MMA ကစားသမား အောင်လအန်ဆန်က မိမိအနေဖြင့် ယှဉ်ပြိုင်ထိုးသတ်ရန်ပြင်ဆင်နေသည့် ONE မစ်ဒယ်ဝိတ်တန်း ချန်ပီယံစိန်ခေါ်ပွဲသည် လွယ်ကူမည့် ခရီးလမ်းတစ်ခုမဟုတ်ကြောင်းကို ကောင်းစွာနားလည်ထားကြောင်း SCMP နှင့်တွေ့ဆုံခဲ့သော အင်တာဗျူးအစီအစဉ်၌ ထည့်သွင်းပြောကြားခဲ့ကြောင်း သိရသည်။
MMA ကစားသမား အောင်လအန်ဆန်အနေဖြင့် ကစားသမားဘဝမှ အနားမယူမီ ရည်မှန်းချက်ဖြစ်သော ONE မစ်ဒယ်ဝိတ်တန်း၏ ချန်ပီယံဆုကို ပြန်လည်ရယူရန်ဆန္ဒရှိနေကြောင်း သိရသည်။ အောင်လအန်ဆန်ပါဝင်သော မစ်ဒယ်ဝိတ်တန်း ချန်ပီယံစိန်ခေါ်ပွဲ ကို ONE-X ၌ ထည့်သွင်းကျင်းပရန် စီစဉ်ထားကြောင်း သတင်းများထွက်ပေါ်လျက်ရှိသော်လည်း ONE Championship ဘက်က တရားဝင်သတင်းထုတ်ပြန်ခြင်း မရှိသေးကြောင်း သိရသည်။
“လက်ရှိအချိန်မှာတော့ မိသားစုနဲ့အတူတူနေထိုင်ရင်း ကျွန်တော့်ရဲ့ မျှော်လင့်ချက်တွေအတွက် လေ့ကျင့်မှုတွေကို ပြုလုပ်နေပါတယ်။ မစ်ဒယ်ဝိတ်တန်းချန်ပီယံဆုအတွက် စိန်ခေါ်ပွဲဟာ မလွယ်ကူတဲ့ ခရီးလမ်းတစ်ခု ဖြစ်တယ်ဆိုတာကို ကျွန်တော်ကောင်းမွန်စွာ နားလည်သဘောပေါက်ထားပါတယ်။ အထူးသဖြင့် နှစ်ကြိမ်တိုင်တိုင်ရှုံးထားတဲ့ ပြိုင်ဘက်ဆီက ပြန်ယူဖို့ဆိုရင် ပိုပြီးခက်ခဲမှာပါ။ ဒါပေမဲ့ ကျွန်တော့်မှာ ယုံကြည်ချက် ခိုင်ခိုင်မာမာရှိ ပါတယ်။ ကျွန်တော် နေ့စဉ်လေ့ကျင့်နေတာတွေ၊ စဉ်းစားတွေးခေါ်နေတာတွေ အားလုံးဟာ ဒီစိန်ခေါ်ပွဲအတွက်ပဲဖြစ်သလို ပြန်လည်ရယူနိုင်မယ်လို့လည်း ယုံကြည်ချက်ထားပါတယ်” ဟု အောင်လအန်ဆန်က SCMP နှင့် ပြုလုပ်ခဲ့သော အင်တာဗျူးတွင် ထည့်သွင်းပြောကြားခဲ့သည်။
အောင်လအန်ဆန်သည် မူလက ONE မစ်ဒယ်ဝိတ်တန်းနှင့် ONE လိုက်ဟဲဗီးဝိတ် တန်းနှစ်ခုစလုံး၏ ချန်ပီယံဖြစ်ခဲ့ပြီး MMA ကစားသမားဘဝ အကောင်းဆုံးအချိန်များကို ပိုင်ဆိုင်ခဲ့သူဖြစ်သည်။ သို့သော်လည်း ပြီးခဲ့သည့် ၂၀၂၀ ခုနှစ်မှစတင်ကာ နယ်သာ လန်နိုင်ငံသား ဒီရစ်ဒါနှင့် ရင်ဆိုင်ထိုးသတ်ခဲ့ပြီးနောက် ONE မစ်ဒယ်ဝိတ်တန်းချန်ပီယံဆုကို လက်လွှတ်ခဲ့ရပြီး မရှေးမနှောင်းမှာပင် ONE လိုက်ဟဲဗီးဝိတ်ချန်ပီယံဆုကိုလည်း ထပ်မံလက်လွှတ်ခဲ့ရပြန်သည်။
အောင်လအန်ဆန်သည် အဆိုပါရှုံးပွဲများအပြီးတွင် မစ်ဒယ်ဝိတ်တန်းချန်ပီယံဆုကို ပြန်လည်စိန်ခေါ်ခွင့်ရရန်အတွက် ကြိုးစားနေခြင်းဖြစ်ပြီး Rematch ပြန်ရရန်အတွက်ဘရာဇီးလ်ကစားသမား လီအန်ဒရိုနှင့် ယှဉ်ပြိုင်ခဲ့ရာ ပထမအချီမှာပင် အနိုင်ရရှိခဲ့သည်။
