ဂျူဗင်တပ်စ် အသင်း ဂန္တဝင် တိုက်စစ်မှူး ဒယ်ပီယာရို က အသင်း ရဲ့ နည်းပြသစ် ဖြစ်လာတဲ့ ပီယာလို ဟာ ရီးရဲလ် မက်ဒရစ် နည်းပြ ဇီဒန်း ထက် ပိုကောင်းတဲ့ ထိပ်တန်း နည်းပြ ဖြစ်လာ နိုင်တယ်လို့ ပြောကြား လိုက်ပါတယ် ။
ဂျူဗင်တပ်စ် အသင်းဟာ ချန်ပီယံလိဂ် ပြိုင်ပွဲကနေ ထွက်ခွာ ခဲ့ရပြီးနောက် နည်းပြ ဆာရီ ကို ထုတ်ပယ် ခဲ့ပြီး ကစားသမားဟောင်းလည်း ဖြစ်သလို ယူ-၂၃ နည်းပြလည်း ဖြစ်တဲ့ ပီယာလို ကို နည်းပြ အဖြစ် ခန့်အပ် လိုက်ကြောင်း ကြေညာ ခဲ့ပါတယ် ။
ပီယာလို ဟာ ဂျူဗင်တပ် အသင်း နဲ့ နှစ်နှစ် စာချုပ် ချုပ်ဆို ခဲ့တာ ဖြစ်ပါတယ် ။ ပီယာလို ဂျူဗင်တပ်စ် နည်းပြ ဖြစ်လာတာဟာ အားလုံး အတွက် အံ့အားသင့်စရာ ဖြစ်ခဲ့ပြီး ကွင်းလယ် ဖန်တီးရှင်ဟောင်းဟာ ဇီဒန်း ရဲ့ နည်းပြ ဘဝ အောင်မြင်မှုတွေကို လိုက်မှီနိုင်မယ့်သူ ဖြစ်ကြောင်း ဆိုပါတယ် ။
ပီယာလို ဟာ ကစားသမား ဘဝ တုန်းက အေစီမီလန် အသင်း နဲ့ အတူ ချန်ပီယံလိဂ် နှစ်ကြိမ် ၊ စီရီးအေ ချန်ပီယံ ၂ ကြိမ် ၊ ဂျူဗင်တပ်စ် အသင်း နဲ့ အတူ စီရီးအေ ချန်ပီယံဆု ၄ ကြိမ် အပြင် တခြား ဆုဖလား အောင်မြင်မှုတွေကို ရယူ နိုင်ခဲ့သူပါ ။ ဒါ့အပြင် ပီယာလို ဟာ အီတလီ လက်ရွေးစင် အသင်းနဲ့အတူ ကမ္ဘာ့ဖလား ချန်ပီယံဆု ရယူ နိုင်ခဲ့ပါတယ် ။
ဂျူဗင်တပ်စ် အသင်း ခေါင်းဆောင်ဟောင်း ဒယ်ပီယာရို က Sky Sports Itlia မှာ ပီယာလို ကို ဇီဒန်း ကို နှိုင်းယှဉ် နေကြတဲ့ အပေါ် ” မျှတတဲ့ နှိုင်းယှဉ်မှုတော့ မဟုတ်ပါဘူး ၊ ဘာကြောင့်လဲ ဆိုတော့ ဇီဇူး က ရီးရဲလ် မက်ဒရစ် လူငယ် အသင်းမှာကော အန်ဆယ်လော့တီ ရဲ့ လက်ထောက် နည်းပြ အဖြစ်ကော လုပ်ခဲ့ဖူးပါတယ် ။ ”
” ဒါပေမယ့် ပီယာလို က ဇီဒန်း ထက် ပိုကောင်းအောင် လုပ်နိုင်ဖို့ အလုံးစုံ ပိုင်ဆိုင် ထားပါတယ် ။သူက အသင်းအကြောင်းကော ၊ ကစားသမားတွေ ၊ ဒါရိုက်တာတွေ အကြောင်းကော ကောင်းကောင်း သိသူပါ ။ ဒါကြောင့် သူတို့ အချင်းချင်း ရှင်းရှင်းလင်းလင်း ဆက်သွယ် နိုင်မယ် ထင်ပါတယ် ။ ”
” အရိုးသားဆုံး ပြောရရင် ကျွန်တော် ကိုယ်တိုင်လည်း သူ နည်းပြ ဖြစ်လာလိမ့်မယ်လို့ ထင်ထားတဲ့ သူထဲမှာ မပါပါဘူး ။ ကျွန်တော် ကိုယ်တိုင်လည်း အံ့အား သင့် ခဲ့ရပါတယ် ၊ သူ ယူ-၂၃ နည်းပြ ဖြစ်လာကတည်းက ကျေနပ် နေခဲ့သလို သူ့အတွက် မှန်ကန်တဲ့ ပြောင်းရွှေ့မှု ဖြစ်တယ်လို့ တွေးခဲ့မိပါသေးတယ် ။ ”
” ဒါပေမယ့် သူက အသင်းကြီး နည်းပြပါ ထပ် ဖြစ်လာခဲ့ပါတယ် ၊ သူကံကောင်းပါစေလို့ ဆုတောင်း ပေးပါတယ် ။ ကျွန်တော့် အမြင်အရ ကစားသမားဘဝ ကနေ နည်းပြ ဘဝ ပြောင်းကြတာက အရင်ကနဲ့ မတူတော့ပါဘူး ၊ အရင်ကဆို အနိမ့်တန်းလိဂ်တွေမှာ အရင် နည်းပြ လုပ်ကြပါတယ် ။ ”
” ဒါပေမယ့် နောက်ပိုင်းနှစ်တွေမှာတော့ ဖီလစ်ပို ၊ ဆီမြွန်နီ အင်ဇာဂီ ၊ ဂတ်တူဆို တို့လို နည်းပြတွေ အောင်မြင်မှု ရလာတာကို တွေ့ကြမှာပါ ။သူတို့က ဂန္တဝင် ကစားသမားတွေ ဖြစ်ကြသလို သူတို့ အသင်းတွေကိုလည်း ကောင်းကောင်း ကိုင်တွယ် နိုင်ခဲ့ပါတယ် ။ ” လို့ ပြောကြား သွားခဲ့ပါတယ် ။
