ပရီးမီးယားလိဂ်အမှတ်ပေးဇယားထိပ်ဆုံးတွင် ဦးဆောင်နေသည့် အာဆင်နယ်အသင်း၏ လက်ရှိခြေစွမ်းကို နည်းပြဟောင်း အာစင်ဝင်းဂါး ကြိုက်နှစ်မည်ဟု မျှော်လင့်ကြောင်း ဝက်စ်ဟမ်းအသင်းအား (၃-၁)ဂိုးဖြင့် အနိုင်ရရှိခဲ့သည့် ပရီးမီးယားလိဂ်အိမ်ကွင်းပွဲစဉ်အပြီးတွင် ပြောကြားခဲ့သည်။
အာဆင်နယ်အသင်းသမိုင်းကြောင်းတွင် အအောင်မြင်ဆုံးနည်းပြဖြစ်ခဲ့သူ အာစင်ဝင်းဂါးသည် ဝက်စ်ဟမ်းနှင့်ပွဲကို ကွင်းအတွင်း လာရောက်ကြည့်ရှုခဲ့သည်။ အာစင်ဝင်းဂါး အနေဖြင့် ကလပ်အသင်းကို ၂၂ နှစ်ကြာ နည်းပြခဲ့ပြီးနောက် ၂၀၁၈ ခုနှစ်တွင် အသင်း နှင့် လမ်းခွဲခဲ့ခြင်းဖြစ်သည်။
လက်ရှိတွင် ကမ္ဘာ့ဘောလုံးအဖွဲ့ချုပ် (FIFA) ၏ဘောလုံးဖွံ့ဖြိုး တိုးတက်ရေးအကြီးအကဲအဖြစ် ဆောင်ရွက်နေသည့် အာစင်ဝင်းဂါးသည် အာဆင်နယ်နှင့်လမ်းခွဲပြီးနောက်ပိုင်း ယခုမှ အသင်းသို့ ပြန်လည်ရောက်ရှိလာခြင်းဖြစ်သည်။ ၎င်းကို အာဆင်နယ်အသင်းပရိသတ်များကလည်း တစ်ခဲနက် ကြိုဆိုခဲ့ကြသည်။
“သူ(အာစင်ဝင်းဂါး)တက်ရောက်မှုဟာ ဒီဘောလုံးကလပ်အသင်းနဲ့ အရမ်းဆက်နွယ်မှုရှိပြီး အရေးပါတဲ့ အရာပါပဲ။ ဒီအတွက် သူ့ကို အများကြီးကျေးဇူးတင်ပါတယ်။ ဘာကြောင့်လဲဆိုတော့ ကလပ်မှာရှိတဲ့ လူတိုင်းအတွက် အဓိပ္ပာယ်များစွာ ရှိလို့ပါပဲ။ သူ့အနေနဲ့ ကျွန်တော်တို့နဲ့အတူ ပိုပြီးအချိန်ဖြုန်းပေးဖို့ ဆန္ဒရှိနေမယ်လို့လည်း မျှော်လင့်ထားပါတယ်။ သူ့လို လွှမ်းမိုးမှုရှိတဲ့လူတစ်ယောက် ကျွန်တော်တို့နားမှာ ရှိနေစေချင်ပါတယ်။ ဒီနေ့ဟာ အမှန်တကယ်အထူးနေ့တစ်နေ့ပါပဲ။ Boxing Day ဟာ ဘောလုံးကစားဖို့ လှပတဲ့နေ့တစ်နေ့ဖြစ်ပြီး ဒီနေ့မှာကစားတဲ့ စွမ်းဆောင်ရည်က ကျွန်တော်တို့နဲ့ ထိုက်တန်တဲ့အဆင့်မှာရှိမယ်လို့ ယူဆပါတယ်။ သူလည်း ဒီခြေစွမ်းကို ကြိုက်နှစ်သက်မယ်လို့ မျှော်လင့်ပါတယ်”ဟု အာတီတာက ပြောကြားခဲ့သည်။
ဝက်စ်ဟမ်းနှင့်ပွဲသည် အာတီတာအတွက် အသင်းနည်းပြအဖြစ်ဆောင်ရွက်မှု သုံးနှစ်ပြည့်မြောက်ခဲ့ပြီး သူ၏ပထမဆုံး ဘုန်းမောက်နှင့်ပွဲမှ တစ်ဦးသာ ယခုပွဲတွင် ပြန်လည်ပါဝင်ခဲ့သည်။
