ဆယ်တီယန်၊ မက်ဆီတို့၏ အနာဂတ်များနှင့် ပတ်သက်၍ ဘာတိုမူ ရှင်းလင်းခဲ့ပြီး လော်တာရိုမာတီနက်ဇ်အတွက် ဆွေးနွေးမှုများကို ရပ်ဆိုင်းခဲ့ပြီဟု ပြောကြား

ဘာစီလိုနာအသင်း ဥက္ကဋ္ဌဖြစ်သူ ဘာတိုမူသည် အသင်းနည်းပြ ဆယ်တီယန်နှင့် အသင်းခေါင်းဆောင် မက်ဆီတို့၏ နူးကမ့်အနာဂတ်များနှင့်ပတ်သက်၍ ရှင်းလင်းမှုများပြုလုပ်ခဲ့ကြောင်း စပိန်အားကစားသတင်းစာ Marca က ဖော်ပြခဲ့သည်။

ဘာတိုမူသည် အသင်းနှင့် အနာဂတ်လှုပ်ခတ်နေသော နည်းပြ ဆယ်တီယန်ဘက်မှ အပြည့်အဝရပ်တည်နေသူဖြစ်ပြီး ဆယ်တီယန်အနေဖြင့် အသင်းတွင် နောက်ထပ်တစ်ရာသီကြာ ဆက်ရှိနေမည်ဖြစ်ကြောင်း ပြီးခဲ့သည့်ရက်သတ္တပတ်ကတည်းက အတည်ပြုထားသူဖြစ်သည်။

ဘာတိုမူက ”သူ့ (ဆယ်တီယန်)အနေနဲ့ အသင်း နဲ့ စာချုပ်သက်တမ်းကျန်ပါသေးတယ်။ ကျွန်တော်တို့အနေနဲ့ အသင်းအတွက် သူ့ကိုခေါ်ယူကတည်းက လက်ရှိရာသီအတွက်ရော၊ လာမယ့်ရာသီအတွက်ပါ အသင်းရဲ့အစီအစဉ်တွေနဲ့ အနာဂတ် စီမံကိန်းတွေကို ရှင်းပြခဲ့တာပါ။ လအနည်းငယ်ကြည့်ရုံနဲ့ နည်းပြရဲ့အရည်အသွေးကို ဆုံးဖြတ်လို့မရပါဘူး။ ဆယ်တီယန်အနေနဲ့ ကြားကာလမှာ ရောဂါကပ်ဘေးကို ရင်ဆိုင်ခဲ့ရပြီး ဒါဟာ ခက်ခဲခဲ့ပါတယ်”ဟု ပြောကြားခဲ့သည်။

ဆယ်တီယန်သည် လာလီဂါချန်ပီယံဆုအား လက်လွှတ်ခဲ့ရသလို၊ မက်ဆီအပါအဝင် အသင်း၏အဓိကကစားသမားအချို့နှင့် ဆက်ဆံရေးတင်းမာနေသည်ဟု မီဒီယာများ၏ဖော်ပြချက်များကြောင့် ဘာစီလိုနာအသင်းမှ ထွက်ခွာရတော့မည်ဟု သတင်းများထွက်ပေါ်နေသူဖြစ်သည်။

စပိန်မီဒီယာအချို့၏ဖော်ပြချက်တွင်မူ ဆယ်တီယန်အနေဖြင့် ချန်ပီယံလိဂ်ဖလားရယူနိုင်မှ ဘာစီလိုနာအသင်းတွင် ဆက်ရှိလိမ့်မည် ဖြစ်ကြောင်း သိရသည်။

ထို့ပြင် ဘာတိုမူက အသင်းမှထွက်ခွာတော့မည်ဟု သတင်းများထွက်ပေါ်နေသော အသင်းခေါင်းဆောင် မက်ဆီ၏အနာဂတ်နှင့်ပတ်သက်ပြီးလည်း ဖြေရှင်းမှုများပြုလုပ်ခဲ့ကြောင်း Marca က ဖော်ပြခဲ့သည်။

မက်ဆီနှင့်ပတ်သက်ပြီး ဘာတိုမူက ”သူ့ (မက်ဆီ)ရဲ့ ကစားသမားဘဝဟာ ဘာစီလိုနာအသင်းမှာပဲ ကုန်ဆုံးမှာပါ။ သူဟာ နောက်ထပ် (၃)နှစ် (သို့မဟုတ်) (၄)နှစ်လောက် ဘောလုံးကမ္ဘာအတွက် အကောင်းဆုံးတွေ ဖန်တီးပေးဦးမှာပါ။ မက်ဆီရဲ့ စာချုပ်သက်တမ်းဟာ လာမယ့်နှစ်မှာကုန်ဆုံးမှာဖြစ်ပေမယ့် ကျွန်တော့်ကတော့ သူ ဒီအသင်းမှာဆက်ရှိမယ်ဆိုတာကို သံသယမရှိပါဘူး”ဟု ပြောကြားခဲ့သည်။

မက်ဆီသည် လက်ရှိအသင်း၏အခြေအနေအပေါ် စိတ်ပျက်လျက်ရှိကြောင်း သတင်းများထွက်ပေါ်နေပြီး ဘာစီလိုနာအသင်းမှ ထွက်ခွာနိုင်ကြောင်း စပိန်မီဒီယာများက ဖော်ပြနေကြခြင်းဖြစ်သည်။

”လော်တာရိုလို အဆင့်အတန်းရှိတဲ့ ကစားသမားများကို ငြင်းဆန်ဖို့ခက်ပါတယ်။ လော်တာရိုနဲ့ပတ်သက်ပြီး အသင်းအနေနဲ့ ပြီးခဲ့တဲ့ရက်သတ္တပတ်တွေမှာ အင်တာမီလန်အသင်းနဲ့ ဆွေးနွေးမှုတွေရှိခဲ့ပါတယ်။ ဒါပေမဲ့ လက်ရှိမှာတော့ ဆွေးနွေးမှုရပ်ဆိုင်းခဲ့ပါပြီ။ လက်ရှိအခြေအနေမှာတော့ အသင်းအနေနဲ့ ကြီးမားတဲ့ရင်းနှီးမြှုပ်နှံမှုတွေကို ခွင့်ပြုမှာမဟုတ်ပါဘူး။ ဒါပေမဲ့ ကစားသမားအလဲအထပ်တော့ ဖြစ်လာနိုင်ပါတယ်”ဟု ပြောကြားခဲ့သည်။