ပက်ဂွာဒီယိုလာရဲ့ အသင်းဟာ မနေ့ညက ဒီရာသီ ပရီးမီးယားလိဂ်ရဲ့ ပထမဦးဆုံး ရှုံးပွဲကို ကြုံတွေ့ ခဲ့ရကာ ရာသီ အစပိုင်း မှာပဲ လက်ရှိ ချန်ပီယံ လီဗာပူး အသင်းနဲ့ ရမှတ် ၃ မှတ် ကွာဟ သွားခဲ့ပြီ ဖြစ်ပါတယ်။
မန်စီးတီးဟာ မနေ့ညက အီတီဟတ်မှာ လက်စတာကို ဂျေမီဗာဒီရဲ့ ဟက်ထရစ်နဲ့ အတူ ၅ ဂိုး ၂ ဂိုးနဲ့ ဂိုးပြတ် ရှုံးနိမ့် ခဲ့ပြီး ပွဲစဉ် ၂ အပြီးမှာပဲ ရှုံးပွဲ တစ်ပွဲ ကြုံလိုက်ရပြီ ဖြစ်ကာ အဆိုပါ ပွဲစဉ်မှာ စီးတီးရဲ့ ခြေစွမ်း ကလည်း ဝေဖန်စရာ ဖြစ်ခဲ့ပါတယ်။
မာရက်ဇ်က ပွဲချိန် ၄ မိနစ်မှာ စီးတီး အတွက် အဖွင့်ဂိုးကို လှလှပပ ကန်သွင်းယူ ပေးခဲ့ပေမယ့်လည်း ပွဲချိန် ၃၇ မိနစ်မှာ ဗာဒီက ဝေါ်ကာကြောင့် ရခဲ့တဲ့ ပင်နယ်တီ ကနေ တဆင့် ချေပဂိုး ပြန်သွင်း ခဲ့ပါတယ်။
ဒုတိယဂိုး ၅၄ မိနစ်မှာ ကတ်စတန်နီရဲ့ ဖြတ်တင်ဘောကို ဗာဒီကပဲ လှလှပပ ပိတ်သွင်းယူ ခဲ့ပြီး ၅၈ မိနစ်မှာ ဗာဒီကို အဲရစ်ဂါစီယာ ပြစ်ဒဏ် ကျူးလွန် ခဲ့တာကြောင့် စီးတီးတို့ ပင်နယ်တီ ထပ်ပေး ခဲ့ရပြီး ဗာဒီကပဲ ဟက်ထရစ်မြောက် ဂိုးကို ရယူ သွားခဲ့ပါတယ်။
အဲဒီနောက် ၇၇ မိနစ်မှာ လူစားဝင် မက်ဒီဆင်က ပင်နယ်တီ ဧရိယာ ပြင်ပ ကနေ အဝေးကန်ချက်နဲ့ လှလှပပ ကန်သွင်းယူကာ နောက်တစ်ဂိုး ထပ်သွင်း ခဲ့ပြီး နေသန်အကီးက ထောင့်ကန်ဘော ကနေ တဆင့် ခေါင်းတိုက် ချေပ ခဲ့ပေမယ့်လည်း ၈၈ မိနစ်မှာ မန်ဒီရဲ့ ပြစ်ဒဏ်ကျူးလွန်မှု ကနေ လက်စတာတို့ ပင်နယ်တီ ထပ်မံ ရရှိ ခဲ့ပြီး တီလမန်းက အဆုံးသတ်ကာ ပက်ဂွာဒီယိုလာရဲ့ အသင်းကို အိမ်ကွင်းမှာ ဂိုးပြတ် ရှုံးပွဲ ကြုံစေခဲ့ ပါတယ်။
ရာသီသစ်ရဲ့ အစပိုင်းပဲ ရှိနေသေးပေမယ့် ဂယ်ရီနဗီးက ယာဂန်ကလော့ရဲ့ ကစားသမား တွေဟာ အီတီဟတ်မှာ မန်စီးတီးတို့ ဒီလို ရှုံးနိမ့်ခဲ့မှုကို ကြည့်ပြီး ဒီရာသီ အမှတ်ပေး ချန်ပီယံဆု အတွက် ယုံကြည်မှု အပြည့် ဖြစ်နေကြလိမ့်မယ်လို့ သုံးသပ် လိုက်ပါတယ်။
