ချဲလ်ဆီး အသင်း ဟာ လာမယ့် ဘောလုံး ရာသီ မှာ အစွမ်းကုန် တောက်ပဖို့ အတွက် အခု ကတည်းက ထိပ်တန်း ကစားသမား တွေကို အရှိန်အဟုန်မြှင့် ခေါ်ယူ အားဖြည့်နေပြီ ဖြစ်ပါတယ် ။ လောလောဆယ် အချိန် အထိ ၎င်းတို့ဟာ တရားဝင် ကစားသမားသစ် ခေါ်ယူမှု ၅ခု အထိ ပြုလုပ်ထားပြီး ဖြစ်ပါတယ် ။
ဒီအထဲမှာ တိုက်စစ် အတွက် အားဖြည့်မှု ၂ခု ပါဝင်ပြီး ၊ ခံစစ် အတွက် အားဖြည့်မှု ၃ခု ပါဝင်ပါတယ် ။ လေဗာကူဆင် အသင်း မှ ဂျာမန် လူငယ် ကွင်းလယ် ကြယ်ပွင့် ကစားသမား ကိုင်ဟာဗက်ဇ် ကို ဆဋ္ဌမမြောက် ကစားသမားသစ် ခေါ်ယူမှု အဖြစ် ဒီ ရက်ပိုင်း အတွင်း ချဲလ်ဆီး တို့ ထုတ်ပြန် ကြေညာသွားဖွယ် ရှိနေပါတယ် ။
ဒီတော့ ချဲလ်ဆီး အသင်း ဖြေရှင်းဖို့ ကျန်တဲ့ နေရာ တနေရာ က ဂိုးသမား နေရာပဲ ရှိတော့ပြီး ၊ လောလောဆယ် ၎င်းတို့နဲ့ သတင်း အတော်လေး ပြေးနေသူက ရန်းနက်စ် အသင်း မှ အသက် ၂၈ နှစ် အရွယ် ဆီနီဂေါ ဂိုးသမား အက်ဒိုဝါ့ဒ် မန်ဒီ ဖြစ်ပါတယ် ။
ရန်းနက်စ် ဖက်ကတော့ မန်ဒီ အတွက် အနည်းဆုံး ပေါင်သန်း ၃၀ နဲ့ အထက် အလိုရှိနေပြီး ၊ ချဲလ်ဆီး ဖက်ကလည်း ၎င်းကို တရားဝင် ချဉ်းကပ်မှု တွေ ပြုလုပ်နေပါတယ် ။ တခြား ထိပ်တန်း ဂိုးသမား တချို့ လည်း ချဲလ်ဆီး နဲ့ သတင်း တစတစ ထွက်ခဲ့ဖူးပြီး ၊ ဒီအထဲမှာ ဘန်လေ အသင်း ရဲ့ ဂိုးသမား နစ်ပုပ် လည်း တယောက် အပါအဝင် ဖြစ်ပါတယ် ။
အင်္ဂလန် လက်ရွေးစင် ဂိုးသမား နစ်ပုပ် ဟာ ပြီးခဲ့တဲ့ ဘောလုံး ရာသီ က ဘန်လေ အသင်း နဲ့ အတူ ပြောင်မြောက်တဲ့ လက်စွမ်းကောင်း တွေ ပြသနိုင်ခဲ့ပြီး ၊ မန်စီးတီး ဂိုးသမား အီဒါဆင် ပြီးနောက် ဒုတိယမြောက် Clean Sheet အများဆုံး ဂိုးသမား အဖြစ် ရပ်တည်ခဲ့ပါတယ် ။
ယင်း အသက် ၂၈ နှစ် အရွယ် အင်္ဂလန် ဂိုးသမား ရဲ့ တန်ကြေး က ပေါင်သန်း ၅၀ နဲ့ အထက် ရှိနေတယ် ဆိုပေမယ့် ၊ ၎င်းဟာ ပရီးမီးယားလိဂ် အတွေ့အကြုံ ကြွယ်ဝပြီးသား ဂိုးသမား လည်း ဖြစ်ပါတယ် ။
