ပြည်တွင်း အပြောင်းအရွေ့ ဈေးကွက်မပိတ်သိမ်းမီ လီဗာပူးတို့ ဂိုးသမားသစ် တစ်ဦး ခေါ်ယူသွားမလားဆိုတာ သုံးသပ်လိုက်တဲ့ လီဗာပူးဂိုးသမားဟောင်း

လီဗာပူး ဂိုးသမားဟောင်း ဖြစ်သူ ခရစ်ကတ်လန်းက လက်ရှိ အချိန်မှာ အက်ဒရီယန်ဟာ ရုန်းကန် နေရပေမယ့်လည်း နည်းပြ ယာဂန်ကလော့ အနေနဲ့ ပြည်တွင်း အပြောင်းအရွေ့ ဈေးကွက် မပိတ်မီ ဂိုးသမားသစ် တစ်ဦး ခေါ်ယူ သွားလိမ့်မယ်လို့ သူမထင်မိကြောင်း ဆိုလိုက် ပါတယ်။ အက်ဒရီယန်ဟာ ပြီးခဲ့တဲ့ တစ်ပတ်က အက်စတွန်ဗီလာနဲ့ ပရီးမီးယားလိဂ် ပွဲစဉ်မှာ အလီဆွန် ပခုံးဒဏ်ရာ ရရှိ သွားခဲ့တာကြောင့် လီဗာပူး အတွက် ပွဲထွက် ကစားခွင့် ရရှိ ခဲ့ပါတယ်။

ဒါပေမယ့်လည်း စပိန် ဂိုးသမားဟာ လီဗာပူးတို့ အက်စတွန်ဗီလာကို ၇-၂ နဲ့ ရှုံးနိမ့် ခဲ့တဲ့ ပွဲစဉ်မှာ အန်ဖီး ကလပ်ရဲ့ ၁၉၆၃ ခုနှစ် နောက်ပိုင်း အဆိုးရွားဆုံး ရှုံးပွဲကို စတင် ဦးတည် စေခဲ့တဲ့ အမှားအယွင်းကို ပွဲအစ ၄ မိနစ် မှာတင် ကျူးလွန်ပစ် ခဲ့တာ ဖြစ်ပြီး ဒါဟာ အသင်းဖော်တွေကို စိတ်ပိုင်း ဆိုင်ရာ စိုးရိမ်မှုတွေ တိုးပွား သွားစေခဲ့ပါတယ်။

အက်ဒရီယန်ဟာ လီဗာပူးကို ရောက်လာ ကတည်းက အမှားအယွင်းတွေ မကြာခဏ ကျူးလွန် နေသူ ဖြစ်ပြီး ပြီးခဲ့တဲ့ ရာသီက အက်သလက်တီကို နဲ့ ချန်ပီယံလိဂ် ပွဲစဉ်မှာလည်း ဆိုးရွားတဲ့ အမှားကျူးလွန်ခဲ့ကာ လီဗာပူးကို ချန်ပီယံလိဂ် ပြိုင်ပွဲကနေ ထွက်ခွာ စေခဲ့ပါသေးတယ်။

ဘရာဇီး ဂိုးသမားဟာ ဒဏ်ရာကြောင့် ၆ ပတ်လောက်ထိ အနားယူ သွားရမှာ ဖြစ်ပေမယ့် လူတော်တော်များများ ကတော့ အက်ဒရီယန်ဟာ အလီဆွန်ရဲ့ နေရာကို ဖြည့်ဆည်း ကစားပေးရန် လုံလောက်တဲ့ အရည်အသွေး မရှိဘူးလို့ ယုံကြည် နေကြပါတယ်။

လက်ရှိ အချိန်မှာ နွေရာသီ အပြောင်းအရွေ့ ဈေးကွက် ပိတ်သိမ်း သွားခဲ့ပြီ ဖြစ်ပေမယ့်လည်း ပြည်တွင်း အပြောင်းအရွေ့ ဖြစ်တဲ့ ပရီးမီးယားလိဂ် ကလပ်တွေနဲ့ EFL ကလပ်တွေကြား အပြောင်းအရွေ့ လုပ်ဆောင်မှု တွေကတော့ လာမည့် အောက်တိုဘာ ၁၆ ရက်နေ့ထိ ခွင့်ပြု ပေးထားဆဲ ဖြစ်ပါတယ်။

လီဗာပူး ဂိုးသမားဟောင်း ကတ်လန်း ကတော့ ကလော့ အနေနဲ့ အက်ဒရီယန်ကို အလီဆွန် ပြန်လာတဲ့ အချိန်ထိ ယုံကြည်မှု ပေးသင့်တယ်လို့ ယုံကြည် နေပါတယ်။

