ဥရောပစူပါလိဂ်စီမံကိန်းတွင် နောက်ဆုံးကျန်ခဲ့သည့် ရီးယဲလ်မက်ဒရစ်၊ ဘာစီလိုနာနှင့် ဂျူဗင်တပ်စ်တို့ စီမံကိန်းကို မစွန့်လွှတ်သေး

ပြီးခဲ့သည့် ဧပြီလအတွင်းက အဆုံးသတ်သွားခဲ့သည့် ဥရောပစူပါလိဂ်စီမံကိန်းမှ မနုတ်ထွက်သေးဘဲ ကျန်ရှိနေသော နောက်ဆုံး (၃)သင်းဖြစ်သည့် ရီးယဲလ်မက်ဒရစ်၊ ဘာစီလိုနာနှင့် ဂျူဗင်တပ်စ်အသင်းတို့သည် ယခုအချိန်အထိ ၎င်းတို့၏ စီမံကိန်းကို မစွန့်လွှတ်သေးကြောင်း သိရသည်။

ယင်းအသင်းအားလုံးသည် ဥရောပဘောလုံးလောက၌ ထိပ်ဆုံးတန်းတွင် ရပ်တည်နေသည့်အသင်းများဖြစ်ပြီး ၎င်းတို့ ကျရှုံးခဲ့သည့် ဥရောပစူပါလိဂ်အစီအစဉ်ကို ပုံစံသစ်တစ်မျိုးဖြင့် ပြန်လည်တည်ဆောက်ရန် စီစဉ်နေခြင်းဖြစ်သည်။

ရီးယဲလ်မက်ဒရစ်အသင်းဥက္ကဋ္ဌ ဖလော်ရင်တီနိုပီရက်ဇ်၊ ဘာစီလိုနာအသင်းဥက္ကဋ္ဌ လာပေါ်တာနှင့် ဂျူဗင်တပ်စ်အသင်းဥက္ကဋ္ဌ အက်ဂ်နယ်လီတို့သည် မကြာမီ တွေ့ဆုံဆွေးနွေးမှုပြုလုပ်ရန် စီစဉ်နေပြီး ပြန်လည်တည်ဆောက်ခြင်း၊ ပြန်လည်စတင်ခြင်းနှင့် အောင်မြင်မှုရယူခြင်းဆိုသည့် အဆင့် (၃)ဆင့်ကို ဆောင်ရွက်သွားမည်ဖြစ်ကြောင်းလည်း သိရှိရသည်။

ဥရောပစူပါလိဂ်ပြိုင်ပွဲသည် မူလက ဥရောပထိပ်တန်းကလပ်အသင်းကြီး (၁၂)သင်းဖြင့် ဖွဲ့စည်းကာ လိဂ်ပြိုင်ပွဲပုံစံ ယှဉ်ပြိုင်ရန် စီစဉ်ခဲ့ခြင်းဖြစ်ပြီး ပရိသတ်များ၏ ဆန္ဒပြမှုများကြောင့် နောက်ပိုင်းတွင် ပရီးမီးယားလိဂ်အသင်းကြီးများက ပြန်လည်နုတ်ထွက်သွားခဲ့ကြပြီး၊ စီးရီးအေမှ အင်တာမီလန်နှင့် အေစီမီလန်၊ လာလီဂါမှ အက်သလက်တီကိုမက်ဒရစ်တို့ကပါ နုတ်ထွက်ခဲ့သဖြင့် ၎င်းတို့ (၃)သင်းသာ ကျန်ရှိတော့ခြင်းဖြစ်သည်။

၎င်းတို့ကမူ ကလပ်အသင်းများသည် ဖိအားများကြောင့်သာ နုတ်ထွက်ခဲ့ရခြင်းဖြစ်ပြီး ပရိသတ်များ ကျေနပ်သဘောကျမည့် ပုံစံသစ်တစ်မျိုးဖြင့် ပြန်လာမည်ဟု ဆိုခဲ့ကာ ဆွေးနွေးမှုများ ပြန်လည်ပြုလုပ်ရန် စီစဉ်နေခြင်းလည်းဖြစ်သည်။