အပြောင်းအရွှေ့လှုပ်ရှားမှုများတွင် စာရင်းဇယားလိမ်လည်မှုများနှင့် ကစားသမားလစာငွေ ပေးချေမှုများတွင် မသမာမှုများ ပြုလုပ်ခဲ့သဖြင့် (၁၅)မှတ်လျှော့ခံထားရသည့် ဂျူဗင်တပ်စ်အသင်း၏ ပြစ်ဒဏ်ကို အီတလီနိုင်ငံ၏အမြင့်ဆုံးအားကစားခုံရုံးက ပယ်ဖျက်ပေးခဲ့သော်လည်း UEFA ၏အရေးယူခြင်းခံရဖွယ်ရှိနေသေးကြောင်း သိရသည်။
ဂျူဗင်တပ်စ်အသင်းကို အဆိုပါစွဲချက်များအတွက် အီတလီဘောလုံးအဖွဲ့ချုပ်(FIGC)က ပြီးခဲ့သည့် ဇန်နဝါရီလအတွင်း (၁၅)မှတ်လျှော့ပြစ်ဒဏ် ချမှတ်ခဲ့ခြင်းဖြစ်သည်။
ထို့ပြင် အသင်းဥက္ကဋ္ဌဟောင်း အက်ဂ်နယ်လီနှင့် အားကစားဒါရိုက်တာဟောင်း ပါရာတီချီတို့ကိုလည်း ပွဲပယ်ပြစ်ဒဏ်များ ချမှတ်ခဲ့သည်။
အက်ဂ်နယ်လီအပါအဝင် ဂျူဗင်တပ်စ်အသင်း၏ ဘုတ်အဖွဲ့ဝင်များသည် စွဲချက်တင်ခံရသည့် အခြေအနေမှာပင် ရာထူးမှ နုတ်ထွက်ခဲ့ကြသော်လည်း ချမှတ်ခံရသည့် အမှတ်လျှော့ပြစ်ဒဏ်နှင့် ပတ်သက်၍မူ အယူခံတင်သွင်းခဲ့သဖြင့် ယခုအခါ အဆိုပါ စွဲချက်များအတွက် ပြန်လည်စစ်ဆေးသွားမည်ဖြစ်သလို၊ ရမှတ်လျှော့ပြစ်ဒဏ်ကိုလည်း ပယ်ဖျက်ပေးခဲ့ခြင်းဖြစ်ကြောင်း သိရသည်။
သို့သော် အီတလီအားကစားခုံရုံး၏ စစ်ဆေးမှုမှာ လာမည့်ရာသီစတင်ချိန်အထိ ပြီးဆုံးမည်မဟုတ်သဖြင့် ဂျူဗင်တပ်စ်အသင်းအနေဖြင့် UEFA ၏ အရေးယူခြင်း ခံရဖွယ်ရှိနေခြင်းဖြစ်ကြောင်း Calciomercato က ဖော် ပြခဲ့သည်။
UEFA သည် ပြီးခဲ့သည့် ၂၀၂၂ ခုနှစ်၊ စက်တင်ဘာလအတွင်း ဘဏ္ဍာရေးသာတူညီမျှစည်းမျဉ်း ချိုးဖောက်မှုဖြင့် ဂျူဗင်တပ်စ်အသင်းကို ဒဏ်ငွေ ယူရို (၃ .၅)သန်း ချမှတ်ထားသလို၊ သဘောတူညီချက်များ ချိုးဖောက်ပါက နောက်ထပ် ဒဏ်ငွေ ယူရို (၁၉ .၅)သန်းချမှတ်သွားမည်ဖြစ်ကြောင်း သတိပေးခဲ့သည်။
အကယ်၍ UEFA ၏ စည်းမျဉ်းများနှင့် ဂျူဗင်တပ်စ် ထပ်မံငြိစွန်းပါက လာမည့်ရာသီ ချန်ပီယံလိဂ်ပြိုင်ပွဲကစားခွင့် ပိတ်ပင်ခံရဖွယ်ရှိကြောင်း သိရသည်။
ရမှတ် (၁၅)မှတ်လျှော့ပြစ်ဒဏ် ပယ်ဖျက်ခံရပြီးနောက် ဂျူဗင်တပ်စ်အသင်းသည် အဆင့် (၇) နေရာမှ အဆင့် (၃)နေရာသို့ ရောက်ရှိလာပြီး ချန်ပီယံလိဂ်ဝင်ခွင့် မျှော်လင့်ချက်အားကောင်းလာသော်လည်း UEFA ၏ဆန္ဒကြောင့် စိတ်ပျက်ဖွယ်ရာဖြစ်နေသည်။
ဂျူဗင်တပ်စ်အသင်းနည်းပြ အယ်လီဂရီကမူ ” ပြစ်ဒဏ်ချမှတ်ခံရလို့ ဘယ်သူ့ကိုမှ လက်စားချေချင်စိတ် မရှိပါဘူး။ နိုင်ပွဲတွေ ထပ်ယူဖို့ပဲ ရည်ရွယ်ထားပါတယ်။ ရမှတ်လျှော့ပြစ်ဒဏ်က ကျွန်တော်တို့အသင်းကို သက်ရောက်မှုရှိစေပါတယ်။ အဲဒီပြစ်ဒဏ်ကြောင့် ကျွန်တော့်အသင်းကစားသမားတွေဟာ နေ့စဉ်နေ့တိုင်း ပိုမိုကြိုးစားလာပါတယ်။ ကစားသမားတွေက ပိုပြီးတိုးတက်လာသလို၊ ဟန်ချက်ပိုတည်ငြိမ်လာပါတယ်။ ကျွန်တော့်ကစားသမားတွေရဲ့ စွမ်းဆောင်ရည်အတွက် ပျော်ရွှင်မိပါတယ်” ဟု ပြောကြားခဲ့သည်။
