မန်ချက်စတာ ယူနိုက်တက် အသင်း ရဲ့ တိုက်စစ်မှူးဟောင်း ဖြစ်သူ အင်ဒီ ကိုးလ်က အသင်းဟောင်း အနေနဲ့ နောက်ထပ် တိုက်စစ် ကစားသမား တစ်ဦးကို ခေါ်ယူ လိုက်ခြင်းဖြင့်အကယ်ဒမီထွက်လူငယ် တိုက်စစ် ကစားသမားလေး မေဆွန် ဂရင်းဝုဒ် ရဲ့ တိုးတက်မှု တွေကို နှောင့်နှေးအောင်မလုပ်ဆောင်ဖို့ ဂရုစိုက် ရမှာ ဖြစ်ကြောင်း သတိပေး စကား ပြောကြား သွားခဲ့လိုက် ပါတယ် ။
မန်ချက်စတာ ယူနိုက်တက် အသင်းရဲ့ နည်းပြ ဖြစ်သူ အိုလီ ဂန်နား ဆိုးလ်ရှားဟာ ပြီးခဲ့တဲ့ ဘောလုံး ရာသီတုန်းက ဝါရင့် တိုက်စစ် ကစားသမား နှစ်ဦး ဖြစ်တဲ့ ရိုမီလူ လူကာကူ နဲ့ အလက်ဆစ် ဆန်းချက် တို့ကို အင်တာ မီလန် အသင်းဆီ သွားရောက် ကစားစေ ခဲ့ပြီး အသင်း ရဲ့ တိုက်စစ် အတွက် ရပ်ရှ်ဖို့ ၊ မာရှယ် နဲ့ ဂရင်းဝုဒ် တို့ကို အဓိကထား ကစား စေခဲ့ ပါတယ် ။
ဒီလို အနေအထား တစ်ရပ်မှာ အကယ်ဒမီထွက် လူငယ်လေး ဖြစ်တဲ့ မေဆွန် ဂရင်းဝုဒ်ဟာ ပရိသတ် တွေကို စိတ်မပျက် စေခဲ့ပဲ စွမ်းနိုင် သမျှ အကောင်းဆုံး ကစားနိုင် ခဲ့တဲ့ အတွက် ချီးကျုူးမှု တွေကို ပိုင်ဆိုင် နိုင်ခဲ့ပါတယ် ။ ဒါ့အပြင်ဂရင်းဝုဒ်ဟာအသင်းဖော်မာရှယ်နဲ့ရပ်ရှ်ဖို့တို့ရဲ့နောက်ယူနိုက်တက်ရဲ့ တတိယမြောက် ဂိုးသွင်း အများဆုံး ကစားသမားလည်း ဖြစ်နိုင်ခဲ့ ပါတယ် ။
ဒါပေမယ့်ယူနိုက်တက်အသင်းကတော့ဒီရာသီဖလားလက်မဲ့ဖြစ်ခဲ့တဲ့နောက်တိုက်စစ်ပိုင်းကိုအင္အား ဖြည့်တင်းဖို့ ရည်ရွယ် နေခဲ့ပြီး ဒေါ့မွန် အသင်းမှ ဂျေဒန်ဆန်ချိုကိုဦးစားပေးပစ်မှတ်အဖြစ်ထားရှိ နေခဲ့ ပါတယ် ။ အကယ်လို့ ယူနိုက်တက် ဆီကို ဆန်ချို ၊ ဒါမှမဟုတ် တိုက်စစ် ကစားသမား တစ်ဦး ရောက်ရှိလာခဲ့မယ်ဆိုရင်ဂရင်းဝုဒ်ရဲ့ပွဲထွက်ကစားခွင့်တွေဟာအကန့်အသတ်ဖြစ်သွားမှာအသေအချာ ပါပဲ ။
အခုတော့ ယူနိုက်တက် အသင်း အတွက် 275 ပွဲထိ ကစားပေးထား ခဲ့ပြီး 121 ဂိုးသွင်းယူပေးထားနိုင် ခဲ့တဲ့တိုက်စစ်မှူးဟောင်းအင်ဒီကိုးလ်ကအလားအလာကောင်းတဲ့အကယ်ဒမီထွက်ကစားသမားလေးရဲ့ တက်လမ်းတွေ ပိတ်ဆို့မသွားဖို့အသင်းဟောင်းအနေနဲ့သတိထားဖို့လိုအပ်ကြောင်းသတိပေး စကား ပြောကြား သွားခဲ့လိုက် ပါတယ် ။
