ဒေါ့မွန်တောင်ပံကစားသမား ဆန်ချိုက မန်ယူအသင်းနှင့် အပြောင်းအရွှေ့သတင်းများ ထွက်ပေါ်ခဲ့ခြင်းက သူ၏ခြေစွမ်းအပေါ် သက်ရောက်မှုမရှိကြောင်း ပြောကြားခဲ့သည်။
အသက် (၂၀)နှစ်အရွယ်ရှိ အင်္ဂလန်တောင်ပံကစားသမား ဆန်ချိုသည် ပြီးခဲ့သည့်နွေရာသီအပြောင်းအရွှေ့ကာလတစ်လျှောက် မန်ယူအသင်းနှင့် အပြောင်းအရွှေ့သတင်းများ ထွက်ပေါ်ခဲ့သူဖြစ်သည်။
သို့သော် မန်ယူအသင်းသည် ဆန်ချိုအတွက် ဒေါ့မွန်အသင်းဘက်က တောင်းဆိုသည့်ကြေးကို ပေးချေနိုင်ခြင်းမရှိသည့်အတွက် ဆန်ချိုမှာ ဒေါ့မွန်အသင်းတွင် ဆက်ရှိနေခြင်းဖြစ်သည်။
ဆန်ချိုသည် ယခုရာသီတွင် ဒေါ့မွန်အသင်း၌ ခြေစွမ်းပြနိုင်ရန် ရုန်းကန်နေပြီး ၎င်းအနေဖြင့် ယင်းသို့ ရုန်းကန်နေရခြင်းမှာ မန်ယူအသင်းနှင့် ထွက်ပေါ်ခဲ့သည့် အပြောင်းအရွှေ့သတင်းများကြောင့် ဖြစ်သည်ဟု အသင်းနည်းပြ လူစီယန်ဖာက ပြောကြားခဲ့သည်။
သို့သော် ဆန်ချိုက “ဒီရာသီမှာ ကျွန်တော် ရုန်းကန်နေရတာ မန်ယူအသင်းနဲ့ ထွက်ပေါ်ခဲ့တဲ့ အပြောင်းအရွှေ့သတင်းတွေကြောင့်လို့ ကျွန်တော် မထင်ပါဘူး။ ကစားသမားတိုင်းမှာ ရုန်းကန်ရတဲ့ အခိုက်အတန့် ရှိတတ်ပြီး အခု ကျွန်တော် အဲဒီအခိုက်အတန့်နဲ့ ကြုံနေရတာပါ။ ကျွန်တော့်အနေနဲ့ ခြေစွမ်းပြနိုင်အောင် အစွမ်းကုန်ကြိုးစားနေပါတယ်”ဟု ပြောကြားခဲ့သည်။
ဆန်ချိုသည် ပြီးခဲ့သည့် ၂၀၁၉-၂၀ ရာသီတွင် ဒေါ့မွန်အသင်းအတွက် ဘွန်ဒစ်လီဂါ (၃၂)ပွဲတွင် (၁၇)ဂိုးအထိ သွင်းယူနိုင်ခဲ့သော်လည်း ယခုရာသီ ဘွန်ဒစ်လီဂါ (၆)ပွဲကစားထားရာတွင် ဂိုးသွင်းယူနိုင်ခြင်းမရှိသေးပေ။
