UFC ၏ ဂန္ထဝင်ကစားသမားတစ်ဦးဖြစ်သည့် ခါဘိက သူသည် အဲဗာတန်အသင်းနှင့် သရေကျခဲ့သည့်ပွဲတွင် မိမိ၏ သူငယ်ချင်းဖြစ်သည့် စီရော်နယ်လ်ဒိုကို အားပေးရန် အိုးလ်ထရက်ဖို့ဒ်သို့ သွားရောက်ကြည့်ရှုခဲ့ကြောင်းနှင့် မန်ယူအသင်း ဂန္ထဝင်နည်းပြကြီး ဖာဂူဆန်က ၀ိုင်အတူသောက်ရန် ကမ်းလှမ်းမှုကို ငြင်းဆန်ခဲ့ကြောင်း ပြောကြားခဲ့သည်။
ခါဘိသည် ယင်းပွဲတွင် စီရော်နယ်လ်ဒိုကို လာရောက်အားပေးခဲ့ ခြင်းဖြစ်ပြီး ဖာဂူဆန်၊ ယူစိန်ဘော့၊ ပက်ထရစ်အီဗရာတို့နှင့်အတူ ရှိနေခဲ့သည်ဟုလည်း သိရှိရသည်။
ထို့ပြင် ဖာဂူဆန်၏ ၀ိုင်အတူသောက်ရန် ကမ်းလှမ်းမှုကို ယဉ်ကျေးစွာ ငြင်းပယ်ခဲ့သည်ဟု ဆိုခဲ့ပြီး ”ကျွန်တော် ဘာကြောင့် မသောက်ရတာလဲဆိုတဲ့အကြောင်း သူ့ကိုရှင်းပြခဲ့ပါတယ်။ အကြောင်းပြချက်က နှစ်ခုရှိပါတယ်။ ပထမတစ်ခုက ကျွန်တော်က မူဆလင် ဖြစ်နေလို့ပါ။ ပြီးတော့ ကျွန်တော် သူ့ကို နောက်ပြောင်ပြီးတော့လည်း ပြောခဲ့ပါသေးတယ်။ ဘာကြောင့် ကျွန်တော် မသောက်တာလဲဆိုတော့ ကျွန်တော်မူးလာရင် အားလုံးကို အလဲထိုးမိလိမ့်မယ်။ ဒီလိုဖြစ်ခဲ့ရင် မကောင်းပါဘူးဆိုပြီး ငြင်းခဲ့တာပါ ”ဟု ပြောကြားခဲ့သည်။
ခါဘိသည် သူ၏ Instagram တွင် ဖာဂူဆန်နှင့်အတူယှဉ်တွဲကာ ရိုက်ထားသည့် ဓာတ်ပုံကိုလည်း တင်ခဲ့ပြီး ”တကယ့် ဂန္ထဝင်ကြီးတစ်ဦးနဲ့ စကားပြောခွင့်ရခဲ့တာ ကျွန်တော့်အတွက် ဂုဏ်ယူစရာပါပဲ”ဟုလည်း ရေးသားခဲ့သည်။
