မန်ယူနောက်ခံလူ ဗာရန်းက အသင်းပရိသတ်များ၏ ပျော်ရွှင်မှုရစေရန်အတွက် မန်ချက်စတာဒါဘီတွင် မန်စီးတီးအသင်းကို အနိုင်ကစားသွားမည်ဖြစ်ကြောင်း ပြင်သစ်သတင်းစာ L’Equipe နှင့်ပြုလုပ်သည့် အင်တာဗျူးတွင် ပြောကြားခဲ့သည်။
မန်ယူအသင်းသည် ပရီးမီးယားလိဂ် ပွဲစဉ် ၉ အဖြစ် ယနေ့တွင် မန်စီးတီးအသင်းကို အဝေးကွင်း၌ သွားရောက်ကစားရမည်ဖြစ်သည်။ မန်ယူ နောက်ခံလူ ဗာရန်းက အသင်းပရိသတ်များ၏ စိတ်အားထက်သန်မှုနှင့် အားပေးမှုက မန်ချက်စတာဒါဘီတွင် အနိုင်ရရန် ကစားသမားများကို တွန်းအားပေးနိုင်မည်ဟု ပြောကြားခဲ့ခြင်းဖြစ်သည်။
ဗာရန်းက “မန်စီးတီးအသင်းနဲ့ ပြိုင်ဆိုင်မှုက ကျွန်တော်တို့အသင်းပရိသတ်တွေအတွက် အဓိကကျပါတယ်။ မန်စီးတီးက အသင်းပရိသတ်တွေအတွက် အရမ်းအရေးပါတဲ့ ပြိုင်ဘက်ဖြစ်ပြီး ကျွန်တော်တို့ကစားသမားတွေအနေနဲ့ ဒါကို လေးစားရမှာပါ။ ကျွန် တော်တို့အနေနဲ့ သူတို့(မန်ယူပရိသတ်များ) ကို ပျော်စေချင်ပါတယ်။ ဒါကြောင့် မန်စီးတီးတို့၊ လီဗာပူးလ်တို့နဲ့ ယှဉ်ပြိုင်ကစားရတဲ့ ပွဲတွေမှာ ကျွန်တော်တို့အနေနဲ့ အနိုင်ရဖို့အတွက် အစွမ်းကုန်တိုက်ပွဲဝင်သွားမှာပါ” ဟု ပြောကြားခဲ့သည်။
မန်ယူအသင်းသည် ယခုရာသီ ပရီးမီးယားလိဂ်တွင် ခြောက်ပွဲကစားထားရာ လေးပွဲနိုင်၊ နှစ်ပွဲရှုံး၊ ရမှတ် ၁၂ မှတ်ရရှိထားပြီး၊ မန်စီးတီးအသင်းမှာမူ ခုနစ်ပွဲကစားထားရာ ငါးပွဲနိုင်၊ နှစ်ပွဲသရေ၊ ရမှတ် ၁၇ မှတ်ရရှိထားပြီး သွင်းဂိုး ၂၃ ဂိုးဖြင့် ပရီးမီးလိဂ်အသင်းများထဲတွင် ဂိုးအများဆုံးသွင်းယူထားသည်။
