ချဲလ်ဆီး တိုက်စစ်မှုးဟောင်း ဖြစ်သူ ဂျင်မီဖလွိုက် ဟယ်ဆယ်ဘိန့်က လီဗာပူး နဲ့ မန်ချက်စတာစီးတီး တို့ဟာ ပရီးမီးယားလိဂ် ဖလားကို ဆွတ်ခူး နိုင်ခြေ အမြင့်မားဆုံး အသင်းတွေ ဖြစ်ကြပေမယ့်လည်း ဒီရာသီမှာ မထင်မှတ်ထားတဲ့ အသင်း တစ်သင်းက ၎င်းတို့ကို ကျော်ဖြတ်ကာ ဗိုလ်စွဲ သွားနိုင်ခြေ ရှိနေတယ်လို့ သုံးသပ် လိုက်ပါတယ်။
ပရီးမီးယားလိဂ် ပွဲစဉ် ၈ အပြီးမှာ ထိပ်ဆုံးမှာ ရပ်တည်နေကြတဲ့ အသင်း ၆ သင်းကြား ရမှတ် ကွာဟမှု ၃ မှတ်သာ ရှိပြီး လက်စတာ အသင်းဟာ စပါး နဲ့ လီဗာပူး တို့ကို တစ်မှတ် အသာနဲ့ ဇယားထိပ်မှာ ဦးဆောင် နေတာ ဖြစ်ပါတယ်။ ရာသီကြို ပြင်ဆင်ချိန် နည်းပါးတဲ့ အပြင် ပရိတ်သတ် မပါဘဲ ကစားရတာကြောင့် ဒီရာသီမှာ အံ့အားသင့်ဖွယ် ရလဒ်တွေ ထွက်ပေါ် နေခဲ့တာကို မြင်တွေ့ ခဲ့ရပြီး ဒီအတွက်ကြောင့်လည်း ဒီရာသီ မထင်မှတ်ထားတဲ့ အသင်း တစ်သင်းက ဗိုလ်စွဲ သွားနိုင်တယ် ဆိုတဲ့ ခန့်မှန်းမှုတွေ မြင့်တက် လာခဲ့ပါတယ်။
ဟယ်ဆယ်ဘိန့် ကလည်း ဒီရာသီ ပရီးမီးယားလိဂ် ဆုဖလား အတွက် အသင်း တော်တော်များများမှာ အခွင့်အရေး ရှိနေတယ်လို့ ယူဆ နေပေမယ့် ပြီးခဲ့တဲ့ ရာသီက ပရီးမီးယားလိဂ် ချန်ပီယံ ဖြစ်ခဲ့တဲ့ လီဗာပူး နဲ့ ဒုတိယ ရရှိခဲ့တဲ့ မန်စီးတီး တို့ကတော့ ရေပန်းအစားဆုံး အသင်းတွေ အဖြစ် ဆက်ရှိ နေတယ်လို့ ပြောသွား ပါတယ်။
ဟယ်ဆယ်ဘိန့် က “ဒီနှစ်မှာ အသင်းတိုင်း ချန်ပီယံ ဖြစ်ဖို့ အခွင့်အရေး ရှိပါတယ်။ လက်စတာ ကလည်း အခွင့်အရေး ရှိသလို အားလုံးလည်း အခွင့်အရေး ရှိကြပါတယ်။ ဒီရာသီ ချဲလ်ဆီးတို့ ပရီးမီးယားလိဂ် ဖလား ရသင့်တယ် ဆိုပြီး ခင်ဗျားတို့ ဖရန့်လမ်းပတ်ကို ဖိအားတွေ မပေးသင့်သေးဘူးလို့တော့ ကျွန်တော် ထင်ပါတယ်။ လီဗာပူး နဲ့ မန်စီးတီး တို့ဟာ ချန်ပီယံ ဖြစ်ဖို့ ရေပန်းအစားဆုံး အသင်းတွေ အဖြစ် ရှိနေကြဆဲပါ။ ချဲလ်ဆီးဟာ ဒီရာသီမှာ ဒီအသင်းတွေကို အနီးကပ် ဖိအားပေး ရမှာပါ။ အကယ်၍ သူတို့ ဒီလို လုပ်နိုင်ခဲ့မယ် ဆိုရင် လာမည့်နှစ်မှာ သူတို့ ပရီးမီးယားလိဂ် ဖလား ဆွတ်ခူး ရမယ် ဆိုပြီး ဖိအားပေး နိုင်ပါတယ်။
