အာဆင်နယ်ဘက်သို့ ဂွန်ဆယ်လ်ဗက်စ်သွင်းယူခဲ့သည့် ယခုနှစ်ရာသီအတွက်အလှပဆုံးသွင်းဂိုး

အာဆင်နယ်သည် ပေါ်တူဂီကလပ် စပို့တင်းကို ပင်နယ်တီအဆုံးအဖြတ် ၅-၃ ဖြင့်ရှုံးနိမ့်ပြီး ယူရိုပါလိဂ်မှ ထွက်ခဲ့ရပြီဖြစ်သည်။ မနေ့ညက ကစားသည့် ဒုတိယအကျော့တွင် အာဆင်နယ်နှင့်စပို့တင်းတို့သည် တစ်ဂိုးစီသရေကျခဲ့သည်။ နှစ်ကျော့ပေါင်း ၃-၃ ဂိုးဖြစ်နေသောကြောင့် အချိန်ပိုဆက်ကစားရာတွင်လည်း ဂိုးမသွင်းနိုင်ဖြစ်ခဲ့သဖြင့် ပင်နယ်တီအဆုံးအဖြတ်ခံယူခဲ့ရသည်။ မာတင်နယ်လီကန်သွင်းသော အာဆင်နယ်၏ လေးလုံးမြောက်ပင်နယ်တီမှာ ဂိုးမဝင်ခဲ့ဘဲ စပို့တင်းက ၅ လုံးကန်သွင်းရာ ၅ လုံးစလုံး ဂိုးဝင်သွားခြင်းကြောင့် အာဆင်နယ်တို့ ပင်နယ်တီအဆုံးအဖြတ်တွင် ရှုံးနိမ့်ပြီး ယူရိုပါလိဂ်မှ ထွက်ခဲ့ရသည်။

အီမရိတ်တွင်ကစားသည့် ဒုတိယအကျော့တွင် အာဆင်နယ်က ပထမပိုင်းတွင် ရှာကာ၏ သွင်းဂိုးဖြင့် ဦးဆောင်နေနိုင်သော်လည်း ဒုတိယပိုင်းတွင် စပို့တင်း ကွင်းလယ်လူ ဂွန်ဆယ်လ်ဗက်စ်က ချေပဂိုးကို လှပစွာသွင်းယူခဲ့သည်။

ဂွန်ဆယ်ဗက်စ်သည် ကွင်းလယ်စည်းကျော်ကျော်မှနေ၍ အာဆင်နယ်ဂိုးသမား ရမ်စ်ဒေးလ်ရှေ့ရောက်နေသည်ကို အခွင့်ကောင်းယူပြီး ခေါင်းပေါ်မှ ကျော်၍ ကန်သွင်းခဲ့ခြင်းဖြစ်သည်။ ဂွန်ဆယ်လ်ဗက်စ်သည် ၂၀၁၇ မှ ၂၀၁၉ အထိဝုဖ်အသင်းတွင် မန်နေဂျာနူနိုဆန်းတို့စ်၏ လက်အောက်၌ ကစားခဲ့သည်။ ထို့နောက် အသက် ၂၄ နှစ်အရွယ်ရှိ ဂွန်ဆယ်ဗက်စ်သည် ဖာမာလီကာနိုအသင်းကို ပြောင်းရွှေ့သွားခဲ့ပြီး ၂၀၂၀ နွေရာသီတွင် စပို့တင်းအသင်းသို့ ရောက်ရှိလာခြင်းဖြစ်သည်။

အာဆင်နယ်ဘက်သို့ သွင်းယူသွားသော ဂွန်ဆယ်လ်ဗက်စ်၏သွင်းဂိုးနှင့်ပတ်သက်၍ ပရိသတ်တစ်ဦးက “ဒီဂိုးက အာဆင်နယ်အသင်းကစားသမားတွေကို အပြစ်တင်လို့မဖြစ်ဘူး။ ဂွန်ဆယ်လ်ဗက်စ်သွင်းသွားတာက ရူးလောက်အောင်ကို ကောင်းပါတယ်”ဟု လူမှုကွန်ရက်တွင် ရေးသားခဲ့သည်။ အခြားပရိသတ်တစ်ဦးကလည်း ဂွန်ဆယ်လ်ဗက်စ်၏သွင်းဂိုးသည် ယခုနှစ်ဘောလုံးရာသီအတွက် အကောင်းဆုံးသွင်းဂိုးတစ်ဂိုးဖြစ်ကြောင်း လူမှုကွန်ရက်တွင် ရေးသားခဲ့သည်။