အာဆင်နယ် အသင်း နည်းပြ မီခေးလ် အာတီတာ က လူငယ် တိုက်စစ်မှူး နကီတီးယား သာ သူ့ရဲ့ ပုံစံကောင်းတွေကို ဆက်လက် ထိန်းသိမ်းထားနိုင်ပါက အင်္ဂလန် လက်ရွေးစင် အသင်းကြီးမှာ ပါဝင်ဖို့ အခွင့်အရေး ရလာလိမ့်မယ်လို့ မှတ်ချက် ပေးလိုက်ပါတယ် ။
နကီတီးယား ဟာ အာဆင်နယ် အသင်း ရဲ့ နောက်ဆုံး နှစ်ပွဲဆက် ဂိုးသွင်းယူနိုင်ခဲ့ပြီး ဝက်စ်ဟမ်း နဲ့ ပွဲမှာ လူစားဝင် ကစားပြီး အနိုင်ဂိုး သွင်းယူ ပေးခဲ့သလို လက်စတာ နဲ့ ကာရာဘောင်း ဖလား ပွဲမှာလည်း အနိုင်သေချာစေမယ့် သွင်းဂိုး တစ်ဂိုး ကို ထပ်မံ သွင်းယူ နိုင်ခဲ့ပါတယ် ။
အသက် ၂၁ နှစ် အရွယ် ရှိပြီ ဖြစ်တဲ့ နကီတီးယား ဟာ နိုင်ငံတကာ ပွဲစဉ်တွေမှာ အင်္ဂလန် ယူ-၂၁ အသင်း အတွက် ၁၀ ပွဲ ကစားထားရာမှာ ၁၂ ဂိုး သွင်းယူ ပေးထားပါတယ် ။
အင်္ဂလန် လက်ရွေးစင် အသင်း နည်းပြ ဆောက်ဂိတ်ဟာ လူငယ် ကစားသမားတွေကို ရွေးချယ် နေရာပေးလေ့ ရှိသူ ဖြစ်ပြီး သူ့လက်ထက်မှာ ဖိုဒန် ၊ ဂရင်းဝုဒ် ၊ အေဘရာဟမ် တို့ အသင်းကြီးမှာ ရွေးချယ် ခံခဲ့ရပါတယ် ။
အင်္ဂလန် လက်ရွေးစင် အသင်းကြီးဟာ လာမယ့်လမှာ ဝေးလ်စ် ၊ ဘယ်ဂျီယံ ၊ ဒိန်းမတ် တို့နဲ့ ကစားရဖို့ ရှိနေ့ပြီး အဆိုပါပွဲတွေမှာ နကီတီးယား ကို ရွေးချယ်ဖို့ အာဆင်နယ် နည်းပြ အာတီတာက ထောက်ခံ ပေးသွားခဲ့ပါတယ် ။
အာတီတာ က လီဗာပူး နဲ့ ပွဲကြို သတင်းစာ ရှင်းလင်းပွဲမှာ ” နကီတီးယား သာ ပြီးခဲ့တဲ့ လအနည်းငယ်တုန်းက ပြသထားတဲ့ စွမ်းဆောင်ရည်မျိုးကို ဆက်လက် ပြသနိုင်မယ်ဆိုရင် သူ့မှာ အခွင့်အရေးကောင်း ရှိပါတယ် ။ ”
” အင်္ဂလန် အသင်း နည်းပြတွေက လူငယ် ကစားသမားတွေကို ရဲရဲရင့်ရင့် အသုံးပြုနိုင်စွမ်း ရှိတယ်လို့ မြင်ပါတယ် ။ သူတို့(လူငယ်တွေ) အပေါ်ပဲ မူတည်ပါတယ် ၊ သူတို့သာ ခြေစွမ်းပိုင်း တည်တည်ငြိမ်ငြိမ်နဲ့ ကလပ်အသင်းမှာ လုပ်ပြ ထားသလို စွမ်းဆောင်ပြနိုင်ရင် အခွင့်အရေးက ရောက်လာမှာပါ ။ ” လို့ ပြောကြား သွားခဲ့ပါတယ် ။
အင်္ဂလန် လက်ရွေးစင် အသင်းဟာ အောက်တိုဘာလ ၈ ရက်နေ့မှာ ဝေးလ်စ် အသင်း နဲ့ ခြေစမ်းပွဲ ကစားဖို့ ရှိပြီး ၊ ပြီးရင်တော့ နေရှင်းလိဂ် ပွဲစဉ် အဖြစ် ဘယ်ဂျီယံ ၊ ဒိန်းမတ် တို့နဲ့ ကစားရမှာပါ ။
