အပြောင်းအရွှေ့ကိစ္စများအတွက် အင်တာထိပ်တန်းတာဝန်ရှိသူများနှင့် နည်းပြ အင်ဇာဂီ ဆွေးနွေးခဲ့ပြီး ချယ်လ်ဆီးနောက်ခံလူ ကူလီဘလီကို အငှားခေါ်ယူရန် ကြိုးပမ်း

အင်တာမီလန်အသင်းနည်းပြ ဆီမြွန်နီအင်ဇာဂီသည် ကစားသမားအပြောင်းအရွှေ့ကိစ္စရပ်များအတွက် အသင်းထိပ်တန်းတာဝန်ရှိသူများနှင့် ဆွေးနွေးခဲ့ပြီး လက်ရှိတွင် ချယ်လ်ဆီးနောက်ခံလူ ကူလီဘလီကို အငှားဖြင့် ခေါ်ယူရန် စီစဉ်နေကြောင်း Corriere dello Sport က ဖော်ပြခဲ့သည်။ 

အင်ဇာဂီသည် အသင်းဥက္ကဋ္ဌ စတီဗင်ကျန်းအပါအဝင် ကလပ်အသင်းတာဝန်ရှိသူများနှင့် တွေ့ဆုံကာ ကစားသမားအပြောင်းအရွှေ့ကိစ္စရပ်များအတွက် (၃) နာရီကြာဆွေးနွေးခဲ့ကြောင်း သိရှိရသည်။ ယင်းအစည်းအဝေးပြီးနောက် အင်တာမီလန် အသင်းသည် ယခုနွေတွင် ခေါ်ယူမည့် ကစားသမားများကို သတ်မှတ်ခဲ့ပြီး အဓိကပစ်မှတ်အနေဖြင့် ချယ်လ်ဆီး နောက်ခံလူကူလီဘလီကို အငှားဖြင့် ခေါ်ယူရန်စီစဉ်နေကြောင်း Corriere dello Sport က ဖော်ပြခဲ့သည်။ 

အင်တာမီလန်အသင်းသည် ယခုနွေရာသီတွင် PSG အသင်းသို့ ပြောင်းရွှေ့တော့မည့် အသင်းနောက်ခံလူ ရှကရီညာ၏ နေရာတွင် အစားထိုးရန်အတွက် ကူလီဘလီကို ပစ်မှတ်ထားလာခြင်းဖြစ်သည်။ Corriere dello Sport  ၏ဖော်ပြချက်အရ အင်တာမီလန်အားကစားဒါရိုက်တာ အူဆီလီယိုသည် ကူလီဘလီကို အငှားခေါ်ယူရန်အတွက် လာမည့်ရက်ပိုင်းတွင် လန်ဒန်သို့သွားရောက်ကာ ချယ်လ်ဆီးအသင်းမှ ကိုယ်စားလှယ်များနှင့် ဆွေးနွေးသွားမည်ဖြစ်ကြောင်း သိရှိရသည်။ 

ကူလီဘလီသည် ချယ်လ်ဆီးအသင်းတွင် ပုံမှန်ပွဲထွက်ခွင့်ရရန် ရုန်းကန်နေရ၍ အင်တာမီလန်အသင်းက အငှားခေါ်ယူရန် ကြိုးပမ်းလာခြင်းဖြစ်သည်။ အင်တာမီလန်အသင်းသည် ချယ်လ်ဆီးတိုက်စစ်မှူး လူကာကူကိုလည်း ပြန်လည်ခေါ်ယူလိုနေကြောင်း သိရသည်။