ချယ်လ်ဆီးနှင့် ဂိုးမရှိသရေကျသည့်ပွဲတွင် လီဗာပူးလ်အသင်းခေါင်းဆောင် ဟန်ဒါဆန်နှင့် ဂိုးသမား အယ်လစ်ဆန်တို့ အချင်းများ

လီဗာပူးလ်အသင်း၏ အသင်းခေါင်းဆောင် ဟန်ဒါဆန်နှင့် ဂိုးသမား အယ်လစ်ဆန်တို့သည် ချယ်လ်ဆီးအသင်းနှင့် ဂိုးမရှိသရေကျသည့် ပွဲ၏ဒုတိယပိုင်းတွင် တစ်ဦးနှင့်တစ်ဦး ဒေါသတကြီးအော်ဟစ်ပြောဆိုခဲ့ကြကာ အချင်းများခဲ့ကြကြောင်း ဗြိတိန်သတင်းစာ Daily Mail က ဖော်ပြခဲ့သည်။

ဧပြီလ (၄)ရက်က ကစားခဲ့သည့် ပရီးမီးယားလိဂ်ပွဲစဉ် ချယ်လ်ဆီး (ဝ-၀) လီဗာပူးလ် ပွဲတွင် လီဗာပူးလ်အသင်းသည် အိမ်ရှင်ချယ်လ်ဆီးအသင်း၏ ဖိအားပေးခြင်းကိုခံခဲ့ရပြီး ချယ်လ်ဆီးကစားသမားများ အဆုံးသတ်မသေချာခြင်းကြောင့်သာ သရေ (၁)မှတ် ရရှိခဲ့ခြင်းဖြစ်သည်။

အဆိုပါပွဲစဉ်၏ ပွဲချိန် (၇၆)မိနစ်တွင် မာတစ်နှင့် အယ်လစ်ဆန်တို့၏ နားလည်မှုလွဲမှားမှုမှတစ်ဆင့် ချယ်လ်ဆီးတိုက်စစ်မှူး ဂျော်အိုဖေးလစ်ဂိုးကန်သွင်းခွင့် ရရှိခဲ့သော်လည်း အပေါ်ထောင်ကန်ခဲ့သဖြင့် လီဗာပူးလ်အသင်း ဂိုးမပေးခဲ့ရခြင်းဖြစ်သည်။

ယင်းကဲ့သို့ ဂျော်အိုဖေးလစ်ကို အခွင့်အရေးပေးခဲ့ခြင်းအတွက် ဟန်ဒါဆန်က မကျေမနပ်ဖြစ်ကာ မာတစ်နှင့် နားလည်မှုလွဲခဲ့သည့် အယ်လစ်ဆန်ကို ပြစ်တင်ခဲ့ခြင်းဖြစ်သည်။

သို့သော် အယ်လစ်ဆန်သည် ဟန်ဒါဆန်၏ ပြစ်တင်ပြောဆိုမှုကို လက်မခံဘဲ ဒေါသတကြီး ပြန်လည်တုံ့ပြန်ခဲ့ရာ ၎င်းတို့နှစ်ဦးသည် မိနစ်အနည်းငယ်ကြာ အချင်းများခဲ့ကြခြင်းဖြစ်သည်။

ဟန်ဒါဆန်သည် ယင်းပွဲတွင် ၎င်းကိုဘောလုံးပေးရန် နောက်ကျခဲ့သည့် နောက်ခံလူ မာတစ်ကိုလည်း အော်ဟစ်ခဲ့သေးသည်။ ဟန်ဒါဆန်နှင့် အယ်လစ်ဆန်တို့၏ ဖြစ်ရပ်နှင့်ပတ်သက်ပြီး TalkSport မှ စတူူးဝပ်ပီယာ့စ်က ယခုရာသီ လီဗာပူးလ်အသင်း၏ ရလဒ်ဆိုးများကြောင့် ကစားသမားများ ဒေါသထွက်နေကြခြင်းဖြစ်ကြောင်း ပြောကြားခဲ့သည်။

လီဗာပူးလ်အသင်းသည် ယခုရာသီ ပရီးမီးယားလိဂ် (၂၈) ပွဲကစားပြီးချိန်တွင် ရမှတ် (၄၃) မှတ်ဖြင့် အဆင့် (၈)နေရာ ရပ်တည်နေပြီး အဆင့် (၄)မှ မန်ယူအသင်း (၅၃ မှတ်)နှင့် (၁၀)မှတ် ကွာဟနေသည်။ လီဗာပူးလ်အသင်းသည် ဧပြီ (၉)ရက်တွင် ပရီးမီးယားလိဂ်ပွဲစဉ် (၃၀) အဖြစ် အမှတ်ပေးဇယားထိပ်ဆုံးမှ အာဆင်နယ်အသင်းကို အိမ်ကွင်း၌ လက်ခံကစားရမည်ဖြစ်သည်။