အဲဒီအချိန် ကျမှသာ ဖရန့်လမ်းပတ်ကို ဖိအားတွေ ပေးရမှာပါ။ အခုတော့ မဟုတ်သေး ပါဘူး။ ကျွန်တော်ကတော့ အမှတ်ပေးဖလားဟာ လီဗာပူး နဲ့ မန်စီးတီး ကြားက ပြိုင်ပွဲလို့ပဲ ထင်နေဆဲပါ။ လီဗာပူးဟာ ဒီအချိန် နောက်တန်း ဒဏ်ရာ ပြသနာတွေ ရှိနေတယ် ဆိုတာ ကျွန်တော် သိပါတယ်။ ဒါပေမယ့် သူတို့ရဲ့ ၃ ဦးတွဲ တိုက်စစ်ဟာ အရမ်းကို ကြောက်စရာ ကောင်းပါတယ်။ မန်စီးတီး ကလည်း အမြဲတမ်း ဖလား စိန်ခေါ် နိုင်တဲ့ အသင်း အဖြစ် ရှိနေမှာပါ။” လို့ ပြောလိုက်ပါတယ်။
သို့ပေမယ့်လည်း ဟယ်ဆယ်ဘိန့်က လီဗာပူး နဲ့ မန်စီးတီး တို့ဟာ ဒီရာသီ ပရီးမီးယားလိဂ် ဖလားကို ဆွတ်ခူး နိုင်ရန် ရေပန်းအစားဆုံး ဖြစ်ကြပေမယ့် ဂျိုဆေးမော်ရင်ညို ကလည်း စပါးတို့ နှစ်ပေါင်း ၆၀ ကြာ ဝေးကွာနေတဲ့ အမှတ်ပေးဖလားကို ရယူ ပေးနိုင်စွမ်း ရှိတယ်လို့ ယုံကြည် နေပါတယ်။
ဟယ်ဆယ်ဘိန့် က “ဒါဟာ ချဲလ်ဆီး ပရိတ်သတ်တွေ အတွက် နာကျင်စရာ ဖြစ်မယ် ဆိုတာ ကျွန်တော် သိပေမယ့် စပါးဟာ အမှတ်ပေးဖလား ဆွတ်ခူး နိုင်စွမ်း ရှိတယ်လို့ ကျွန်တော် ထင်ပါတယ်။ သူတို့ရဲ့ တိုက်စစ်ကို ကြည့်လိုက်ပါ။ ဂါရက်ဘေး ၊ ဆွန်ဟောင်မင်း နဲ့ ဟယ်ရီကိန်း တို့ ရှိနေပါတယ်။ စာရွက်ပေါ်မှာ သူတို့ဟာ အင်္ဂလန်ရဲ့ အကောင်းဆုံး front three ဖြစ်ပါတယ်။ ပြီးတော့ အရန်ခုံ ကနေ သူတို့နေရာကို အစားထိုးမယ့် ကစားသမားတွေကို ကြည့်လိုက်ပါ။ ဘာဝင် ၊ မော်ရာ ၊ ဗီနီရှက် တို့လို ကစားသမားတွေ ရှိနေပါတယ်။
လိဂ်ပြိုင်ပွဲက အခြား အသင်းတွေ ခင်ဗျားတို့ ကြည့်လိုက်ပါ။ လီဗာပူးဟာ နောက်တန်း ပြသနာတွေ ရှိနေပါတယ်။ မန်စီးတီး ကလည်း ခံစစ်ပိုင်း ပြသနာ ရှိပါတယ်။ ချဲလ်ဆီး နဲ့ ယူနိုက်တက် တို့ကလည်း ဒီအတိုင်း ပါပဲ။ ကျွန်တော် ကတော့ ဒီရာသီ ပရီးမီးယားလိဂ်ရဲ့ top 4 ဟာ လီဗာပူး ၊ မန်စီးတီး ၊ တော့တင်ဟမ် နဲ့ ချဲလ်ဆီး တို့ပဲ ဖြစ်မယ်လို့ ထင်ပါတယ်။ ဒါပေမယ့် တော့တင်ဟမ် ကလည်း ပရီးမီးယားလိဂ် ဖလားကို မထင်မှတ်ဘဲ ဆွတ်ခူး သွားနိုင်ပါတယ်။” လို့ ပြောလိုက်ပါတယ်။