ချဲလ်ဆီး ကွင်းလယ်လူဟောင်း ခရိတ် ဘာလီ ကတော့ ပုပ် ဟာ လာမယ့် ယူရို ပြိုင်ပွဲ မှာ ပထမ ဦးစားပေး ဂိုးသမား ဂျော်ဒန် ပစ်ဖို့ဒ် ကို ကျော်ဖြတ်ပြီး အင်္ဂလန် လက်ရွေးစင် အသင်း နဲ့ တောက်ပလာနိုင်တယ် လို့ ယုံကြည်ထားသလို ၊ ချဲလ်ဆီး အနေနဲ့ ပုပ် ကို ခေါ်ယူသင့်တယ် လို့လည်း အကြံပြု တိုက်တွန်းခဲ့ပါတယ် ။
ESPN ရုပ်သံ အစီအစဉ် တခုမှာ ဘာလီ က ” လက်ရှိ အပြောင်းအရွှေ့ ဈေးကွက် အတွင်း ခေါ်ယူလို့ ရနိုင်တဲ့ ဂိုးသမား တွေထဲမှာ ဘန်လေ က နစ်ပုပ် ဟာ အကောင်းဆုံး တွေထဲက တယောက် အဖြစ် ကျွန်တော် သတ်မှတ်ထားဆဲပါ ။ ဘန်လေ ဖက်ကတော့ သူ့အတွက် ပြောင်းရွှေ့ကြေး ဘယ်လောက် အထိ တောင်းဆိုမလဲ ဆိုတာကိုပဲ ခန့်မှန်းမရတာပါ ။ ”
” ဟုတ်ပါတယ် ။ ဘန်လေ ဖက်ကလည်း သူ့ကို ထုတ်ရောင်းဖို့ ဆန္ဒ မရှိလောက်ပါဘူး ။ ဒါပေမယ့် လာမယ့် ၂၀၂၁ မှာ ကျင်းပမယ့် ယူရို ပြိုင်ပွဲ မှာ ၊ ပြီးခဲ့တဲ့ ရာသီ က လက်စွမ်းမျိုး ကို ဆက်လက် ထိန်းသိမ်းထားနိုင်ခဲ့ရင် နစ်ပုပ် ဟာ အင်္ဂလန် ရဲ့ နံပါတ်တစ် ဂိုးသမား ဖြစ်လာနိုင်ပါတယ် ။ ”
” ဂျော်ဒန် ပစ်ဖို့ဒ် ဟာ နံပါတ်တစ် နေရာ မှာ ဆက်ရှိနေတော့မှာ မဟုတ်ပါဘူး ။ အကယ်၍ ပစ်ဖို့ဒ် သာ ပွဲထွက် ဂိုးသမား အဖြစ် ဆက်ဖမ်းခွင့် ရခဲ့ရင် ကျွန်တော်ဖြင့် အံ့သြမိမှာပါ ။ နစ်ပုပ် ဟာ ပြီးခဲ့တဲ့ ရာသီ က အများ သတိထားမိစေလောက်တဲ့ လက်စွမ်းမျိုး ပြသနိုင်ခဲ့သူပါ ။ ”
” ဖရန့် လမ်းပတ် ဖက်က နစ်ပုပ် အပေါ် ဘယ်လို သဘောထားမျိုး ရှိမှန်း ကျွန်တော် မသိပေမယ့် ၊ ကီပါ ရဲ့ ပြဿနာ ကို သူက ပိုကောင်းကောင်း ဖြေရှင်းပေးနိုင်ပါလိမ့်မယ် ။ ဒါပေမယ့် တခုရှိတာ က သူ့ရဲ့ ပြောင်းရွှေ့ကြေး က စကားပြောလာနိုင်ပါတယ် ။ ” လို့ ပြောကြားခဲ့ပါတယ် ။
