ဘာစီလိုနာတိုက်စစ်မှူးဟောင်း အဂွဲရိုးက နိုင်ငံအသင်းဖော်ဟောင်း မက်ဆီအနေဖြင့် ကစားသမားဘဝကို ဘာစီလိုနာအသင်းတွင်သာ အဆုံးသတ်သင့်ကြောင်းနှင့် မက်ဆီ အား ဘာစီလိုနာအသင်းထံသို့ ပြန်လည်ခေါ်ယူရေးအတွက် ကြိုးပမ်းအားထုတ်ရန် အသင်းဥက္ကဋ္ဌဖြစ်သူ လာပေါ်တာကို တိုက်တွန်းပြောကြားခဲ့သည်။
အသက် ၃၅ နှစ်အရွယ်ရှိ အာဂျင်တီးနားလက်ရွေးစင်အသင်းခေါင်းဆောင် မက်ဆီသည် ၂၀၂၁ နွေရာသီတွင် ဘာစီလိုနာအသင်းနှင့် စာချုပ်သက်တမ်းကုန်ဆုံးပြီးနောက် အသင်း၏ဘဏ္ဍာရေးပြဿနာများကြောင့် PSG အသင်းသို့ ပြောင်းရွှေ့ကြေးအလွတ် ဖြင့် ပြောင်းရွှေ့သွားခဲ့သည်။ လက်ရှိ PSG အသင်းနှင့် ချုပ်ဆိုထားသည့် မက်ဆီ၏လက် ရှိစာချုပ်မှာ ယခုရာသီကုန်တွင် ကုန်ဆုံးမည်ဖြစ်ပြီး PSG အသင်းက ၎င်းကို စာချုပ်သစ် ချုပ်ဆိုရန် ကမ်းလှမ်းထားကြောင်း သိရသည်။
သို့သော် မက်ဆီအနေဖြင့် PSG အသင်းနှင့် စာချုပ်သစ်အတွက် သဘောတူညီမရသေးဘဲ အနာဂတ်နှင့်ပတ်သက်ပြီး စဉ်းစားနေဆဲဖြစ်ကြောင်း သိရှိရသည်။ ယင်းအခြေအနေတွင် စီရော်နယ်လ်ဒို သွားရောက်ကစားနေသည့် ဆော်ဒီလိဂ်ကလပ်များကလည်း မက်ဆီကို ကမ္ဘာ့စံချိန်တင်လစာပေးချေကာ ခေါ်ယူရန်စီစဉ်နေကြောင်း သတင်းများထွက်ပေါ်နေသည်။
မက်ဆီနှင့် အရင်းနှီးဆုံးသူငယ်ချင်းဖြစ်သည့် မန်စီးတီးနှင့် ဘာစီလိုနာတိုက်စစ်မှူးဟောင်း အဂွဲရိုးကမူ ၎င်း၏အာဂျင်တီးနား အသင်းဖော်ဟောင်း မက်ဆီအနေဖြင့် လာ မည့် ၂၀၂၃ နွေရာသီတွင် ဘာစီလိုနာအသင်းသို့ပြန်ရန် အခွင့်အရေး ၅၀ ရာခိုင်နှုန်း ရှိ ကြောင်း ပြောကြားခဲ့ခြင်းဖြစ်သည်။
အဂွဲရိုး က “မက်ဆီအနေနဲ့ ဘာစီလိုနာအသင်းကို ပြန်လာဖို့ အခွင့်အရေး ၅၀ ရာခိုင်နှုန်းရှိတယ်လို့ ကျွန်တော် ခံစားရပါတယ်။ လီယိုအနေနဲ့ ဘာစီလိုနာအသင်းမှာပဲ ကစားသမားဘဝက အနားယူသင့်ပါတယ်။ ဘာစီလိုနာ အသင်းက သူ့ရဲ့အိမ်ဖြစ်ပါတယ်။ သူ့ရဲ့ကစားသမားဘဝကို ဘာစီလိုနာအသင်းမှာပဲ အဆုံးသတ်သင့်ပါတယ်။ တကယ်လို့ ဘာစီလိုနာအသင်းဥက္ကဋ္ဌ လာပေါ်တာဘက်က ကြိုးစားအားထုတ်မယ်ဆိုရင် ဘာစီလိုနာကို မက်ဆီ ပြန်လာဖို့က ပိုပြီးနီးစပ်လာမှာပါ”ဟု ပြောကြားခဲ့သည်။
ဘာစီလိုနာအသင်းဥက္ကဋ္ဌ လာပေါ်တာ သည် မက်ဆီအား အသင်းသို့ပြန်လည်ခေါ် ယူလိုကြောင်း ကြိမ်ဖန်များစွာ ပြောကြားဖူးသူဖြစ်သည်။ ထို့ပြင် ၎င်းသည် မက်ဆီ၏ဖခင်ဖြစ်ပြီး အေးဂျင့်အဖြစ် ဆောင်ရွက်နေသူ ဟော်ဟဲမက်ဆီနှင့်လည်း တွေ့ဆုံကာ မက် ဆီကို ပြန်လည်ခေါ်ယူရန် ဆွေးနွေးခဲ့ကြောင်း စပိန်မီဒီယာများက ဖော်ပြနေကြသည်။
သို့သော် ဘာစီလိုနာအသင်းသည် လက်ရှိအချိန်တွင် ဘဏ္ဍာရေးပြဿနာများနှင့် ရင်ဆိုင်နေရဆဲဖြစ်ပြီး လာလီဂါအဖွဲ့ချုပ်က ဘာစီလိုနာ အနေဖြင့် လာမည့် ၂၀၂၃-၂၄ ရာသီတွင် ကစားသမားများ၏ လစာကို ယူရိုသန်း ၂၀၀ နီးပါး လျှော့ချရမည်ဖြစ်ကြောင်း သတိပေးထားသည်။ ယင်းအခြေအနေတွင် ဆော်ဒီကလပ် အယ်လ်ဟီလာအသင်းက မက်ဆီကို တစ်ရာသီ လစာ ယူရိုသန်း ၃၀၀ ပေးချေကာ ခေါ်ယူလိုကြောင်း သိရသည်။
မက်ဆီကမူ အသက် ၃၅ နှစ်ကျော်ပြီ ဖြစ်သော်လည်း ၎င်းအနေဖြင့် ဥရောပတွင်သာ ဆက်ကစားလိုနေကြောင်း သိရှိရသည်။ မက်ဆီသည် ယခုရာသီတွင် PSG အသင်း ချန်ပီယံလိဂ်ရှုံးထွက် ၁၆ သင်းအဆင့်မှထွက်ခွာခဲ့ရခြင်းကြောင့် ဝေဖန်မှုအချို့ရင်ဆိုင်နေရသော်လည်း ယခုရာသီတွင် PSG အတွက် ပြိုင်ပွဲစုံ ၃၁ ပွဲတွင် ၁၈ ဂိုး သွင်းယူထားသည်။