ဂျူဗင်တပ်စ်အသင်းသည် နည်းပြသစ် ပီယာလိုအတွက် အပြောင်းအရွှေ့အသုံးစရိတ် ပိုမိုရရှိစေရန် အဓိကတိုက်စစ်ကစားသမား ဒီဘားလားကို ရောင်းချ၍ ငွေရှာသွားဖွယ်ရှိသည်ဟု အီတလီသတင်းစာ Gazetta dello Sport က ဖော်ပြခဲ့သည်။
ဒီဘားလားသည် ၂၀၁၉-၂၀ ရာသီ စီးရီးအေအကောင်းဆုံးကစားသမားဆု ဆွတ်ခူးခဲ့ပြီး အသင်းအတွက် အကောင်းဆုံးခြေစွမ်းပြလျက်ရှိသော်လည်း ဂျူဗင်တပ်စ်အသင်း၏ လက်ရှိစီးပွားရေးအခြေအနေအရ လူအင်အားထပ်မံဖြည့်တင်းလိုလျှင် ဒီဘားလားကို ရောင်းချ၍ ငွေဖော်ရမည်ဖြစ်သည်။
ဂျူဗင်တပ်စ်အသင်းသည် ၂၀၁၈-၁၉ ရာသီ စာရင်းချုပ် (Balance Sheet) တွင် ဘဏ္ဍာရေးလိုငွေ ယူရိုသန်း(၄၀၀)ကျော် ပြထားပြီး ယခုဘဏ္ဍာနှစ်တွင်လည်း ကိုရိုနာဗိုင်းရပ်စ်ဘေးဒဏ်ခံထားရရာ ငွေသုံးရန် ခက်ခဲမည်ဖြစ်သည်။
ဘဏ္ဍာရေးဟန်ချက်မျှတစေရန် ဂျူဗင်တပ်စ်အသင်းသည် လစာများသည့် ကစားသမားအိုများကို ဦးစွာရှင်းထုတ်နေပြီး မာတွီဒီကို အင်တာမိုင်ယာမီထံ ထွက်ခွာခွင့်ပေးခဲ့သလို၊ ရမ်ဆေးကိုလည်း ရောင်းချရန် ပြင်ဆင်နေ သည်။
သို့ရာတွင် ယင်းမှာ လစာငွေထိန်းညှိခြင်းသာဖြစ်ပြီး ကစားသမားသစ် ပြန်လည်ဝယ်ယူရန် ငွေပိုငွေလျှံ ထွက်လိုပါက ဒီဘားလားကို ရောင်းချရမည်ဖြစ်သည်။
ဒီဘားလား၏ တစ်နှစ်လုပ်ခယူရို(၉)သန်းရှိနေပြီး စာချုပ်သစ်ချုပ်ဆိုရန် ကြိုးစားနေမှုမှာလည်း အောင်မြင်မှုမရသေးပေ။
သို့ဖြစ်ရာ ၎င်းအားရောင်းချခြင်းက အကောင်းဆုံးနည်းလမ်းဖြစ်လာဖွယ်ရှိနေသည်။
