ြ့ပီးခဲ့တဲ့ နွေရာသီ အပြောင်းအရွှေ့ ဈေးကွက်မှာ ကတည်းက ဘာစီလိုနာ အသင်း ကနေ ထွက်ခွာဖို့ တကဲကဲ ဖြစ်နေခဲ့တဲ့ အာဂျင်တိုင်း စူပါစတား လီယွန်နယ် မက်ဆီ ဟာ လာမယ့် နွေရာသီ အပြောင်းအရွှေ့ မှာတော့ ဘာကာ ကနေ အလွတ် နဲ့ အပြီးတိုင် ထွက်ခွာခွင့် ရှိလာတော့မှာ ဖြစ်ပါတယ် ။
မက်ဆီ တယောက် ပြီးခဲ့တဲ့ နွေရာသီ အတွင်းမှာ ဘာစီလိုနာ ကနေ ထွက်ခွာချင်တဲ့ အကြောင်း အိတ်ဖွင့်စာ ပေးပြီးကတည်းက ၊ ဥရောပ ရဲ့ အခြား ထိပ်တန်း ကလပ် တွေရဲ့ အာရုံစိုက်ခြင်း ကို စတင် ရရှိလာခဲ့ပါတယ် ။ ဒီ အသင်းတွေထဲမှာ မက်ဆီ ရဲ့ အသင်းဖော်ဟောင်း နေမာ ရှိနေတဲ့ ပီအက်စ်ဂျီ အသင်း နဲ့ မက်ဆီ ရဲ့ ဆရာဟောင်း ပတ်ဂွာဒီယိုလာ ကိုင်တွယ်နေတဲ့ မန်စီးတီး အသင်း တို့က ထိပ်ဆုံး က ပါဝင်နေပါတယ် ။
ဒီတော့ မက်ဆီ – နေမာ ပေါင်းစည်းမှု ကို မြင်ရမလား ၊ မက်ဆီ – ဂွာဒီယိုလာ ပေါင်းစည်းမှု ကို မြင်ရမလား ဆိုတာ စိတ်ဝင်စားရာ ကောင်းနေပါတယ် ။ အသက် ၃၃နှစ် အရွယ်ရှိ မက်ဆီ နဲ့ ဘာစီလိုနာ အသင်း အကြားမှာတော့ နောက်ထပ် စာချုပ်သစ် အတွက် ထူးထူးခြားခြား အစီအစဉ် မရှိတာတော့ သေချာနေပါတယ် ။
ဘာစီလိုနာ ဂန္တဝင် တိုက်စစ်မှူးဟောင်း ရီဗယ်ဒို ကတော့ မက်ဆီ နဲ့ နေမာ ပြန်လည် ပေါင်းစည်းမှု ကို မြင်လိုတဲ့အတွက် ၊ လာမယ့် နွေရာသီ အပြောင်းအရွှေ့ ဈေးကွက် မှာ မက်ဆီ တယောက် ပီအက်စ်ဂျီ သို့ ပြောင်းရွှေ့နိုင်ဖို့ကို မျှော်လင့် စောင့်စားနေပါတယ် ။
BetFair နဲ့ တွေ့ဆုံခဲ့ရာမှာ ရီဗယ်ဒို က ” ပီအက်စ်ဂျီ အားကစား ဒါရိုက်တာ ဖြစ်တဲ့ လီယိုနာဒို ဟာ မက်ဆီ ကို ဘာစီလိုနာ နဲ့ ၎င်းအကြား စာချုပ် သက်တမ်း ကုန်ဆုံးမယ့် အချိန် ၊ လာမယ့် နွေရာသီ ဈေးကွက် အတွင်း ခေါ်ယူဖို့ စိတ်ဝင်စားနေတဲ့ အကြောင်း ဝန်ခံစကား ဆိုထားပြီးသား ဖြစ်ပါတယ် ။ ”
