မန်ယူသည် ပရီးမီးယားလိဂ်တွင် ရာသီအကုန်၌ အဆင့် ၂ ရနိုင်သည်ဟု ဂယ်ရီနဗီးလ်က ပြောဆိုလိုက်ခြင်းကို လီဗာပူးကစားသမားဟောင်း ကာရေဂါက ပြင်းထန်စွာဝေဖန်လိုက်သည်။
အဆင့် ၅ နေရာတွင် ရပ်တည်နေသော နယူးကာဆယ်သည် ပြီးခဲ့သည့်သောကြာနေ့တွင် ဖောရက်စ်ကို ၂-၁ ဖြင့် အနိုင်ယူလိုက်ပြီး အဆိုပါရလဒ်သည် အဆင့် ၄ အတွင်းဝင်ရေးပြေးလမ်းအတွက် များစွာအရေပါလာနိုင်ကြောင်း သတင်းများက ဆိုသည်။
လက်ရှိအချိန်တွင် မန်နေဂျာအက်ဒီဟောင်း၏ အသင်းသည် မန်ယူနှင့် သုံးမှတ်အကွာ စပါးနှင့် ၂ မှတ်အကွာတွင် ရပ်တည်နေသည်။ နယူးကာဆယ်သည် လာမည့်တစ်ပတ်တွင် မန်ယူနှင့် ကစားရန်ရှိပြီး အဆိုပါပွဲရလဒ်အပေါ်မူတည်၍ အဆင့် ၄ အတွင်းရပ်တည်မှုသည်လည်း အပြောင်းအလဲဖြစ်သွားနိုင်သည်။
နဗီးလ်က မန်ယူသည် ပရီးမီးယားလိဂ်တွင် အဆင့် ၂ နေရာ၌ ရပ်တည်နိုင်ရန် အခွင့်အရေးကောင်းများစွာ ရှိကြောင်းပြောဆိုထားသည်။ သောကြာနေ့ညက နယူးကာဆယ်၏ ပွဲအပြီးတွင် ကာရေဂါက နဗီးအနေဖြင့်ထိုသို့ ပြောဆိုခြင်းကို ဝေဖန်လိုက်သည်။
“အခုရလဒ်တွေက မန်ယူအသင်းကို အဆင့် ၄ အတွင်းဝင်ရေး ဘယ်လို အကျိုးသက်ရောက်လာနိုင်မလဲ ဆိုတာက သိသာပါတယ်။ မန်ယူက အဆင့် ၄ အတွင်းဝင်နိုင်တယ်ဆိုတာကို သတိထားမိတာကတော့ ကြာနေပါပြီ။ နဗီးလ်က မန်ယူအနေနဲ့ အဆင့် ၂ နေရာရနိုင်တယ်ဆိုတဲ့ အထိပြောလိုက်တယ်။ အခုတော့ မန်ယူက အဆင့် ၄ အတွင်းဝင်အောင်တောင် အပြင်းအထန်တိုက်ခိုက်ကြိုးစာရမယ့် အနေအထား ဖြစ်ပါတယ်။ အထူးသဖြင့် နယူးကာဆယ်က မန်ယူနဲ့ကစားဖို့ ရှိနေသေးတာကို သတိထားရမယ်”ဟု ကာရေဂါက ပြောဆိုလိုက်သည်။
တန်းဟက်၏အသင်းသည် နောက်ဆုံးကစားသည့် လိဂ်ပွဲနှစ်ပွဲတွင် လီဗာပူးကို ၇-၀ ဖြင့်ရှုံးနိမ့်ထားသလို ဆောက်သမ်တန်နှင့်လည်း ဂိုးမရှိသရေကျထားသည်။ မန်ယူသည် ယနေ့ညတွင် ဖူလ်ဟမ်နှင့် အက်ဖ်အေဖလားကွာတားဖိုင်နယ်ကစားရန်ရှိသည်။
