တနင်္ဂနွေနေ့ညက ကစားသည့်ပွဲတွင် အင်္ဂလန်က ယူကရိန်းကို ၂-၀ ဖြင့်အနိုင်ရရှိခဲ့သည်။ ထိုပွဲတွင် အင်္ဂလန်အတွက်ဂိုးများကို ကိန်း(၃၇ မိနစ်)နှင့် ဆာကာ (၄၀ မိနစ်)တို့က သွင်းယူပေးခဲ့သည်။ ထိုပွဲတွင် ကိန်းသွင်းယူသည့် ဂိုးကိုလည်း ဆာကာကဖန်တီးပေးခဲ့ခြင်းဖြစ်ပြီး အင်္ဂလန်လူငယ်တိုက်စစ်မှူး၏ ခြေစွမ်းကို အသင်းမန်နေဂျာ ဆောက်ဂိတ်က ချီးမွမ်းခဲ့သည်။
အင်္ဂလန်သည် ယူကရိန်းကို ဝင်ဘလေတွင် ကစားကာ အနိုင်ရခဲ့ခြင်းဖြစ်ပြီး ယူရို ၂၀၂၄ ခြေစစ်ပွဲ ၂ ပွဲကစားရာတွင် ၆ မှတ်ရရှိခဲ့ပြီဖြစ်သည်။ ဆာကာသည် ပရီးမီးယားလိဂ်တွင် ထိပ်ဆုံးမှ ဦးဆောင်နေသော အာဆင်နယ်၏ တိုက်စစ်ကို ဦးဆောင်နိုင်သကဲ့သို့ပင် အင်္ဂလန်အသင်း၏ တိုက်စစ်ကို ဦးဆောင်နိုင်ကြောင်းလည်း သတင်းများက ဖော်ပြရေးသားခဲ့သည်။
“ဆာကာရဲ့ အဆုံးသတ်မှုတွေက ကမ္ဘာ့ထိပ်တန်းအဆင့် ရှိနေပါတယ်။ နောက်ဆုံး ၁၈ လလောက်မှာ ဆာကာက ပြိုင်ဘက်အသင်းရဲ့ ဂိုးရှေ့မှာ အညှာအတာကင်းမဲ့စွာ အဆုံးသတ်နိုင်မှု အရည်အချင်းကို ပိုပြီးတိုးတက်လာအောင် လုပ်နိုင်ခဲ့တယ်။ အရင်တုန်းက သူ့ရဲ့အဆုံးသတ်မှုမှာ မသေချာမှုအချို့ရှိခဲ့တယ်။ အခုတော့ ပြိုင်ဘက်ဂိုးပေါက်ရှေ့မှာ ဆာကာက ယုံကြည်ချက် အပြည့်နဲ့ အဆုံးသတ်နိုင်နေပြီဖြစ်ပါတယ်”ဟု အင်္ဂလန်အသင်းမန်နေဂျာ ဆောက်ဂိတ်က ပြောဆိုလိုက်သည်။
အင်္ဂလန်အသင်းအတွက် အခွင့်အရေး ၅ ကြိမ်ဖန်တီးပေးခဲ့သော လက်စတာအသင်းကွင်းလယ်လူ ဂျိမ်းစ်မက်ဒီဆင်ကိုလည်း ဆောက်ဂိတ်က ချီးကျူးပြောဆိုလိုက်သည်။ “အင်္ဂလန်က အသင်းကြီးတွေကို အနိုင်ယူနိုင်လားဆိုတဲ့ မေးခွန်းကိုအဖြေရှာဖို့အတွက် နည်းနည်းတော့ လိုအပ်နေပါသေးတယ်။ ဒါပေမယ့် အချိန်နဲ့အမျှ အတားအဆီးအချို့ကို ကျော်ဖြတ်နိုင်ခဲ့ပါတယ်။ အနိုင်ပွဲတွေလည်း ရနေပါတယ်။ တိုးတက်စရာတွေတော့ ရှိနေပါသေးတယ်။ အီတလီနဲ့ပွဲကို အနိုင်ရအပြီးမှာ နောက်တစ်ပွဲက အခုလို ရလဒ်ကောင်းခဲ့တာက အင်္ဂလန်အတွက် သိပ်ကောင်းပါတယ်။ ကျွန်တော်တို့က အနာဂတ်ကိုပဲ မျှော်ကြည့်နေပါတယ်။ မက်ဒီဆင်က အင်္ဂလန်အတွက် ပွဲကောင်းတစ်ပွဲကို ကစားပေးနိုင်ခဲ့ပါတယ်။ အသင်းရဲ့ခံစစ်ကိုလည်း မက်ဒီဆင်က ကူညီပေးနိုင်ခဲ့တယ်။ တိုနီဝင်ကစားနိုင်ခဲ့တာကိုလည်း ဝမ်းသာပါတယ်။ ယူရို ၂၀၂၄ ခြေစစ်ပွဲအောင်ဖို့ အာရုံစိုက်ရမယ်။ ကျိန်းသေ ခြေစစ်ပွဲအောင်မယ်လို့တစ်ထစ်ချယူဆထားလို့ မရသေးပါဘူး”ဟု ဆောက်ဂိတ်က ဆက်လက်ပြောဆိုသည်။ပွဲချိန် မိနစ် ၈၀ တွင် အိုင်ဗန်တိုနေးသည် ဟယ်ရီကိန်းနေရာ အစားဝင်၍ အင်္ဂလန်အသင်းအတွက် ပထမဆုံးအကြိမ်ပါဝင်ကစားခွင့်ရရှိခဲ့သည်။
