ကလေးများအတွက် ပရဟိတလုပ်နေခြင်းအပေါ် ရည်ရွယ်၍ လှောင်ပြောင်ခဲ့သည့် Daily Mail ကို ရပ်ရှ်ဖို့ဒ် ပြစ်တင်

ကလေးငယ်များအတွက် ပရဟိတလုပ်ငန်းများဆောင်ရွက်နေခြင်းအပေါ် ရည်ရွယ်၍ လှောင်ပြောင်ခဲ့သည့် ဗြိတိန်မီဒီယာ Daily Mail ကို မန်ယူအသင်းတိုက်စစ်မှူး ရပ်ရှ်ဖို့ဒ်က ပြစ်တင်ခဲ့သည်။

ရပ်ရှ်ဖို့ဒ်သည် ဗြိတိန်တစ်ဝန်းမှ ဆင်းရဲနွမ်းပါးသည့် ကလေးငယ်များ အခမဲ့ကျွေးမွေးသည့်အစီအစဉ်အတွက် အစိုးရထံ တောင်းဆိုမှုများပြုလုပ်ခဲ့သလို၊ ကိုယ်တိုင်ဦးဆောင်၍လည်း လှူဒါန်းမှုများ၊ ရန်ပုံငွေရှာဖွေပေးခြင်းများ ပြု လုပ်ခဲ့သဖြင့် MBE ဘွဲ့အပါအဝင် ဂုဏ်ပြုချီးကျူးမှုများစွာ ပိုင်ဆိုင်ခဲ့သည်။

ပြီးခဲ့သည့်အောက်တိုဘာလ (၁၅)ရက်တွင် Daily Mail သည် ”ဘယ်လိုရလဒ်မျိုးပါလိမ့်၊ လှုံ့ဆော်သူကြီးက ပေါင် (၂)သန်းကျော်သုံးပြီး ဇိမ်ခံအိမ်(၅)လုံး ဝယ်ထားပါလား”ဟု အဓိပ္ပာယ်ရသည့်ခေါင်းစဉ်ဖြင့် သတင်းတစ်ပုဒ်ဖော်ပြခဲ့သည်။

အဆိုပါသတင်းနှင့်ပတ်သက်၍ ရပ်ရှ်ဖို့ဒ်က စိတ်ပျက်ဒေါသထွက်ကာ Daily Mail ကို ပြစ်တင်ခဲ့ခြင်းဖြစ်သည်။

ရပ်ရှ်ဖို့ဒ်က ” ကျွန်တော့်အသက်က (၂၃)နှစ်ပဲရှိပါသေးတယ်။ ကျွန်တော့်ရဲ့ အနာဂတ်အတွက်သာမကဘဲ ကျွန်တော့်ရဲ့မိသားစုအတွက်ပါ ကြိုတင်ကာကွယ်ဖို့ လိုအပ်ပါတယ်။ ဒီလိုမျိုးဝယ်နိုင်အောင် ၂၀၂၀ ခုနှစ်အစကတည်းက အိမ်အတွက် ငွေပိုစုမယ်ဆိုပြီး ကျွန်တော် ဆုံးဖြတ်ခဲ့ပါတယ်။ လှုံ့ဆော်သူဆိုတဲ့အသုံးအနှုန်းမျိုးနဲ့ ဒီလိုသတင်းမျိုးတွေ မတင်စေချင်ဘူး” ဟု Twitter တွင်ရေးသား၍ ဝေဖန်ခဲ့ကြောင်း သိရသည်။

Ok, so let’s address this. I’m 23. I came from little. I need to protect not just my future but my family’s too. To do that I made a decision at the beg of 2020 to start investing more in property. Please don’t run stories like this alongside refs to ‘campaigning’. pic.twitter.com/coqla2i19d

— Marcus Rashford MBE (@MarcusRashford) November 15, 2020

ရပ်ရှ်ဖို့ဒ်၏ တိုက်တွန်းမှုကြောင့် ဗြိတိန်အစိုးရသည် ကလေးငယ်များကို အခမဲ့ကျွေးမွေးမည့်အစီအစဉ်အတွက် ပေါင်သန်း (၁၇၀)ထောက်ပံ့ပေးသွားမည်ဖြစ်ကြောင်း ပြီးခဲ့သည့်ရက်သတ္တပတ်အတွင်းက အတည်ပြုခဲ့သည်။