အိုနာနာ၏ ပြောင်းရွှေ့ကြေးမှာ ဂိုးသမားများအတွက် တတိယအမြင့်ဆုံးဖြစ်လာခဲ့ပြီး အသင်းဖော်များကို အနိုင်ရလိုစိတ်ထည့်သွင်းပေးနိုင်မည့်သူဟု မန်ယူအသင်း ဘောလုံးဒါရိုက်တာ ဂျွန်မာတော့ သုံးသပ်

အင်တာမီလန်အသင်းမှ မန်ယူအသင်းသို့ ပြောင်းရွှေ့လာသည့် ဂိုးသမား အိုနာနာ၏ ပြောင်းရွှေ့ကြေးမှာ ကမ္ဘာတစ်ဝန်းရှိ ဂိုးသမားများအနက် တတိယမြောက် ပြောင်းရွှေ့ကြေး အမြင့်ဆုံးဖြစ်ကြောင်း သိရသည်။

မန်ယူအသင်းက အသက် ၂၇ နှစ်အရွယ် ကင်မရွန်းလက်ရွေးစင်ဂိုးသမား အိုနာနာကို ၂၀၂၈ ခုနှစ်အထိ သက်တမ်းရှိသည့် ငါးနှစ်စာချုပ်အပြင် တစ်နှစ်ထပ်မံတိုးမြှင့်နိုင်သည့် အချက်ဖြင့် ခေါ်ယူနိုင်ပြီဖြစ်ကြောင်း ကြာသပတေးနေ့ ညပိုင်းတွင် ထုတ်ပြန်ခဲ့သည်။ 

၎င်းအတွက် ပေးချေရသည့် ပြောင်းရွှေ့ကြေး ကို ထုတ်ပြန်ခြင်းမရှိသော်လည်း Add-ons ကြေးအပါအဝင် ပေါင် ၄၇ ဒသမ ၂ သန်း (ယူရို ၅၅ သန်း) ပေးချေရမည်ဖြစ်ကြောင်း ဗြိတိန်သတင်းဌာနများက ဖော်ပြခဲ့သည်။ မန်ယူ အသင်းအနေဖြင့် ၎င်းအတွက် ကနဦးပြောင်း ရွှေ့ကြေး ပေါင် ၄၃ ဒသမ ၈ သန်း ပေးချေရ မည်ဖြစ်ပြီး စွမ်းဆောင်ရည်နှင့် အောင်မြင်မှုအပေါ် မူတည်၍ ပေါင် ၃ ဒသမ ၄ သန်း ထပ်မံပေးချေရမည်ဖြစ်သည်။

သို့ဖြစ်ရာ ၎င်းင်း၏ပြောင်းရွှေ့ကြေးမှာ ကမ္ဘာတစ်ဝန်းရှိ ဂိုးသမားများအနက် တတိယပြောင်းရွှေ့ကြေးအမြင့်ဆုံးအဖြစ် မှတ်တမ်းဝင်မည်ဖြစ်ကြောင်း သိရသည်။ ကမ္ဘာတစ်ဝန်း ပြောင်းရွှေ့ကြေးအမြင့်ဆုံး ဂိုးသမားအဖြစ် စံချိန်တင်ထားသူမှာ ၂၀၁၈ ခုနှစ် နွေ ရာသီတွင် ဘီလ်ဘာအိုအသင်းမှ ချယ်လ်ဆီး အသင်းသို့ ယူရိုသန်း ၈၀ ဖြင့် ပြောင်းရွှေ့ခဲ့သူ စပိန်ဂိုးသမား ကယ်ပါဖြစ်ပြီး ယင်းနှစ်မှာပင် ရိုးမားအသင်းမှ လီဗာပူးလ်အသင်းသို့ ယူရို ၆၂ ဒသမ ၅ သန်းဖြင့် ပြောင်းရွှေ့ခဲ့သူ ဘရာဇီးလ်ဂိုးသမား အယ်လစ်ဆန်က ဒုတိယနေရာ ရပ်တည်လျက်ရှိသည်။ 

အိုနာနာသည် အေဂျက်စ်အကယ်ဒမီမှ ထွက်ပေါ်လာသူဖြစ်ပြီး အေဂျက်စ်အသင်း၌ ကာလရှည်လက်တွဲခဲ့ဖူးသည့် အဲရစ်တန်ဟက်နှင့် ပြန်လည်လက်တွဲ ခွင့်ရမည်ဖြစ်သည်။ ထို့ပြင် ၎င်းသည် အေဂျက်စ်နှင့် အင်တာမီလန်အသင်း၌ ဝတ်ဆင်ခဲ့သည့် နံပါတ် ၂၄ ကိုပင် ဆက်လက်ဝတ်ဆင်ရန် ရွေးချယ်ခဲ့ကြောင်း သိရသည်။

အိုနာနာကို ခေါ်ယူနိုင်ပြီးနောက် မန်ယူအသင်း ဘောလုံးဒါရိုက်တာ ဂျွန်မာတော့က “အန်ဒရေက မန်ချက်စတာယူနိုက်တက်ဂိုးသမားဖြစ်လာဖို့ ကျွန်တော်တို့ရဲ့ ထိပ်တန်းရွေးချယ်မှုပါ။ သူက ကိုယ်ပိုင်အရည်အချင်းနဲ့ နည်းစနစ်ပိုင်းအရ အတိအကျကိုက်ညီမှု ရှိတဲ့သူပါ။ ကစားသမားဘဝတစ်လျှောက်လုံးလည်း အောင်မြင်မှုတွေရရှိထားပြီး အန်ဒရေက ကျွန်တော်တို့တည်ဆောက်နေတဲ့ ကစားသမားတွေဆီ အနိုင်ရလိုစိတ် ထပ်ပေါင်းထည့်ပေးနိုင်မှာ သိပါတယ်” ဟု ပြောကြားခဲ့သည်။

ပြောင်းရွှေ့ကြေးအမြင့်ဆုံး ဂိုးသမားစာရင်း

အမည်        မှ        သို့        ယူရို

ကယ်ပါ        ဘီလ်ဘာအို    ချယ်လ်ဆီး    ၈၀ သန်း

အယ်လစ်ဆန်    ရိုးမား        လီဗာပူးလ်    ၆၂.၅ သန်း

အိုနာနာ        အင်တာမီလန်    မန်ယူ        ၅၅ သန်း

ဘူဖွန်        ပါးမား        ဂျူဗင်တပ်စ်    ၅၃ သန်း

အီဒါဆန်        ဘင်ဖီကာ        မန်စီးတီး        ၄၀ သန်း