ရီးရဲလ်တောင်ပံကစားသမား ဗင်နီစီးယက်စ်က အသင်းဖော်သစ် ဘာပေရဲ့ကစားဟန် နဲ့ ခြေစွမ်းကို ချီးကျူးပြောကြားလိုက်ပါတယ်။
ဘာပေဟာ အခုနွေရာသီမှာ ပီအက်စ်ဂျီအသင်းထံကနေ အလွတ်နဲ့ ရီးရဲလ်အသင်းထံပြောင်းရွှေ့လာခဲ့တာဖြစ်ပါတယ်။
သူတို့ ၂ ဦးကြား တွဲဖက်မညီသေးပဲ ရီးရဲလ်အသင်းဟာ လာလီဂါအဖွင့် ၂ ပွဲမျာ ၁ ပွဲနိုင် ၁ ပွဲသရေကျထားခဲ့ပါတယ်။
ဒါပေမယ့်လည်း ဘရာဇီးသားက ပြင်သစ်သားရဲ့ကစားဟန် နဲ့ စွမ်းဆောင်ရည်ကိုတော့ ချီးကျူးခဲ့ပါတယ်။ ရီးရဲလ်အသင်းကတော့ အခုရာသီသစ်မှာ ကစားသမားအင်အားအများအပြားရှိနေပြီး တိုက်စစ်အတွက် ဗင်နီဆီးယက်စ် ၊ ဘယ်လင်ဟမ် ၊ ဘာပေ ၊ ရိုဒရီဂို ၊ အန်းဒရစ်ခ်တို့ရှိနေပါတယ်။
ဒါ့အပြင် အခုရာသီသစ်မှာ ချန်ပီယံလိဂ် နဲ့ လာလီဂါချန်ပီယံဆုတွေကို ကာကွယ်ရမှာဖြစ်ပါတယ်။ “ကျွန်တော် ဘာပေကစားဟန်ကို ကြိုက်ပါတယ်။ သူကစားပြနေတာကို ချစ်သလို ဒီရာသီမှာ သူကစိတ်လှုပ်ရှားစရာတွေပေးစွမ်းနိုင်မယ်ဆိုတာ သေချာပါတယ်။
ဆုဖလားအများအပြား နဲ့ ဂိုးအများအပြားသွင်းယူနိုင်ခဲ့ပြီးနောက် ရီးရဲလ်ကိုရောက်လာခဲ့တာပါ။ သူအိပ်မက်မက်ခဲ့တဲ့အသင်းဆီကိုရောက်လာခဲ့တာဖြစ်ပြီး ကစားသမားတိုင်းက ရီးရဲလ်အတွက် ကစားပေးချင်ကြပါတယ်။
ဘာပေတစ်ယောက် ပြီးခဲ့တဲ့ရာသီတုန်းကလိုမျိုး ဂိုးတွေအများကြီးသွင်းနိုင်ပါလိမ့်မယ်။ ကျွန်တော်တို့နဲ့ပိုတောင်လုပ်ပြနိုင်မှာပါ။
အသင်းက အရမ်းကောင်းနေသလို အခုဆိုလမ်းကြောင်းမှန်ပေါ်မှာရှိနေတာ အချိန်အတော်ကြာပါပြီ။ အခုတော့ ဘာပေရောက်လာမှုနဲ့အတူ လူတိုင်းက ကျွန်တော်တို့အသင်းကို ရပ်တန့်မရတော့ဘူးလို့ ပြောနေပါတယ်။
ဒါပေမယ့် အခုတော့ ကျွန်တော်တို့ အကောင်းဆုံးလေ့ကျင့်ခန်းဆင်းပြီး တစ်ဦးနဲ့တစ်ဦးနားလည်မှုရအောင် မြန်မြန်လုပ်ရပါမယ်”လို့ ဗင်နီဆီးယက်စ်က ပြောကြားခဲ့ပါတယ်။
ဘာပေ နဲ့ ဗင်နီဆီးယက်စ်တို့ဟာ လာမယ့်ကြာသပတေးနေ့မှာကန်မယ့် လက်စ်ပါးမက်စ်နဲ့ပွဲမှာ ပါဝင်လာဖွယ်ရှိနေကာ ပြိုင်ဘက်အသင်းက ဒီရာသီနိုင်ပွဲတစ်ပွဲမှမရသေးတာကြောင့် ရီးရဲလ်အနေနဲ့ အနိုင်ရလဒ်ဖော်ဆောင်နိုင်လိမ့်မယ်လို့ မျှော်လင့်နေပါတယ်။