” မေဆွန်ဟာ ကြောက်မက်ဖွယ် ပါပဲ ။သူဟာတစ်ကယ့်ကိုကြောက်မက်ဖွယ်ကောင်းတဲ့ကစားသမား တစ်ယောက်ပါ ။ အကယ်လို့ သူသာ အလားအလာကောင်း တွေကို ဆက်လက် ထိန်းသိမ်း နိုင်မယ် ဆိုရင် ယူနိုက်တက် တို့ဟာ တစ်ကယ့်ကို ကောင်းမွန်တဲ့ကစားသမားတစ်ဦးကိုသေချာပေါက်ပိုင်ဆိုင် နိုင်ပါ လိမ့်မယ် ”
” ဒီအတွက် မေဆွန် အနေနဲ့ လုပ်ဆောင်နေတာ တွေကို ဆက်လက် လုပ်ဆောင် ရပါ လိမ့်မယ် ။ သူ့ အနေနဲ့ဂိုးတွေသွင်းယူရင်းပွဲထွက်ခွင့်နေရာတစ်ခုအတွက်ဖိအားပေးနိုင်ဖို့လိုအပ်ပါတယ်။အကယ်လို့ သူဟာ ပိုမို ရင့်ကျက်ပြီး လေ့လာမှု တွေကို လုပ်ဆောင် နိုင်မယ်ဆိုရင်ယူနိုက်တက်တို့ဟာအရာရာကို ပိုင်ဆိုင် ထားတဲ့ ကစားသမား တစ်ဦးကို ရရှိ နိုင်ပါ လိမ့်မယ် ”
”သူဟာနံပါတ်9တစ်ဦးလိုကစားနိုင်သလိုသုံးယောက်တန်းတိုက်စစ်မှာတောင်ပံတိုက်စစ်ကစားသမား တစ်ဦး အဖြစ်လည်း ကစားပေး နိုင်စွမ်း ရှိပါတယ် ။ ဒါ့ကြောင့် ယူနိုက်တက်ဖက်က သူ့အတွက် ဘယ်နေရာအကောင်းဆုံးဖြစ်နိုင်မလဲ၊သူ့ဆီကဘယ်လိုအရည်အသွေးတွေကိုတွေ့မြင်ထားသလဲဆိုတာ တွေက စိတ်ဝင်စားစရာ ဖြစ်နေပါ လိမ့်မယ် ”
” ကျွန်တော့် အတွက် ကတော့လက်ရှိကမ္ဘာ့အကောင်းဆုံးနံပါတ်9ကတော့ရောဘတ်လီဝန်ဒေါစကီး ပါပဲ ။ ဒီလို ကစားသမားမျိုး အများကြီး မရှိကြ ပါဘူး ။ အကယ်လို့ ယူနိုက်တက်ဖက်ကဂျေဒန်ဆန်ချို ကို ခေါ်ယူချင်မယ်ဆိုရင်တော့မေဆွန်ဂရင်းဝုဒ်ရဲ့တိုးတက်မှုအတွက်အဟန့်အတားဖြစ်စေနိုင်မလား ဆိုတာကို ထည့်တွက် ရပါ လိမ့်မယ် ”
” ယူနိုက်တက် အနေနဲ့ အသင်းကို နှစ်စဉ် တိုးတက် ကောင်းမွန် စေနိုင်မယ့် ကစားသမားမျိုး တွေကို ခေါ်ယူ ရပါ လိမ့်မယ် ။ ဒါဟာ အသင်းအတွက်ကောင်းမွန်ပါလိမ့်မယ်။ဒါပေမယ့်အသင်းမှာမေဆွန်လို အလားအလာ ကစားသမား ရှိနေရင်တော့ သူ့ရဲ့ တိုးတက်မှု တွေကို ပိတ်ဆို့ စေနိုင်မယ့် ဆုံးဖြတ်ချက် ချမှတ်လို့ မရနိုင် ပါဘူး ” လို့ အင်ဒီ ကိုးလ် က သတိပေး သွားခဲ့လိုက် ပါတယ် ။
