါသ ပေါက်ကွဲ ခဲ့တာကို တွေ့ရပါတယ် ။
အာဆင်နယ် အသင်းဟာ ရူနာဆန် ကို ခေါ်ယူပြီးပါကလည်း ဘရန်ဖိုဒ့် ဂိုးသမား ဒေးဗစ် ရာယာ ကို ခေါ်ယူဖို့ ထပ်မံ ကြိုးပမ်း သွားဦးမယ်လို့ သိရပါတယ် ။ အာဆင်နယ် ဟာ ဒေးဗစ်ရာယာ ကို ခေါ်ယူ နိုင်ခဲ့ပါက ဘရန်ဖိုဒ့် အသင်းထံ တစ်ရာသီ အငှား ပြန်ချ ပေးသွားမယ်လို့လည်း သတင်းတွေ ထွက်ပေါ် နေပါတယ် ။
