ဘရာဇီးစူပါစတား နေမာတစ်ယောက် လက်ရှိကစားနေတဲ့ ဆော်ဒီကလပ် အယ်လ်ဟီလယ်ကနေ ထွက်ခွာပြီး မွေးရပ်မြေအသင်းဟောင်း ဆန်းတို့စ်နဲ့ ပြန်လည်ချိတ်ဆက်တော့မယ်ဆိုတဲ့ ကောလဟာလတွေကို အေးဂျင့်ဖြစ်သူ ပီနီဇာဟာဗီက မဟုတ်မမှန်ကြောင်း ငြင်းဆန်လာခဲ့ပါတယ်။
နေမာဟာ ၁၀ နှစ်ကျော်ကြာ ဝေးကွာနေခဲ့တဲ့ ဆန်းတို့စ်နဲ့ ပြန်လည်ချိတ်ဆက်ဖို့ သဘောတူညီမှုတွေရထားခဲ့ပြီလို့ ပြီးခဲ့တဲ့ စနေနေ့မှာ သတင်းတွေထွက်ပေါ်လာခဲ့တာဖြစ်ပါတယ်။ ဘရာဇီးလက်ရွေးစင်ကစားသမားဟာ အယ်လ်ဟီလယ်မှာ ဒဏ်ရာပြဿနာတွေကြောင့် ပုံမှန်ကစားခွင့်မရလို့ အနာဂတ်နဲ့ပတ်သက်ပြီး မသေချာမရေရာမှုတွေလည်းရှိနေတာဖြစ်ပါတယ်။
သို့သော်လည်း ကောလဟာလတွေနဲ့ ပတ်သက်ပြီး အေးဂျင့် ဇာဟာဗီက “အယ်လ်ဟီလယ်ကနေ နေမာထွက်ခွာမယ့်အကြောင်းနဲ့ပတ်သက်ပြီး ဘာဆွေးနွေးမှုမှမရှိခဲ့ပါဘူး။ သူက အသင်းနဲ့ စာချုပ်သက်တမ်းကျန်ရှိနေသေးပြီး ဆော်ဒီမြေမှာ ပျော်ရွှင်နေပါတယ်။ နေမာရဲ့အနာဂတ်နဲ့ပတ်သက်ပြီး တိတိကျကျပြောနိုင်တာဆိုလို့ ကျွန်တော်နဲ့ သူ့အဖေပဲရှိပါတယ်။ ဒီလို ကောလဟာလတွေ ဘယ်ကနေထွက်လာတာလဲတော့ ကျွန်တော်လည်းမသိပါဘူး” လို့ပြောကြားခဲ့ပါတယ်။
ဆီဆာလူးဝစ်မာလိုကတော့ နေမာဟာ ဆန်းတို့စ်နဲ့ သဘောတူညီမှုရဖို့ နီးစပ်နေတယ်လို့ အခိုင်အမာပြောကြားထားပြီး တွစ်တာမှတစ်ဆင့် “နေမာရဲ့အေးဂျင့်က ဆန်းတို့စ်ပြောတာတွေကို လူသိရှင်ကြားငြင်းဆန်ထားပါတယ်။ ကျွန်တော်ကတော့ ကျွန်တော်ပြောသမျှနဲ့ပတ်သက်ပြီး အမြဲတမ်းတာဝန်ယူပါတယ်။ ဘရာဇီးကလူတွေ ကျွန်တော်ဘယ်လိုအလုပ်လုပ်လဲသိကြပါတယ်။ ကျွန်တော်ပြောတာတွေမှားသလား မှန်သလားဆိုတာကတော့ အချိန်ကပဲဆုံးဖြတ်ပေးသွားပါလိမ့်မယ်” လို့ရေးသားမျှဝေခဲ့ပါတယ်။
လက်ရှိအချိန်မှာတော့ နေမာဟာ တံကောက်ကြောဒဏ်ရာပြဿနာကြောင့် အနားယူနေရပြီး အသင်းအတွက် ပြန်လည်ကစားပေးနိုင်ခြင်းမရှိသေးပါဘူး။ ဒါကြောင့် လာမယ့် စနေနေ့မှာ အယ်လ်ဟီလယ်ဟာ အယ်လ်ခါလီနဲ့ ယှဉ်ပြိုင်သွားရမှာဖြစ်ပေမယ့် ဘရာဇီးကြယ်ပွင့်ကတော့ ပွဲကြည့်စင်ကနေပဲ ကြည့်ရှုသွားရဦးမှာဖြစ်ပါတယ်။