” ဒါဟာ မက်ဆီ အတွက် အရမ်း ကောင်းတဲ့ ရွေးချယ်မှု ဖြစ်လာနိုင်ပါတယ် ။ အထူးသဖြင့် တနိုင်ငံတည်းသား မန်နေဂျာ မော်ရစ်စီယို ပိုချက်တီနို ကလည်း ပီအက်စ်ဂျီ ကို ကိုင်တွယ်နေတဲ့ အချိန်မှာပေါ့ ။ နောက်ပြီး မက်ဆီ ဟာ သူ့ရဲ့ အရင်းနှီးဆုံး မိတ်ဆွေ တဦး ဖြစ်တဲ့ နေမာ နဲ့ ပြန်ပြီး ပေါင်းစည်းခွင့် ရဖို့ ရှိပါတယ် ။ ”
” ဒီတော့ ပီအက်စ်ဂျီ ဖက်ကသာ အပြောင်းအရွှေ့ ကိစ္စ နဲ့ ပတ်သက်တဲ့ တရားဝင် ကမ်းလှမ်းမှုတွေ လုပ်လာရင် ၊ မက်ဆီ ဖက်က ခေါင်းညိမ့်ဖို့ အတွက် အကြောင်းပြချက် အနည်းငယ် ရှိလာနိုင်တာပေါ့ ။ လီဂူးဝမ်း မှာတော့ မက်ဆီ ဟာ အခက်အခဲ လုံးဝမရှိပဲ ခြေစွမ်း တောက်ပနေဦးမှာ သေချာပါတယ် ။ ဘာလို့လဲ ဆိုတော့ ဒီလိဂ် ဟာ လာလီဂါ ၊ ပရီးမီးယားလိဂ် တွေထက် ပြိုင်ဆိုင်မှု အနည်းငယ် နိမ့်ကျတဲ့ လိဂ်ဖြစ်လို့ပါ ။ ”
” အဲ့ဒီ အတွက်ကြောင့် မက်ဆီ အဖို့ ဘောလုံး ရာသီ တလျှောက် ကြံ့ခိုင်မှု နဲ့ ပတ်သက်ပြီး ၊ စိတ်ကြိုက် စီမံခန့်ခွဲခွင့် ရှိလာနိုင်မှာ ဖြစ်သလို ၊ ချန်ပီယံလိဂ် ပွဲတွေ အတွက် ခွန်အား ချွေတာ ကစားခွင့် ရလာမှာပါ ။ ဘဏ္ဍာရေး အရ ကြည့်မယ် ဆိုရင်လည်း ပီအက်စ်ဂျီ လိုမျိုး မက်ဆီ ကို လစာ ပေးချေနိုင်မယ့် အသင်း ကလည်း ခပ်ရှားရှားပါ ။ ”
” ဒါကြောင့် ပီအက်စ်ဂျီ ဟာ မက်ဆီ အတွက် ကောင်းသော ရွေးချယ်မှု တခု ဖြစ်လာနိုင်ပါတယ် ။ တဖက်မှာ ပြင်သစ် ဘောလုံး လောက ဟာလည်း မက်ဆီ ရောက်လာတာနဲ့ တပြိုင်နက် ၊ စပွန်ဆာ နဲ့ မီဒီယာ ရှုထောင့် အရ တဟုန်ထိုး ကြီးကျယ် တိုးတက်လာမှာ သေချာပါတယ် ။ ” လို့ ဆိုခဲ့ပါတယ် ။
မက်ဆီ ရဲ့ ဘာစီလိုနာ အသင်း ဟာ ပြီးခဲ့တဲ့ ရက်ပိုင်းကပဲ ဘီလ်ဘာအို အသင်း နဲ့ ယှဉ်ပြိုင် ကစားခဲ့တဲ့ စပိန် စူပါဖလား ဗိုလ်လုပွဲ မှာ ၃ – ၂ ရလဒ် နဲ့ အရေးနိမ့်ခဲ့လို့ ၊ ဒီရာသီ ပထမဆုံး ဆုဖလား ရရှိနိုင်မယ့် အခွင့်အရေး ကို လက်လွှတ် ဆုံးရှုံးခဲ့ရပါတယ် ။ အဲ့ဒီ ပွဲမှာ မက်ဆီ ဟာ ပြိုင်ဖက် တိုက်စစ်မှူး ဗီလာလီဘာ ရဲ့ မျက်နှာ ကို လက်နဲ့ ဆွဲပိတ်ခဲ့သလို ဖြစ်လို့ ၊ တိုက်ရိုက် အနီ နဲ့ အထုတ်ခံခဲ့ရပါတယ် ။