နဗီးက “ပက်ဟာ အင်္ဂလန်မှာ standard တစ်ခု ချမှတ် ခဲ့သူပါ။ အကျိုးသင့် အကြောင်းသင့် ပြောရမယ် ဆိုရင် သူဟာ ဒီနေ့မှာ ပြီးခဲ့တဲ့ ရာသီက အမှတ်ပေးဖလား လက်လွှတ် ခဲ့ရတယ် ဆိုတဲ့ ဂုဏ်ပုဒ်နဲ့ ကွင်းဘေးစည်းမှာ ရပ်နေ ခဲ့တာပါ။ ဒီအချိန်မှာ ပက်ဟာ သူ့နည်းပြ သက်တမ်း တစ်လျှောက် အကြီးမားဆုံး စိန်ခေါ်မှုနဲ့ ရင်ဆိုင် နေရတယ်လို့ ဆိုနိုင်ပြီး ဒါကတော့ အမှတ်ပေးဖလားကို ပြန်လည် ရယူဖို့ ဖြစ်ပါတယ်။
ပက်ဂွာဒီယိုလာ အနေနဲ့ ၂ နှစ်ဆက်တိုက် အမှတ်ပေးဖလား လက်မဲ့ ဖြစ်သွား နိုင်ခြေ ရှိနေပါတယ်။ ဘာလို့လဲဆိုတော့ ပြီးခဲ့တဲ့ တစ်ပတ်က ချဲလ်ဆီး ကွင်းမှာ လီဗာပူးတို့ လုပ်ပြ ခဲ့တာနဲ့ ဒီနေ့ လက်စတာနဲ့ ပွဲမှာ သူတို့ လုပ်ပြ ခဲ့တာတွေကို နှိုင်းယှဉ် ကြည့်လိုက်မယ် ဆိုရင် သူတို့ဟာ လီဗာပူး နောက်မှာ ရောက်နေပါတယ်။ လီဗာပူးတို့ ချမှတ်နေတဲ့ standard ကို ကျွန်တော်တို့ သိပါတယ်။ ပြီးခဲ့တဲ့ တစ်ပတ်က သူတို့ရဲ့ နွေရာသီ အပြောင်းအရွေ့ လုပ်ဆောင်မှု တွေကိုလည်း ခင်ဗျားတို့ စဉ်းစား ကြည့်လိုက်ပါ။
အစောကြီး ရှိနေသေးတယ် ဆိုတာ ကျွန်တော် သိပါတယ်။ ဒါပေမယ့် လီဗာပူးဟာ ဒီပွဲကို စောင့်ကြည့် နေကြမှာပါ။ ပြီးတော့ သူတို့ ဒီပွဲ ကနေ ယုံကြည်မှုတွေ ရသွားမှာ ဖြစ်ပါတယ်။ ဒါဟာ သေချာပါတယ်။ ရာသီပြီးဆုံးဖို့ အဝေးကြီး လိုသေးပေမယ့် ကိုယ့်ရဲ့ အဓိက ပြိုင်ဘက်က ဒီလိုမျိုး ရှုံးနိမ့် ခဲ့တာကို မြင်တွေ့ လိုက်ရပြီ ဆိုရင် ဒါဟာ ကိုယ့်ကို အားတက်စေပါတယ်။ ဒါဟာ ကိုယ့်ကို ပိုပြီး strong ဖြစ်သွား စေပါတယ်။” လို့ ဆိုလိုက်ပါတယ်။
လီဗာပူးဟာ ယနေ့ည အန်ဖီးမှာ အာဆင်နယ် နဲ့ ပရီးမီးယားလိဂ် ပွဲကြီးပွဲကောင်း ကစား သွားရဖို့ ရှိနေပြီး စီးတီး ကတော့ လက်စတာကို ယခုလို ရှုံးနိမ့်ခဲ့မှု အပေါ် လာမည့် ကြားရက် ဘန်လေ နဲ့ ကာရာဘောင်ဖလား ပွဲစဉ်မှာ ပြန်လည် တုန့်ပြန်မှု ပြုလုပ် သွားရန် ပစ်မှတ် ထားနေမှာ ဖြစ်ပါတယ်။
