ပြီးခဲ့သည့်ရာသီက ဖလားသုံးလုံး ချန်ပီယံ မန်စီးတီးအသင်း ရရှိခဲ့သည့် ဝင်ငွေနှင့် လစာပေးချေမှုမှာ ဗြိတိန်ဘောလုံးလောကတွင် အများဆုံးဖြစ်ပြီး စဉ်ဆက်မပြတ်အောင် မြင်မှုများရယူသွားရန်အတွက် ကလပ်အ သင်းအနေဖြင့် ရင်းနှီးမြှုပ်နှံမှုများ ဆက်တိုက်ပြုလုပ်သွားမည်ဟု အသင်းဥက္ကဋ္ဌ အယ်လ်မူဘာရက်ခ်က ပြောကြားခဲ့သည်။
မန်စီးတီးအသင်းသည် ပြီးခဲ့သည့် ရာသီက ဝင်ငွေ ပေါင် ၇၁၂ ဒသမ ၈သန်းအထိ ရရှိခဲ့ပြီး ယင်းမှာ စပိန်ထိပ်သီး ရီးယဲလ်မက်ဒရစ်(ပေါင် ၇၂၄.၈ သန်း)ထက် ပေါင် ၂၂ သန်း နည်းပါးခဲ့သော်လည်း ဗြိတိန်ဘောလုံးလောကတွင် စံချိန်တင်ဝင်ငွေတစ်ရပ်ဖြစ်ခဲ့ကြောင်း သိရသည်။
မန်စီးတီးအသင်းအနေဖြင့် ပြီးခဲ့သည့်ရာသီက ပရီးမီးယားလိဂ်၊ ချန်ပီယံလိဂ်နှင့် FA ဖလားတို့ကို ရယူနိုင်ခဲ့ခြင်းကြောင့် စံချိန်တင်ဝင်ငွေ ရရှိခဲ့သော်လည်း လစာပေးချေမှုများပြားခြင်းနှင့် အခြားအသုံးစရိတ်များပြားတို့ကြောင့် အမြတ်ငွေ ပေါင် ၈၀ ဒသမ ၄ သန်းသာ ရရှိခဲ့ကြောင်း သိရသည်။
ဗြိတိန်သတင်းစာ Daily Mail ၏ ဖော်ပြချက်အရ မန်စီးတီးအသင်းသည် ပြီးခဲ့သည့်ရာသီက ကစားသမားများအပါအဝင် အ သင်းဝန်ထမ်းပေါင်း ၅၂၀ ဦးအတွက် လစာပေါင် ၄၂၂ ဒသမ ၈ သန်း ပေးချေခဲ့ရကြောင်း သိရသည်။
ယင်းမှာ မန်ယူအသင်း စီရော်နယ်လ်ဒို ပြန်လည်ခေါ်ယူခဲ့သည့်ရာသီက တစ်သင်းလုံးရှိဝန်ထမ်းများကို ပေးချေခဲ့ရသည့် ပေါင် ၃၈၄ သန်းကို ကျော်ကာ ဗြိတိန်ဘောလုံးလောကတွင် အများဆုံးအဖြစ် စံချိန်တင်ခဲ့ခြင်းဖြစ်သည်။
မန်စီးတီးအနေဖြင့် ဂိုးသွင်းစက်ဟော်လန်းအတွက် အခြေခံလစာအဖြစ် တစ်ပတ်လျှင် ပေါင် ၄၀၀၀၀၀ ဝန်းကျင် ပေးချေနေရကြောင်းလည်း သိရသည်။ မန်စီးတီးအသင်းသည် ပြီးခဲ့သည့်ရာသီထက် ဝင်ငွေ ပေါင် ၉၉ ဒသမ ၈ သန်း မြင့်တက်ခဲ့ပြီး အမြတ်ငွေမှာလည်း ပြီးခဲ့သည့်ရာသီ ပေါင် ၄၁ ဒသမ ၇ သန်းထက် ပိုမိုများပြားလာခဲ့ကာ ပေါင် ၈၀ ဒသမ ၄ သန်းအထိ ရှိလာခဲ့ကြောင်း BBC သတင်းဌာနက ဖော်ပြခဲ့သည်။
မန်စီးတီးအသင်းဥက္ကဋ္ဌ အယ်လ်မူဘာရက်ခ်ကမူ မိမိတို့အနေဖြင့် ရင်းနှီးမြှုပ်နှံမှုများ ဆက်တိုက်လုပ်ဆောင်သွားမည်ဟု ဖွင့်ဟခဲ့သည်။ “အောင်မြင်မှုတွေရရင် ရင်းနှီးမြှုပ်နှံမှုတွေ ဆက်လုပ်ရမှာပါ။ ကျွန်တော်တို့ရဲ့ဘဏ္ဍာရေးက တောင့်တင်းပါတယ်။ အခု ရရှိနေတဲ့ အောင်မြင်မှုတွေက အနာဂတ်အောင်မြင်မှုတွေအတွက် ကျွန်တော်တို့ကို ယုံကြည်မှုပေးပါတယ်”ဟု ၎င်းက ပြောကြားခဲ့သည်။
