ဂျာမနီအသင်းနှင့်ပွဲတွင် လူစားဝင်ရောက်ကစားခဲ့သည့် စပိန်လူငယ်တောင်ပံကစားသမား အန်ဆူဖာတီသည် အသင်းသမိုင်းတစ်လျှောက် ဒုတိယ အသက်အငယ်ဆုံးကစားသမားအဖြစ် မှတ် တမ်းဝင်ခဲ့ကြောင်း သိရသည်။
အန်ဆူဖာတီသည် စက်တင်ဘာ (၃)ရက်က ကစားခဲ့သည့် UEFA Nations League ပွဲစဉ် ဂျာမနီ (၁-၁) စပိန်ပွဲ၌ ပွဲချိန် (၄၆)မိနစ်တွင် ၀ါရင့်တောင်ပံကစားသမား နာဗတ်စ်အစား ဝင်ရောက်ကစားခဲ့ခြင်းဖြစ်သည်။
အန်ဆူဖာတီသည် ယင်းပွဲကစားချိန်တွင် အသက် (၁၇) နှစ် (၃၀၈) ရက်သာရှိသေးပြီး စပိန်ပြည်တွင်းစစ်ကာလဖြစ်သည့် ၁၉၃၆ ခုနှစ်တွင် (၁၇) နှစ် (၂၈၄)ရက်ဖြင့် အသက်အငယ်ဆုံး စံချိန်တင်ထားသည့် ဇူဘီယက်တာပြီးလျှင် ဒုတိယအငယ်ဆုံးအဖြစ် မှတ်တမ်းဝင်ခဲ့ခြင်း ဖြစ်သည်။
ဂီနီဘစ်ဆောနိုင်ငံ၌ မွေးဖွားခဲ့သူ အန်ဆူဖာတီသည် ဘာစီလိုနာအသင်းအတွက်လည်း သမိုင်းတစ်လျှောက် လာလီဂါနှင့် ချန်ပီယံလိဂ်ပြိုင်ပွဲတွင် အသက်အငယ်ဆုံး ဂိုးသွင်းသူအဖြစ် စံချိန်တင်ထားသည်။
အန်ဆူဖာတီသည် ပြီးခဲ့သည့် ၂၀၁၉-၂၀ ရာသီတွင် ဘာစီလိုနာအသင်းနှင့်အတူ ပရော်ဖက်ရှင်နယ်ကစားသမားဘဝကို စတင်ခဲ့သူ ဖြစ်သည်။
အန်ဆူဖာတီသည် ပြီးခဲ့သည့်ရာသီက ဘာစီလိုနာအသင်းအတွက် ပြိုင်ပွဲစုံ (၃၃)ပွဲတွင် (၈)ဂိုး သွင်းယူခဲ့သည်။
