၂၀၂၁-၂၂ ဘောလုံးရာသီတွင် ဥရောပဘောလုံးအဖွဲ့ချုပ် (UEFA) ၏ ဘဏ္ဍာရေးသာတူညီမျှစည်းမျဉ်း FFP ကို ချိုးဖောက်ခဲ့သည်ဟု သံသယရှိသည့် စောင့်ကြည့်ခံအသင်း ၂၀ တွင် အာဆင်နယ်အသင်း ပါဝင်နေလျက်ရှိကြောင်း ဗြိတိန်သတင်းစာ The Times က ဖော်ပြခဲ့သည်။
အာဆင်နယ်အသင်းသည် ပြီးခဲ့သည့် နှစ်နှစ်အတွင်း ကစားသမားသစ်ခေါ်ယူမှုအတွက် ပေါင်သန်း ၂၇၀ အထိ သုံးစွဲခဲ့ပြီး ပရီးမီးယားလိဂ်ကလပ်များထဲ၌ ချယ်လ်ဆီးအသင်း(ပေါင် ၂၈၈ သန်း)ပြီးနောက် ဒုတိယအများဆုံးဖြစ်ခဲ့သည်။
သို့သော် အာဆင်နယ် အသင်းသည် Bix Six ကလပ်အသင်းများ အကြားတွင် အသားတင်အသုံးစရိတ်အများဆုံးအဖြစ် ပေါင် ၂၁၈ သန်းအထိ ရှိခဲ့သည်။ အာဆင်နယ်အသင်းသည် နည်းပြ အာတီတာ ရာသီပြည့်ကိုင်တွယ်သည့် ၂၀၂၀-၂၁ ရာသီတွင် ကစားသမားသစ်ခေါ်ယူမှုများအတွက် ပေါင် ၇၅ သန်းဝန်းကျင်သာ သုံးစွဲခဲ့သော်လည်း ပြီးခဲ့သည့် ၂၀၂၁-၂၂ ရာသီနှင့် ယခုနွေရာသီကာလများတွင် ငွေကြေးသုံးစွဲမှု ပမာဏ မြင့်တက်လာခဲ့သည်။
၂၀၂၁-၂၂ ဘောလုံးရာသီတွင် ဘင်ဝှိုက်၊ အော်ဒီဂွါ၊ ရမ်းစ်ဒေးလ်၊ တော်မီယာဆု၊ လိုကွန်ဂါ၊ တာဗာရက်စ်တို့ကို ခေါ်ယူမှုအတွက် ပေါင် ၁၄၂ သန်းကျော် သုံးစွဲခဲ့ပြီး ယခုနွေရာသီအပြောင်း အရွှေ့ဈေးကွက်တွင် ဂျေးဇူး၊ ဇင်ချန်ကို၊ ဗီယေရာ၊ မာကင်ဟို့စ်၊ တာနာစသည့် ကစားသမားခေါ်ယူမှုအတွက် ပေါင်သန်း ၁၀၀ ကျော် သုံးစွဲထားသည်။
သို့သော် အာဆင်နယ်အသင်း၏ကစားသမားခေါ်ယူမှုများ မပြီးဆုံးသေးဘဲ ဝုလ်ဗ်တောင်ပံကစားသမား နေတို၊ ကွင်းလယ်နေရာအတွက် တီလေမန်းစ်၊ တိုနာလီနဲ့ ကိုင်စီဒိုထဲက တစ်ဦးဦးကို ကြိုးပမ်းနေကြောင်း သတင်းများက ဖော်ပြခဲ့သည်။
UEFA က ပြီးခဲ့သည့်နှစ်အနည်းငယ်အတွင်း အာဆင်နယ်အသင်း၏ လွတ်လပ်စွာ ငွေကြေးသုံးစွဲမှုများကို စိုးရိမ်နေလျက်ရှိကြောင်း သိရသည်။ အာဆင်နယ်အသင်းသည် ချန်ပီယံလိဂ်ပြိုင်ပွဲကို ၂၀၁၇ ခုနှစ်က တည်းက ယှဉ်ပြိုင်ခွင့်မရတော့သည့်အပြင် ပြီးခဲ့သည့်ရာသီက ဥရောပပြိုင်ပွဲတစ်ခုခုကို ပါဝင်ကစားနိုင်ခြင်းမရှိသည့်အနေအထားသို့ ရောက်ရှိခဲ့သည်။
ယင်းသို့အခြေအနေမျိုးတွင် အာဆင်နယ်အသင်း၏ငွေကြေးသုံးစွဲမှုများက စဉ်းစားစရာဖြစ်စေသည်ဟုလည်း The Times က သုံးသပ်ထားသည်။ The Times ၏သတင်းတွင် အာဆင်နယ်အသင်းနှင့်နီးစပ်သူများက အသင်းသည် UEFA စည်းမျဉ်းများနှင့် ကိုက်ညီပြီး သတိပေးချက်မပါသည့်စာကို လက်ခံရရှိထားသည်ဟု ပြောကြားကြောင်း ရေးသားထားသည်။
Financial Blogger ဖြစ်သည့် Swiss Ramble က အာဆင်နယ်အသင်းသည် ၂၀၁၈ မှ ၂၀၂၁ ခုနှစ်အထိ နောက်ဆုံးသုံးနှစ်တာကာလအတွင်း အခွန်မဆောင်မီ လိုငွေပြမှုမှာ ပေါင် ၂၁၃ သန်းအထိရှိခဲ့ပြီး အဲဗာတန်(ပေါင် ၃၇၃ သန်း)၊ ချယ်လ်ဆီး(ပေါင် ၂၂၂ သန်း)ပြီးနောက် တတိယအများဆုံးဖြစ်ခဲ့သည်။
