ဘိုင်ယန်မြူးနစ်အသင်းအနေဖြင့် ဘာစီလိုနာကဲ့သို့ ထိပ်သီးပြိုင်ဘက်ကို ရှစ်ဂိုးအထိသွင်းယူကာ အနိုင်ရခဲ့သောကြောင့် ဗိုလ်စွဲရန်ရေပန်းစားမှုစာရင်းတွင် အလေးပေးမှု ၆/၄ ဖြင့် ထိပ်ဆုံးနေရာရောက်ရှိလာကြောင်း သိရသည်။
ဘိုင်ယန်မြူးနစ်အသင်းနည်းပြ ဟန်ဆီဖလစ်ခ်က ဘာစီလိုနာအသင်းကို ရှစ်ဂိုးသွင်းယူပြီး စံချိန်တင်ရလဒ်ဖြင့် အနိုင်ရခဲ့သော်လည်း အောင်မြင်မှုကို သာယာမနေဘဲ ဆီမီးဖိုင်နယ်အတွက် ဆက်လက်ပြင်ဆင်ရမည်ဖြစ်ကြောင်း သတိပေးပြောကြားခဲ့သည်။
ဘိုင်ယန်မြူးနစ်အသင်းသည် သောကြာနေ့က ယှဉ်ပြိုင်ကစားသည့် ချန်ပီယံလိဂ်ကွာတားဖိုင်နယ်ပွဲတွင် ဘာစီလိုနာအသင်းကို စံချိန်တင်ရလဒ် (၈-၂) ဂိုးဖြင့် အနိုင်ယူကာ ဆီမီးဖိုင်နယ်တက်ရောက်ခွင့်ရခဲ့သည်။ ဘိုင်ယန်မြူးနစ်အသင်းသည် ချန်ပီယံလိဂ် ရှုံးထွက်အဆင့် ပွဲစဉ်တစ်ပွဲတွင် ရှစ်ဂိုးသွင်းယူနိုင်သည့် ပထမဆုံးကလပ်အဖြစ် မှတ်တမ်းဝင်ခဲ့သလို ဘာစီလိုနာအသင်း အတွက်လည်း ဥရောပပြိုင်ပွဲတွင် အဆိုးရွားဆုံး ရှုံးနိမ့်မှုဖြစ်ခဲ့သည်။ ဘိုင်ယန်မြူးနစ်အသင်းအနေဖြင့် ဘာစီလိုနာကဲ့သို့ ထိပ်သီးပြိုင်ဘက်ကို ရှစ်ဂိုးအထိသွင်းယူကာ အနိုင်ရခဲ့သောကြောင့် ဗိုလ်စွဲရန်ရေပန်းစားမှုစာရင်းတွင် အလေးပေးမှု ၆/၄ ဖြင့် ထိပ်ဆုံးနေရာရောက်ရှိလာကြောင်း သိရသည်။
သို့သော် ဟန်ဆီဖလစ်ခ်က “ကျွန် တော်က နောက်ပြန်လှည့်ကြည့်တတ်သူ မဟုတ်ဘူးဆိုတာ ခင်ဗျားလည်း သိပါတယ်။ ဘာဖြစ်လို့လဲဆိုတော့ ဒီနေရာမှာရှိနေတယ်ဆိုရင် ပစ္စုပ္ပန်အကြောင်းကပဲ အရေးပါလို့ ပါ။ ဟုတ်ပါတယ်။ ကျွန်တော်တို့ အရမ်းကောင်းတဲ့ပွဲတစ်ပွဲ ကစားနိုင်ခဲ့တာပါ။ အဲဒီအတွက် ပျော်လို့ရပါတယ်။ ဒါပေမဲ့ အဆုံးသတ်ချိန်မှာ ကိုယ်နေချင်တဲ့နေရာမှာ ရပ်နေခွင့်ရဖို့ဆိုရင် အများကြီးကြိုးစားရဦးမယ်ဆိုတာ ကျွန်တော်တို့အားလုံး သိပါတယ်။ ဘောလုံးမှာ အကြောင်း