အေစီမီလန်အသင်း ၀ါရင့်တိုက်စစ်မှူး အီဘရာဟီမိုဗစ်သည် ဥရောပထိပ်တန်းလိဂ်ပြိုင်ပွဲများတွင် ပြိုင်ဘက်အသင်း ၈၀ အား ဂိုးသွင်းယူထားနိုင်သည့် စီရော်နယ်လ်ဒို၏စံချိန်ကို အမီလိုက်နိုင်ခဲ့ကြောင်း သိရသည်။
အသက် ၄၀ ရှိပြီဖြစ်သည့် အီဘရာဟီမိုဗစ်သည် တနင်္ဂနွေနေ့က ဗင်နီဇီယာအသင်းအား အဝေးကွင်း၌ သုံးဂိုးပြတ်အနိုင်ရသည့်ပွဲတွင် အဖွင့်ဂိုးကို ပွဲအစနှစ်မိနစ်မှာပင် သွင်းယူပေးခဲ့သည်။
ယင်းဂိုးမှာ အီဘရာဟီမိုဗစ်အတွက် ယခုရာသီ စီးရီးအေပြိုင်ပွဲတွင် ရှစ်ဂိုးမြောက်သွင်းဂိုးဖြစ်သလို ပရော်ဖက်ရှင်နယ်ကစားသမားဘဝ ၂၂ နှစ်အတွင်း ဥရောပ ထိပ်တန်းလိဂ်ပြိုင်ပွဲများ၌ မတူညီသည့်ပြိုင်ဘက်အသင်း ၈၀ အား ဂိုးသွင်းယူနိုင်ခြင်းဖြစ်သည်။
၎င်းကဲ့သို့ ပြိုင်ဘက်အသင်း ၈၀ အား ဂိုးသွင်းယူထားနိုင်သူအဖြစ် မန်ယူအသင်းတိုက်စစ်မှူး စီရော်နယ်လ်ဒိုက ဒီဇင်ဘာ ၃၀ ရက်တွင် ဘန်လေအသင်းနှင့်ပွဲ၌ မှတ်တမ်းဝင်ထားပြီး အီဘရာဟီမိုဗစ်က ဒုတိယမြောက်ကစားသမားအဖြစ် မှတ်တမ်းဝင်ခဲ့ပြီဖြစ် သည်။
အီဘရာဟီမိုဗစ်သည် ၁၉၉၉-၂၀၀၀ ရာသီတွင် မာလ်မိုအသင်းနှင့် ပရော်ဖက်ရှင်နယ်ကစားသမားဘဝ စတင်ခဲ့ပြီး ၂၂ နှစ် အတွင်း အေဂျက်စ်၊ ဂျူဗင်တပ်စ်၊ အင်တာမီလန်၊ PSG၊ မန်ယူ၊ LAဂလက်ဆီနှင့် အေစီမီလန်အသင်း (နှစ်ကြိမ်) တွင် ပါဝင်ကစားကာ ပြိုင်ပွဲစုံ ၈၅၂ ပွဲကစား၊ ဂိုး ၅၁၀ သွင်းယူထားသည်။
၎င်းနှင့် အေစီမီလန်အသင်း၏စာချုပ်မှာ ယခုရာသီကုန်တွင် ကုန်ဆုံးမည်ဖြစ်သော်လည်း ၂၀၂၃ ခုနှစ်အထိ တစ်နှစ်သက်တမ်း တိုးဖွယ်ရှိနေသည်။