လီဗာပူးတို့ ဂိုးသမားသစ် တစ်ဦး ခေါ်ယူသွား နိုင်သလား ဆိုတဲ့ မေးခွန်းကို ကတ်လန်းက “ကျွန်တော် ကတော့ သူ ဒီလို လုပ်သွားမယ်လို့ မထင်မိ ပါဘူး။ မလုပ်နိုင် ပါဘူး။ အက်ဒရီယန် လီဗာပူး အတွက် ကစား ခဲ့တဲ့ ပွဲစဉ်တွေမှာ အသင်းရဲ့ ရလဒ်ပိုင်းကို ခင်ဗျားတို့ ကြည့်လိုက်ပါ။

အတော် ကောင်းခဲ့တာကို တွေ့ရမှာပါ။ အက်စတွန်ဗီလာ နဲ့ ပွဲစဉ် ကတော့ ခင်ဗျားတို့ သိကြတဲ့ အတိုင်း ပါပဲ။ ဒါပေမယ့် အဲဒီ ပွဲစဉ်မှာ ဒီလို ရလဒ်မျိုး ပေါ်ထွက် လာမယ်လို့ ဘယ်သူမှ ခန့်မှန်း မိမယ်လို့ ကျွန်တော် မထင်မိ ပါဘူး။

ဒါဟာ ထူးဆန်းတဲ့ ပွဲစဉ်တွေ ထဲက တစ်ပွဲ ဖြစ်ပါတ်။ လီဗာပူးတို့ လာမည့် ပွဲစဉ်မှာ တုန့်ပြန်မှု လုပ်သွား ရမှာပါ။ အခု တွေ့ဆုံမှာ အဲဗာတန် ဖြစ်ပါတယ်။ ဒါဟာ တကယ့်ကို ပွဲကြီး ပွဲကောင်း ဖြစ်ပါတယ်။ ပရိတ်သတ်တွေ ဒီပွဲကို ဂွတ်ဒီဆင်ပက်မှာ လာရောက် ကြည့်ရှုခွင့် မရတာ ကတော့ စိတ်ပျက်စရာ ပါပဲ။ ဒါပေမယ့် အက်ဒရီယန် အနေနဲ့ ဒီပွဲမှာ လက်စွမ်းပြ သွားဖို့ လိုအပ်ပါတယ်။

ပြီးခဲ့တဲ့ ဗီလာနဲ့ ပွဲမှာ ပထမဂိုး ကလွဲပြီး အခြား ပေးဂိုး ၆ ဂိုးစလုံးမှာ သူဘာမှ မတက်နိုင် ခဲ့ပါဘူး။ ပြသနာ ကတော့ လီဗာပူးဟာ အလီဆွန် လိုမျိုး ကမ္ဘာ့အကောင်းဆုံး ဂိုးသမား တစ်ဦး ပိုင်ဆိုင် ထားတာ ပါပဲ။ အကယ်၍ အလီဆွန် မကစား နိုင်တဲ့ အခါမှာ ဘယ်သူပဲ သူ့နေရာကို ဝင်ကစားသည် ဖြစ်စေ အားလုံးရဲ့ အနီးကပ် စောင့်ကြည့်မှုကို ခံရမှာ ဖြစ်ပါတယ်။

ဘာလို့လဲ ဆိုတော့ အလီဆွန်ရဲ့ standard အတိုင်း လုပ်ပြ နိုင်ဖို့ ဆိုတာ မဖြစ်နိုင်ပါဘူး။ ဒါ့ကြောင့် အက်ဒရီယန်ဟာ ဒီတာဝန်ကြီးကို ပခုံးထမ်း ထားရပြီး ဘယ်ဂိုးသမား မဆို ဒီလို ကြီးမားတဲ့ ဖိအားဒဏ်ကို ကြုံတွေ့ ရမှာ အမှန် ပါပဲ။” လို့ ဆိုသွား ပါတယ်။

လီဗာပူးဟာ မနေ့က ဂိုးသမားလေး မာဆယ်လိုပီတာလူကာ ကို ဖလူမီနီးစ် အသင်းထံမှ အပြီးသတ် ခေါ်ယူ နိုင်ခဲ့တယ်လို့ ကြေငြာ သွားခဲ့ပေမယ့် အသက် ၁၇ နှစ်အရွယ် ဂိုးသမားကို အနာဂတ် အတွက် ခေါ်ယူခဲ့တာ ဖြစ်ပြီး ၎င်းဟာ အခုချိန်မှာ မဲဝုဒ်မှာ လေ့ကျင့်ခန်း စတင် ပြုလုပ်နေပြီ ဖြစ်ပြီး ကလပ် အကယ်ဒမီ အသင်းတွေ အတွက် စတင် ကစား သွားမှာ ဖြစ်ပါတယ်။