အရာတွေက ဘယ်လောက်အထိ မြန်မြန်ဆန်ဆန်ဖြစ်သွားနိုင်လဲဆိုတာ ကျွန်တော်တို့သိပါတယ်။ အခုချိန်ကစပြီး ဆီမီးဖိုင်နယ်အတွက် အားပြန်ဖြည့်ရတော့မှာပါ။ ဒါက နိုင်ပွဲတစ်ပွဲပါပဲ။ ကျွန်တော်တို့ ဆီမီး ဖိုင်နယ်ရောက်ချင်ခဲ့ပြီး တကယ်လည်း ရောက်ခဲ့ပါပြီ။ ရလဒ်က အထင်ကြီးလောက်စရာဆိုပေမဲ့ ကျွန်တော်တို့က အမှတ်အသားသေးသေးလေးတစ်ခု လုပ်နိုင်ခဲ့တာပါ။ ဒါပေမဲ့ နောက်ပွဲက စောင့်နေပြီဆိုတာ အတွေ့အကြုံရှိတဲ့ကစားသမားတွေက သိကြပါတယ်။ ဒီလိုစွမ်း ဆောင်ရည်မျိုး ထပ်ပြနိုင်ဖို့လည်း လိုပါတယ်။ ပြန်လည်သုံးသပ်မှုတွေ လုပ်ပြီးတာနဲ့ ဆီမီးဖိုင်နယ်အတွက် ပြင်ဆင်ရတော့မှာပါ” ဟု ပြောကြားခဲ့သည်။
ဟန်ဆီဖလစ်ခ်သည် ချန်ပီယံလိဂ်ပြိုင်ပွဲသမိုင်းတွင် ပထမဆုံးကိုင်တွယ်သည့် ခြောက်ပွဲစလုံး အနိုင်ရအောင်စွမ်းဆောင်နိုင်သည့် တတိယမြောက် နည်းပြဖြစ်လာသလို ယင်းခြောက်ပွဲတွင် ၂၆ ဂိုးသွင်းယူကာ ဂိုးအများဆုံးနည်းပြအဖြစ်လည်း ရပ်တည်နေသည်။ ဘိုင်ယန်မြူးနစ်အသင်းသည် ယင်းပွဲအပါအဝင် ပြိုင်ပွဲစုံ ၁၉ ပွဲဆက်တိုက် အနိုင်ရ ခြင်းဖြစ်ပြီး ဘွန်ဒစ်လီဂါကလပ်များ အနက် ပြိုင်ပွဲစုံ နိုင်ပွဲဆက်တိုက်ရရှိ မှုအများဆုံးအဖြစ် စံချိန်တင်နိုင်ခဲ့သည်။ ထို့ပြင် ဟန်ဆီဖလစ်ခ်အပါ အဝင် တစ်နိုင်ငံတည်းမှ နည်းပြသုံးဦး (တူဟယ်လ်-PSG၊ နာဂယ်စမန်း- လိုက်ပ်ဇစ်၊ သုံးဦးစလုံး ဂျာမနီ) ဆီမီးဖိုင်နယ်သို့ တစ်ပြိုင်တည်း တက်ရောက်နိုင်ခြင်းမှာ ပထမဆုံးအကြိမ် ဖြစ်ကြောင်း သိရသည်။
ဘိုင်ယန်မြူးနစ်အသင်းသည် ယခုရာသီတွင် ဘွန်ဒစ်လီဂါပြိုင်ပွဲ နှင့် ဂျာမန်ဖလားပြိုင်ပွဲ၌ ချန်ပီယံဆု ဆွတ်ခူးရရှိထားသောကြောင့် တစ်ရာသီအတွင်း ဖလားသုံးလုံးအောင် မြင်မှုရရှိရန် မျှော်လင့်ချက်ရှိနေသည်။ ဖလားသုံးလုံးအောင်မြင်မှု ကို ၂၀၁၃ ခုနှစ်တွင် ဂန္ထဝင်နည်းပြ ဂျက်ဟေးနက်စ်က ရရှိခဲ့ခြင်းဖြစ်သည်။
