ရီးယဲလ်မက်ဒရစ်နောက်ခံလူ ကာဗာဟယ်လ်သည် ဒူးဒဏ်ရာကြောင့် (၂)လခန့် အနားယူရဖွယ်ရှိနေကြောင်း သိရသည်။
အသက် (၂၈)နှစ်အရွယ်ရှိ စပိန်နောက်ခံလူ ကာဗာဟယ်လ်သည် စက်တင်ဘာ (၃၀)ရက်က ကစားခဲ့သည့် လာလီဂါပွဲစဉ် ရီးယဲလ်မက်ဒရစ် (၁-၀) ဗယ်လာဒိုလစ်ပွဲ၌ ပွဲချိန် (၅၇)မိနစ်တွင် အော်ဒရီယိုလာအစား လူစားဝင်ရောက်ကစားခဲ့သူဖြစ်သည်။
![](https://sportsmyan.com/wp-content/uploads/2020/10/Real-Madrid-defender-Carvajal-2-1024x536.jpg)
သို့သော် ရီးယဲလ်မက်ဒရစ်အသင်း၏ ဆေးစစ်မှုအရ ကာဗာဟယ်လ်၏ ညာဘက်ဒူးအရွတ်တွင် ဒဏ်ရာရရှိနေခြင်းဖြစ်ကြောင်း သိရသည်။
ရီးယဲလ်မက်ဒရစ်အသင်း၏ ထုတ်ပြန်ချက်တွင် “ရီးယဲလ်ဆေးအဖွဲ့၏ ဆေးစစ်ဆေးမှုအရ ကာဗာဟယ်လ်၏ ညာဘက်ဒူးအရွတ်တွင် ဒဏ်ရာရရှိနေကြောင်းနှင့် ကာဗာဟယ်လ်အနေဖြင့် မည်သည့်အချိန်တွင် ပြန်ကစားနိုင်မည်ကို စောင့်ကြည့်ရဦးမည်ဖြစ်ကြောင်း”ပါရှိသည်။
Muchas gracias por todos los mensajes de ánimo que estoy recibiendo.🙏🏻
— Dani Carvajal Ramos (@DaniCarvajal92) October 2, 2020
No es más que una piedra en el camino.
Deseando estar de vuelta cuanto antes. pic.twitter.com/l40Zol6LLY
စပိန်အားကစားသတင်းစာ Marca ကမူ ယခု ကာဗာဟယ်လ် ရရှိသည့်ဒဏ်ရာမျိုးမှာ (၂)လခန့် အနားယူရလေ့ရှိကြောင်း ဖော်ပြခဲ့သည်။
ရီးယဲလ်အသင်းသည် ယခုရာသီ လာလီဂါပွဲစဉ် (၃)ပွဲ ကစားထားရာတွင် ရှုံးပွဲမရှိသေးဘဲ (၂)ပွဲနိုင်၊ (၁)ပွဲသရေ ရလဒ်ရရှိထားကာ ရမှတ် (၇)မှတ်ဖြင့် အဆင့်(၃)နေရာ၌ ရပ်တည်နေသည်။